ខេត្តកំពង់ស្ពឺ ៖ គោគឺជាសត្វចតុប្បាទមួយប្រភេទ ដែលអាចជួយដល់ការធ្វើស្រែចំការរបស់ប្រជាកសិករបានមួយចំណែកធំ ព្រោះគោគឺជាកម្លាំងអូសទាញដ៏សំខាន់ក្នុងការភ្ជួររាស់ដីស្រែចំការទៅតាមរដូវកាល ។ ដោយបច្ចុប្បន្នការធ្វើកសិកម្មបានវិវឌ្ឍទៅរកភាពជឿនលឿន និងទាន់សម័យដោយការប្រើគ្រឿងចក្រ ធ្វើឱ្យការចិញ្ចឹមគោហាក់មានការថមថយ ដោយគ្រួសារខ្លះបានប្រវាស់…
ខេត្តកំពង់ស្ពឺ ៖ គោគឺជាសត្វចតុប្បាទមួយប្រភេទ ដែលអាចជួយដល់ការធ្វើស្រែចំការរបស់ប្រជាកសិករបានមួយចំណែកធំ ព្រោះគោគឺជាកម្លាំងអូសទាញដ៏សំខាន់ក្នុងការភ្ជួររាស់ដីស្រែចំការទៅតាមរដូវកាល ។ ដោយបច្ចុប្បន្នការធ្វើកសិកម្មបានវិវឌ្ឍទៅរកភាពជឿនលឿន និងទាន់សម័យដោយការប្រើគ្រឿងចក្រ ធ្វើឱ្យការចិញ្ចឹមគោហាក់មានការថមថយ ដោយគ្រួសារខ្លះបានប្រវាស់ ពីអ្នកដែលមានគោច្រើន យកមកចិញ្ចឹមដើម្បីយកកូនចែកគ្នា ។
ជាក់ស្តែង នៅភូមិត្រពាំងឈូក ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ ដែលជាភូមិមួយស្ថិតជាប់ស្ទឹងស្លាគូ មានខណ្ឌសីមាជាប់ស្រុកត្រាំកក់នៃខេត្តតាកែវ មានប្រជាពលរដ្ឋ៣១៤គ្រួសារប្រកបរបរកសិកម្ម ។ ចំណែកសត្វគោចិញ្ចឹមវិញមានត្រឹមតែ២០០ក្បាលប៉ុណ្ណោះ ។
ជួបជាមួយអ្នកយកព័ត៌មានយើង កសិករម្នាក់ឈ្មោះរ៉ាបានប្រាប់ថា គ្រួសាររបស់គាត់មិនមានសត្វគោសម្រាប់ចិញ្ចឹមទេ រាល់ថ្ងៃគោដែលគាត់មើលថែ គឺជាគោប្រវាស់ពីបងប្អូនដើម្បីបានកូនយកមកចិញ្ចឹម ព្រោះគាត់មិនមានប្រាក់សម្រាប់ទិញគោនោះទេ ។ គាត់រៀបរាប់ថា ការប្រវាស់គោនេះ បើសិនជាមេក្រមុំ
គឺកូនដំបូងត្រូវបានមកលើអ្នកមើលថែ(អ្នកចិញ្ចឹម)។ ចំណែកកូនក្រោយត្រូវបានទៅលើម្ចាស់ដើម ។ បើសិនជាមេគោយកមកចិញ្ចឹមប្រវាស់ហើយមានផ្ទៃពោះស្រាប់នោះ កូនកើតមកត្រូវបានទៅលើម្ចាស់ដើមមុន ហើយកូនក្រោយមកទៀតបានមកលើអ្នកមើលថែ ។ ករណីនេះអាស្រ័យទៅលើម្ចាស់ដើម និងអ្នកប្រវាស់និយាយព្រមព្រៀងគ្នាពីដំបូងមក ។
លោកសេក អុិម មេភូមិត្រពាំងឈូកបានប្រាប់ផងដែរថា សព្វថ្ហៃនេះទោះបីជាការធ្វើស្រែចម្ការមានការវិវឌ្ឍ និងឈានទៅរកភាពជឿនលឿន ដោយការប្រើគ្រឿងចក្រភាគច្រើនយ៉ាងណាក្តីក៏ក្រុមគ្រួសារខ្លះ ដែលមិនមានលទ្ធភាពនៅតែប្រើកម្លាំងសត្វគោអូសទាញដដែល ។ លោកបន្តថា សព្វថ្ងៃក្នុងចំណោមទាំង៣១៤គ្រួសារគឺគ្រួសារណាដែលមានគោច្រើន បានប្រវាស់ទៅឱ្យអ្នកដែលមិនមានសត្វគោ ដើម្បីសម្រាលការមើលថែ ។
គាត់ថា ពេលបានកូនមកត្រូវចែកគ្នាម្នាក់ម្តង ទៅតាមការនិយាយព្រមព្រៀងគ្នា រវាងម្ចាស់គោនិងអ្នកចិញ្ចឹមមើលថែ ។ បើនិយាយពីតម្លៃវិញ គឺក្នុងគោមួយនឹមហាក់មានតម្លៃថ្លៃគួរសមគោឈ្មោលសម្រាប់ទឹមមានតម្លៃចាប់ពី៣០០០ទៅ៥០០០ដុល្លារក៏មាន ហេតុដូច្នេះហើយអ្នកមានលទ្ធភាពល្មមៗ មិនអាចមានគោចិញ្ចឹមដូចអ្នកមានជីវភាពធូរធាបានឡើយ ។
លោកថា សម័យនេះថ្វីត្បិតតែការធ្វើកសិកម្មស្រែចម្ការមានការជឿនលឿនស្របទៅតាមការអភិវឌ្ឍរបស់ប្រទេសជាតិយ៉ាងណាក្តី ក៏បងប្អូនមួយចំនួននៅតែចិញ្ចឹមគោដដែលព្រោះសត្វគោបានផ្តល់ផលប្រយោជន៍ជាច្រើនដល់ប្រជាកសិករយើង ជាពិសេសគឺកម្លាំងអូសទាញតែម្តង ។ គាត់ថា លើសពីនេះទៅទៀតគឺគេត្រូវការលាមករបស់វាដើម្បីយកមកទុកធ្វើជីធម្មជាតិ ចៀសវាងការប្រើប្រាស់ជីគីមីបរទេស ៕
ចែករំលែកព័តមាននេះ