ខេត្តកំពង់ចាម ៖ សមាជិកក្រុមគ្រួសារមួយមានគ្នាសរុបចំនួន០៥នាក់ រួមទាំងកូននៅក្នុងផ្ទៃបានសម្រេចនាំគ្នាមកសង់ផ្ទះធ្វើពីឫស្សីជញ្ជាំង មើលឃើញពីម្ខាងទៅម្ខាង ដោយសារតែមានជីវភាពក្រីក្របានរុញច្រានឲ្យធ្វើដូច្នេះ ។ ផ្ទះដ៏តូចរាងចង្អៀតជណ្តើរ និងឫស្សីទំហំប្រហែល៣ម៉ែត្របួនជ្រុង គឺស្ថិតនៅក្រោមគល់ស្ពានបេតុងគៀនជ្រៃ…
ខេត្តកំពង់ចាម ៖ សមាជិកក្រុមគ្រួសារមួយមានគ្នាសរុបចំនួន០៥នាក់ រួមទាំងកូននៅក្នុងផ្ទៃបានសម្រេចនាំគ្នាមកសង់ផ្ទះធ្វើពីឫស្សីជញ្ជាំង មើលឃើញពីម្ខាងទៅម្ខាង ដោយសារតែមានជីវភាពក្រីក្របានរុញច្រានឲ្យធ្វើដូច្នេះ ។ ផ្ទះដ៏តូចរាងចង្អៀតជណ្តើរ និងឫស្សីទំហំប្រហែល៣ម៉ែត្របួនជ្រុង គឺស្ថិតនៅក្រោមគល់ស្ពានបេតុងគៀនជ្រៃ ឃុំគៀនជ្រៃ ស្រុកកំពង់សៀម ជាមួយនោះក្រុមគ្រួសារក្រីក្រនេះក៏មានបំណងចង់បានផ្ទះតូចល្មមសម្រាប់រស់នៅដូចគេឯងដែរ ។
ស្ត្រីឈ្មោះ ជូ ស្រីមុំ វ័យ៣១ឆ្នាំ ប្រាប់ឲ្យដឹងនៅព្រឹកថ្ងៃទី២២ តុលា ២០១៩ថា គាត់បានរស់នៅលើផ្ទះឈើតូចជាមួយនឹងម្តាយចំណាស់ជាស្ត្រីមេម៉ាយដែលនៅជាប់នឹងមាត់ព្រែកក្នុងអតីតឡូត៍នេសាទលេខ១ ផ្ទះតូចចង្អៀតពេកពិបាក និងរស់នៅក៏បានសម្រេចចិត្តឲ្យប្តីមកធ្វើផ្ទះនៅក្រោមស្ពានគៀនជ្រៃ ធ្វើពីឫស្សីទាំងអស់ ដោយបានរស់នៅជិត២ឆ្នាំហើយ ព្រោះតែក្រមិនមានលុយទិញដីនៅ ។
ស្ត្រីក្រីក្ររូបនេះបានប្រាប់បន្តថា គាត់មានកូនប្រុសចំនួន២នាក់ រួម និងកូនក្នុងផ្ទៃ២ខែម្នាក់ទៀតឡើងដល់ទៅ៣នាក់ ក្នុងនោះកូនបងអាយុ៥ឆ្នាំ រៀនថ្នាក់មត្តេយ្យ ប្តីវិញនៅព្រឹកថ្ងៃទី២២ តុលា បានចេញទៅពត់ដែតអេតចាយឲ្យគេក្នុង១ថ្ងៃបានថវិកាចំនួន២ម៉ឺនរៀល នៅកន្លែងទិញអេតចាយមួយកន្លែង នៅក្រុងកំពង់ចាម កំរៃបានមកដោះស្រាយជីវភាពទាំងលំបាក ។
មូលហេតុដែលបាននាំគ្នាមកសង់ផ្ទះនៅក្រោមស្ពានដោយសារតែមិនមានដីនៅ ហើយច្រាំងចេះតែបន្តបាក់រាល់ឆ្នាំជាមួយនោះគាត់ចង់បានផ្ទះតូចល្មមសម្រាប់ជាកន្លែងជ្រកកោន ប្រសិនបើមានសប្បុរសជនជួយដល់គាត់សប្បាយចិត្ត ហើយមកនៅក្រោមស្ពានមិនចង់នៅប៉ុន្មានទេ ព្រោះក្នុងរដូវទឹកសម្រកបានហូរច្រោះដីដល់សរសរស្ពាន ធ្វើឲ្យអ្នកគៀនជ្រៃមានក្តីកង្វល់ស្ទើរគ្រប់ៗគ្នា ។
អ្នកស្រី អ៊ា ចាន់ថុល មេឃុំគៀនជ្រៃ ប្រាប់ថា ស្ត្រីជាម្តាយរបស់ស្រី្តឈ្មោះ មុំ ដោយមានផ្ទះរស់នៅជាប់នឹងគល់ស្ពានគៀនជ្រៃ ដោយសារច្រាំងទន្លេបានបន្តបាក់កន្លងមក ពេលរុះរើផ្ទះ ត្រូវបានក្រុមការងារមូលដ្ឋានចុះមកជួយរុះរើ ហើយថែមទាំងជូនលុយបន្ថែមទៀតដាក់មកនៅកៀក និងគល់ស្ពាន ។ ហើយស្ត្រីដែលរស់នៅក្រោមស្ពានគៀនជ្រៃនេះ ពិតជាមានជីវភាពក្រីក្រមែន ។
ដោយឃើញការលំបាកនេះគាត់បានសុំដីវត្តគៀនជ្រៃក្រៅបាន១កន្លែងហើយ ក៏នឹងសុំឈើចាស់ៗនៅវត្ត ដើម្បីសង់ផ្ទះជូនគ្រួសារក្រីក្រនេះ មួយទៀតក៏មានបំណងស្នើសុំដល់លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ប្រធានក្រុមការងារចុះជួយស្រុកកំពង់សៀម ស្នើសុំឲ្យជួយសង់ផ្ទះឲ្យតែមិនទាន់ដឹងថា យ៉ាងណាទេ ។ ហើយក៏បានឲ្យគ្រួសារនេះចាកចេញពីក្រោមស្ពានគៀនជ្រៃ ដោយមិនអនុញ្ញាតឲ្យរស់នៅក្នុងសភាព ដូច្នេះទេ កន្លងមកឲ្យតែមានចែកអំណោយដល់ជនក្រីក្រគ្រួសារនេះ តែងតែបានទទួលរាល់លើកមិនដែលអាកខានម្តងណាទេ ៕ កែសម្រួលដោយ ៖ សុឃាក់
ចែករំលែកព័តមាននេះ