ពលរដ្ឋស្រុកសំឡូតផ្ទុះកំហឹងនឹងមន្ត្រីឧទ្យាននុរក្ស…ដើរដកបំផ្លាញដំណាំគាត់

ថ្ងៃទី ២៣ ខែ តុលា ឆ្នាំ ២០១៩
ម៉ោង ១៦:៥៥
ឆោម ពិសម័យ

ខេត្តបាត់ដំបង ៖ មន្ត្រីឧទ្យាននុរក្សមួយក្រុមបានរងការចោទប្រកាន់ពីប្រជាពលរដ្ឋមួយចំនួន នៅក្នុងស្រុកសំឡូតថា បាននិងកំពុងដើររាត្បាតដកបំផ្លាញផលដំណាំប្រជាកសិករចោលពាសពេញចំការជាបន្តបន្ទាប់ ដោយមិនបាននិយាយអំពីមូលហេតុ ឬផ្ដល់ព័ត៌មានដល់ម្ចាស់ចំការឱ្យបានដឹងជាមុនឡើយ ។ នេះបើតាមប្រភពព័ត៌មានពីមន្ត្រីស្រុកសំឡូតដែលបានប្រាប់កោះសន្តិភាព នៅព្រឹកថ្ងៃទី២៣ តុលា ដែលធ្វើឲ្យប្រជាពលរដ្ឋមានការខឹងសម្បារយ៉ាងខ្លាំង ហើយបានស្នើសុំឲ្យមានការជួយអន្តរាគម៍ពីថ្នាក់ដឹកនាំទៀត
ផង។

ជាក់ស្ដែង នៅវេលាម៉ោងប្រមាណ១០ព្រឹកថ្ងៃទី២២ តុលា ក្រុម«មន្ត្រីឧទ្យាននុរក្សតំបន់ប្រើប្រាស់ច្រើនយ៉ាងសំឡូត»ដែលមានសមាសសភាព«មន្ត្រីបរិស្ថាន មន្ត្រីកងរាជអាវុធហត្ថ និង មន្ត្រីនគរបាល» ប្រមាណជិត១០នាក់ ប្រដាប់ដោយអាវុធក្នុងដៃផង បានលើកគ្នាទៅដកបំផ្លាញដំណាំស្វាយរបស់ពលរដ្ឋនៅក្នុងចំការមួយកន្លែង ដែលស្ថិតនៅក្នុងភូមិឆករកា ឃុំសំឡូត ស្រុកសំឡូត ចម្ងាយប្រហែល១គីឡូម៉ែត្រ ពីច្រកទ្វាព្រំដែនតំបន់«៤០០»។

បើតាមព័ត៌មានពីមន្ត្រីមូលដ្ឋានបានឲ្យដឹងថា ក្រុមមន្ត្រីឧទ្យាននុរក្សនោះ ដឹកនាំដោយឈ្មោះម៉ៅ សុភ័ក្រ បានដើរាត្បាតដកបំផ្លាញដំណាំស្វាយរបស់កសិករអស់ប្រជិត៥០០ដើម ដែលម្ចាស់ដំណាំនេះទើបដាំបានរយៈពេលជិត៣ខែកន្លងទៅនេះ។ អ្នកថែទាំដំណាំស្វាយនេះ ដែលសុំមិនបានប្រាប់ឈ្មោះ បានប្រាប់កោះសន្តិភាព តាមទូសរស័ព្ទនៅព្រឹកថ្ងៃទី២៣ តុលា នេះថា ដំណាំស្វាយទាំងនោះ បានដាំលើផ្ទៃដីជាង១ហិកតា ជិត៣ខែកន្លងមកហើយ តែពេលនេះត្រូវបានក្រុមមន្ត្រីខាងលើ នាំគ្នាដើរដកបំផ្លាញចោលអស់គ្មានសល់ឡើយ។

