ទិញកាបូបប្រេនៗមកប្រើក៏ជាការវិនិយោគល្អមួយដែរ

ថ្ងៃទី ២១ ខែ តុលា ឆ្នាំ ២០១៩
ម៉ោង ១៧:១៤
ណៃ ដាលីន

ពេលដែលអ្នកលឺពាក្យថា កាបូបប្រេនៗ អ្នកប្រហែលជា គិតថា វាជាជម្រើសខ្ជះខ្ជាយលុយព្រោះវាមិនមានអ្វីខុសគ្នាពីកាបូបដទៃដែលមានលើទីផ្សារឡើយ ។ គំនិតនេះពិតជាត្រឹមត្រូវសម្រាប់ករណីមួយចំនួន ជាពិសេសប្រសិនបើអ្នកមិនចេះជ្រើសរើសកាបូប ។

គួរបញ្ជាក់ផងដែរថា អត្ថបទនេះមិនត្រូវបានសរសេរឡើងដោយគាំទ្រឲ្យមនុស្សគ្រប់គ្នាទិញកាបូនប្រេនៗឡើយ ។ ផ្ទុយមកវិញអត្ថបទនេះមានគោលបំណងបង្ហាញពីគន្លឹះមួយចំនួនដែលជួយឲ្យអ្នកសន្សំថវិកាបានពីការទិញកាបូបទាំងនេះព្រោះតែមូលហេតុខាងក្រោមនេះ៖

១. ភាពធន់ ៖
តើអ្នកឧស្សាហ៍ប្តូរកាបូយួរទេ?អ្នកដែលតែងតែជ្រើសរើសផលិតផលថោកៗ និងគុណភាពទាបប្រហែលជានិយាយថាជារៀងរាល់ ២ ទៅ ៣ ខែម្តង ។ ប្រាកដណាស់កាបូបទាំងនោះមិនអាចធន់នឹងការប្រើប្រាស់បានយូរទេ ។ ផ្ទុយមកវិញ អ្នកដែលទិញកាបូបថ្លៃជាងប្រមាណ ៥០ដុល្លារប្រហែលជានិយាយថាពី ១ ទៅ ២ឆ្នាំ ។ ភាពខុសគ្នាគឺពិតជាធំណាស់ហើយនេះគឺមកពីកាបូបដែលមានតម្លៃថ្លៃពេលខ្លះគឺមកពីវាមានគុណភាពខ្ពស់ជាង ។ គន្លឹះដែលសំខាន់គឺការជ្រើសរើសកាបូបដែលមានគុណភាពសាកសមនឹងតម្លៃរបស់វា ។

២. អ្នកអាចជួសជុលវាបានក្នុងតម្លៃទាប៖
កាបូបតម្លៃពី ១៥ ទៅ ២៥ដុល្លារ បើខូចគឺភាគច្រើនចូលធុងសម្រាមហើយ ព្រោះមិនមានមនុស្សច្រើនដែលខ្វល់ពីវាឡើយ ។ ផ្ទុយមកវិញ បើទោះជាកាបូបប្រេនរបស់អ្នកមានបញ្ហា ដូចជាដាច់ខ្សែឬខូចរូត អ្នកមិនដាច់ចិត្តងាយឡើយក្នុងការបោះវាចោល ព្រោះនឹងឃើញដល់តម្លៃដ៏ថ្លៃរបស់វា ។ ដោយហេតុដូចនេះទើបមនុស្សជាច្រើនអាចប្រើកាបូបប្រេនបានយូរ ហើយពួកគេសុខចិត្តយកវាទៅជួសជុលដើម្បីប្រើបន្ត ។

៣. តម្លៃលក់បន្ត៖
កាបូបថោកៗភាគច្រើនមិនមាននរណាចាប់អារម្មណ៍ទិញទេពេលដែលអ្នកចង់លក់វាបន្តហើយតម្លៃរបស់វាប្រៀបដូចជាអស់ទាំងស្រុងបន្ទាប់ពីអ្នកទិញវាពីអ្នកលក់ ។ ផ្ទុយមកវិញ កាបូបប្រេនៗរក្សាតម្លៃរបស់វាបានយូរ ។ ប្រសិនបើអ្នកជាមនុស្សចូលចិត្តប្តូរកាបូប អ្នកនៅអាចលក់កាបូបប្រេនៗចាស់របស់អ្នកចោលនឹងរកកម្រៃមកវិញដែរ ។ លើសពីនេះទៅទៀត កាបូបមួយចំនួនថែមទាំងអាចឡើងថ្លៃបានទៀត ជាពិសេសកាបូបដែលមកពីប្រេនធំៗ ៕ កែសម្រួលដោយ ៖ សុឃាក់