ខេត្តព្រះវិហារ ៖ អគ្គនាយកអាជ្ញាធរជាតិព្រះវិហារឲ្យដឹងថា ការសិក្សាកំណត់ពីផលប៉ះពាល់ និងការខូចខាតជណ្ដើរបុរាណខាងជើងគោបុរៈទី៥ នៃប្រាសាទព្រះវិហារ ដោយសារទឹកភ្លៀងហូរច្រោះកន្លងទៅនឹងបញ្ចប់នៅចុងឆ្នាំ២០១៩នេះ ខណៈបច្ចុប្បន្នសម្រេចបាន៨០%ហើយ ។ ការជួសជុលជណ្ដើរនេះនៅខែសីហាឆ្នាំ២០២០ ។
ថ្លែងប្រាប់អ្នកសារព័ត៌មានលោកគង់ ពុទ្ធិកា អគ្គនាយកអាជ្ញាធរជាតិព្រះវិហារឲ្យដឹងថា ជណ្ដើរបុរាណមុខនាគខាងជើងគោបុរៈទី៥នៃប្រាសាទព្រះវិហារ គិតមកដល់បច្ចុប្បន្ននេះ អ្នកជំនាញនៃអាជ្ញាធរជាតិព្រះវិហារ បានសិក្សាលម្អិតកំណត់រកផលប៉ះពាល់ ការខូចខាតបច្ចេកទេសសាងសង់របស់បុព្វបុរសខ្មែរសម័យបុរាណ និងធ្វើផែនទីហានិភ័យលើជណ្ដើរបុរាណមុខនាគជិតរួចរាល់ហើយ ។
រយៈពេលជាង១ឆ្នាំកន្លងទៅនេះសម្រេចបានប្រមាណ៨០% គិតចាប់តាំងពីថ្ងៃទី២៥ ខែកញ្ញា ឆ្នាំ២០១៨ រហូតមកដល់ខែតុលា ឆ្នាំ២០១៩នេះ ។ ការងារដែលនៅសេសសល់២០%ទៀតនឹងបញ្ចប់នៅចុងឆ្នាំនេះ ។ ក្រោយពេលបញ្ចប់ការសិក្សាលើផ្នែក នីមួយៗនៃជណ្ដើរបុរាណនេះ អាជ្ញាធរជាតិព្រះវិហារនឹងធ្វើសំណើទៅកាន់សហរដ្ឋអាមេរិកដែលជាម្ចាស់ជំនួយ ដើម្បីឈានទៅដល់ការជួសជុលជណ្ដើរនេះជាផ្លូវការនៅខែសីហាឆ្នាំ២០២០ ។
ការជួសជុលជណ្តើរនេះមិនមែនជួសជុលទាំងអស់នោះទេ គឺត្រូវជួសជុលចំណុចខូចខាតណាដែលចាំបាច់ងាយរងផលប៉ះពាល់ និងរក្សាឲ្យនៅភាពដើមដដែលចំពោះចំណុចជណ្តើរណាដែលនៅល្អ ដោយតាមការគោលការណ៍របស់អង្គការយូណេស្កូ ។ ជណ្តើរដែលរងការខូចខាតនេះភាគច្រើនដោយសារតែប្រព័ន្ធហូរច្រោះទឹកនៃជណ្តើរនេះត្រូវបានលុបដោយដី និងទឹកភ្លៀងហូរច្រោះជាច្រើនឆ្នាំ ធ្វើឲ្យហូរច្រោះដាច់បែកបាក់ថ្ម ។
គង់ ពុទ្ធិកា បញ្ជាក់ថា នៅពេលជណ្តើរបុរាណខាងជើងគោបុរៈទី៥ នៃប្រាសាទព្រះវិហារ បានជួសជុលឡើងវិញ មិនត្រឹមតែបានធ្វើឲ្យតម្លៃនៃសម្បត្តិបេតិកភណ្ឌពិភពលោកមួយនេះកាន់តែមានសោភ័ណភាពស្រស់ស្អាតប៉ុណ្ណោះទេ ថែមទាំងបញ្ចៀសបាននូវគ្រោះថ្នាក់ដល់ភ្ញៀវទេសចរជាតិ និងអន្តរជាតិ ឡើងចុះ លេងកម្សាន្តនៅក្នុងតំបន់រមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារមួយនេះ កាន់តែមានសុវត្ថិភាព ៕ (កែសម្រួលដោយ ៖ បុប្ផា)
ចែករំលែកព័តមាននេះ