គាត់និយាយថា ដីដែលគាត់ដាំស្វាយនេះ បានដាំដំណាំកសិកម្មច្រើនឆ្នាំហើយ ហើយក៏មានប័ណ្ណកម្មសិទ្ធកាន់កាប់ស្របច្បាប់ទទូលស្គាលពីអាជ្ញាធរឃុំ និងស្រុកត្រឹមត្រូវដែរ ។ ម្ចាស់ដំណាំរូបនេះបានបញ្ជាក់ថា កន្លងមក មិនដែលមានក្រុមមន្ត្រីឧទ្យាននុរក្សនេះ មកសួរនាំពីរឿងដីធ្លី ហើយពេលដែកគាត់ចាប់ផ្ដើមដាំកូនស្វាយ ក៏មិនដែលមានមន្ត្រីនេះ ចេញមុខមកសួរនាំដែរ លុះពេលគាត់ដាំកូនស្វាយបានរយៈពេលជិត៣ខែ ស្រាប់តែក្រុមនេះ លើកគ្នាមកលួចកាប់ និងដកបំផ្លាញចំណាំស្វាយគាត់ចោលអស់គ្មានសល់ ។

ហើយការលើកគ្នា ចូលបំផ្លាញដំណាំក្នុងចំណាំគាត់នេះ ក៏មិនបានជួនដំណឹងដល់គាត់ជាមុន ឬសួរនាំពីមូលហេតុអ្វីដែរ ស្រាប់តែពួកគេលួចចូលដក់ដំណាំស្វាយ រួចប្រមូលដឹកយកទៅកាន់ស្នាក់ការពួកគេអស់គ្មានសល់។

កោះសន្តិភាព មិនអាចស្វែងរកសុំការបំភ្លឺពីលោកម៉ៅ សុភ័ក្រ ដែលរដ្ឋអះអាងថា ជាអ្នកដឹកនាំដកបំផ្លាញដំណាំពលរដ្ឋនេះ បានភ្លាមៗទេ នៅរសៀលថ្ងៃដដែលនេះ ខណៈមន្ត្រីដទៃទៀត ដែលចូលរួមកិច្ចប្រតិបត្តិការនេះ ក៏មិនអាចទំនាក់ទំនងបានដូចគ្នាដែរ។ ប៉ុន្តែមន្ត្រីមូលដ្ឋានបានស្រង់សំដីក្រុមមន្ត្រីឧទ្យាននុរក្សថា ពួគេបានចោទប្រកាន់ពលរដ្ឋថា បានដាំដំណាំប៉ះលើដីអភិរក្សរបស់ពួកគេ ទើបគេដកដំណាំចោលដូច្នេះ។

ស្របពេលដែលពលរដ្ឋកំពុងក្ដៅក្រហាយរឿងដកដំណាំស្វាយបំផ្លាញចោលអស់ជិត៥០០ដើម កោះសន្តិភាពក៏បានទទូលរបាយការណ៍មួយច្បាប់ទៀត ពាក់ព័ន្ធនឹងក្រុមមន្ត្រីឧទ្យាននុរក្សខាងលើនេះ ដកបំផ្លាញដំណាំចេករបស់ពលរដ្ឋដែរ ។ របាយការណ៏មួយទំព័រនោះ ធ្វើឡើងដោលលោកធឹម ព្រឿង មេឃុំសំឡូត គោរពជូនលោកសើ សាម៉េត អភិបាលស្រុកសំឡូត កាលពីថ្ងៃទី១៤ តុលា ២០១៩ ស្ដីពីការចំបំភ្លេចបំផ្លាញដំណាំចេករបស់ប្រជាពលរដ្ឋដែលបង្កឡើងដោយក្រុម «មន្ត្រីឧទ្យាននុរក្ស តំបន់ប្រើប្រាសច្រើនយ៉ាងសំឡូត»។

