ខេត្តព្រះសីហនុ ៖ លំនៅឋានជិត២០ខ្នង នៅភូមិជម្ពូខ្មៅ ឃុំទួលទទឹង ស្រុកព្រៃនប់ បានរងការខូចខាតដោយខ្យល់កន្ត្រាក់បោកបក់ កាលពីវេលារំលងអធ្រាត្រឈានចូលថ្ងៃទី២០ ខែតុលាដែលតាមមន្ត្រីមូលដ្ឋានថា មានលំនៅឋានខ្លះខូចខាតស្ទើរទាំងស្រុង…
ខេត្តព្រះសីហនុ ៖ លំនៅឋានជិត២០ខ្នង នៅភូមិជម្ពូខ្មៅ ឃុំទួលទទឹង ស្រុកព្រៃនប់ បានរងការខូចខាតដោយខ្យល់កន្ត្រាក់បោកបក់ កាលពីវេលារំលងអធ្រាត្រឈានចូលថ្ងៃទី២០ ខែតុលាដែលតាមមន្ត្រីមូលដ្ឋានថា មានលំនៅឋានខ្លះខូចខាតស្ទើរទាំងស្រុង និងខ្លះទៀតខូចខាតតិចតួច ប៉ុន្តែមិនមានមនុស្សរងគ្រោះថ្នាក់ទេ ។
លោកវរសេនីយ៍ទោ ហួ យ៉ៃ អធិការនគរបាលស្រុកព្រៃនប់ បានឲ្យដឹងថា នៅថ្ងៃទី២០ ខែតុលាអធិការដ្ឋាននគរបាលស្រុកបានបញ្ជូនកម្លាំងទៅ ជួយរៀបចំសម្រួលការងារមួយចំនួន និងនាំយកអំណោយរបស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត មានសម្ភារម្ហូបអាហារ និងថវិកាទៅឧបត្ថម្ភគ្រួសារពលរដ្ឋដែលគ្រោះផងដែរ ។ ការឧបត្ថម្ភនេះ គឺផ្តល់ជូនបឋមសំខាន់កម្លាំងត្រូវជួយប្រមូលជញ្ជូន និងជួយរៀបចំសម្ភារជូនពួកគាត់សិន ។
ជាមួយនឹងសកម្មភាពនេះ នៅថ្ងៃទី២១ ខែតុលា លោកស្រី ប្រាក់ ចាន់សុខា សមាជិកាគណៈកម្មាធិការសាខាកាកបាទក្រហមកម្ពុជាខេត្ត និងលោក ប៉េង សៅឌូ លោកស្រី ម៉ម សាមុត អភិបាលរងស្រុក និងមន្ត្រីអាជ្ញាធរភូមិ ឃុំ បានចុះជួយឧបត្ថម្ភដល់ប្រជាពលរដ្ឋដែលរងគ្រោះដោយសារខ្យល់កន្ត្រាក់នេះ ដែលមានគ្រួសាររងគ្រោះធ្ងន់ចំនួន៣គ្រួសារ ក្នុងមួយគ្រួសារៗទទួលបានថវិកា៨០ម៉ឺនរៀល ។ គ្រួសាររងគ្រោះមធ្យមចំនួន៤គ្រួសារ ក្នុងមួយគ្រួសារៗទទួលបាន៣០ម៉ឺនរៀល និងរងគ្រោះតិចតួច១២គ្រួសារទទួលបានក្នុងមួយគ្រួសារៗ១៥ម៉ឺនរៀល ។
ចំណែកសម្ភារនិងគ្រឿងឧបភោគបរិភោគផ្សេងទៀតដែលផ្តល់ជូន ទាំងគ្រួសារដែលរងគ្រោះធ្ងន់ស្រាលទាំង១៩គ្រួសារ ក្នុង១គ្រួសារៗទទួលបានស្មើៗគ្នា មានអង្ករ១បាវ២០គីឡូក្រាម មី១កេស ត្រីខ១យួរ១២កំប៉ុង តង់ធំ១ កន្ទេល១ ៕
ចែករំលែកព័តមាននេះ