លោកធឹម ព្រឿង បានសរសេរក្នុងរបាយការណ៏ថា កាលពីថ្ងៃទី១១ តុលា កន្លងទៅថ្មីៗនេះ «មន្ត្រីឧទ្យាននុរក្ស តំបន់ប្រើប្រាសច្រើនយ៉ាងសំឡូត» ចំនួន០៨នាក់ បានចុះទៅដកបំផ្លាញដំណាំចេកណាំវ៉ានៅក្នងចំការមួយកន្លែង របស់ពលរដ្ឋឈ្មោះជុន សំអាត ប្រុសអាយុ៥៣ឆ្នាំ រស់នៅភូមិសំឡូត ឃុំសំឡូត អស់ចំនួន១៣០០ដើម ហើយថែមទាំងចាក់ទម្លាយថង់ត្រងទឹកសម្រាប់បាញ់ស្មៅអស់មួយកន្លែងទៀតផង។

លោកមេឃុំបានស្រង់សំដីម្ចាស់ចំការមកសរសេរលើរបាយការណ៏ទៀតថា ម្ចាស់ចំការឈ្មោះជុន សំអាត បានចាប់ផ្ដើមដាំចេញនោះតាំងពីអំឡុងខែមិថុនា កន្លងមកនេះ តែគាត់បានអាស្រ័យផលលើដីចំការនោះចាប់តាំងពីឆ្នាំ២០០៣មកម្ល៉េះ ។ ប៉ុន្តែលោកមេឃុំមិនបាននិយាយអំពីមូលហេតុដែលក្រុមមន្ត្រីឧទ្យាននុរក្ស ចូលលុកលុយបំផ្លាញដំណាំរបស់ពលរដ្ឋខ្លួននោះទេ គ្រាន់តែធ្វើរបាយការណ៍ជូនលោកអភិបាលស្រុក ដើម្បីជ្រាបតែប៉ុណ្ណោះ។

ទោះយ៉ាងណា បើតាមពលរដ្ឋបាននិយាយថា សំណុះរឿងដកបំផ្លាញដំណាំចេកនេះ ក៏ដូចសំណុំរឿងដកបំផ្លាញដំណាំស្វាយដែរ គឺខាងមន្ត្រីឧទ្យាននុរក្ស សុទ្ធតែអះអាងថា មូលហេតុដែលពួកគេដកបំផ្លាញដំណាំចេក និងដំណាំស្វាយរបស់ពលរដ្ឋនេះ គឺដោយសារតែពលរដ្ឋទាំងនោះ ដាំដំណាំប៉ះពាល់លើដីឧទ្យាននុរក្ស តំបន់ប្រើប្រាសច្រើនយ៉ាងសំឡូត ដែលពួកគេគ្រប់គ្រង ។

ប៉ុន្តែឆ្លើយតបនឹងហេតុផលរបស់មន្ត្រីនេះ ពលរដ្ឋបានលើកឡើងដោយចម្ងល់ថា បើពួកគាត់ធ្វើចំការប៉ះលើដីអភិរក្ស ចុះដីចំការរាប់សិបហិកតារបស់អ្នកមានអំណាចមួយចំនួន ដែលពោរពេញទៅដោយដំណាំស្អេកស្កះ នៅជុំវិញដីរបស់ពួកគាត់សព្វថ្ងៃនេះ ម្ដេចមិនសើរើផង ? ចុះហេតុអ្វីមកទើសតែដីពួកគាត់ដែលមានបន្តិចបន្ទូច ?

ជាមួយនឹងការបំភ្លេចបំផ្លាញដំណាំកសិកម្មខាងលើនេះ ពួកគេគាត់បានដាក់បណ្ដឹងទៅកាន់អាជ្ញាធរមូលដ្ឋានហើយ ដើម្បីសុំជួយអន្តរាគមន៍រកដំណោះស្រាយ ។ ប៉ុន្តែបើតាមប្រភពព័ត៌មានពីមន្ត្រីមូលដ្ឋានថា រហូតដល់ពេលនេះ មិនទាន់ឃើញមានអាជ្ញាធរស្រុកសំឡូត កំរើកដៃកំរើកជើងចុះសួរនាំពលរដ្ឋរងគ្រោះ ឬ ចុះពិនិត្យទីតាំងកើតហេតុនៅឡើយទេ៕