តារា TikTok ល្បីបំផុតលើលោក ចាកចេញពីទឹក ដីសហរដ្ឋអាមេរិក បន្ទាប់ពីត្រូវឃុំខ្លួនដោយភ្នាក់ ងារអន្តោប្រវេសន៍
សហរដ្ឋអាមេរិក ៖ លោក Khaby Lame តារា TikTok ល្បីបំផុតលើពិភពលោក ដែលមានអ្នកតាមដានច្រើនជាង១៦០លាននាក់ ត្រូវបានរាយការណ៍ថា…
សហរដ្ឋអាមេរិក ៖ លោក Khaby Lame តារា TikTok ល្បីបំផុតលើពិភពលោក ដែលមានអ្នកតាមដានច្រើនជាង១៦០លាននាក់ ត្រូវបានរាយការណ៍ថា បានចាកចេញពីទឹកដីសហរដ្ឋអាមេរិកហើយ បន្ទាប់ពីត្រូវបានឃុំខ្លួនដោយទីភ្នាក់ងារអន្តោប្រវេសន៍នៅទីក្រុងឡាសវេហ្គាស (Las Vegas) ពីបទចោទថាបានស្នាក់នៅហួសសុពលភាពទិដ្ឋាការរបស់ខ្លួន។ នេះបើយោងតាមប្រភពពីទីភ្នាក់ងារសារព័ត៌មាន AP ចេញផ្សាយនៅពីថ្ងៃទី១១ ខែមិថុនា ឆ្នាំ២០២៥។
បើតាមអ្នកនាំពាក្យទីភ្នាក់ងារអនុវត្តច្បាប់អន្តោប្រវេសន៍ និងគយរបស់សហរដ្ឋអាមេរិក ហៅកាត់ថា ICE បានបញ្ជាក់ក្នុងសេចក្តីថ្លែងការណ៍មួយថា លោក Khaby Lame ជនជាតិសេណេហ្គាល់ សញ្ជាតិអ៊ីតាលី ដែលមានឈ្មោះពិតថា Seringe Khabane Lame ត្រូវបានឃុំខ្លួនកាលពីថ្ងៃសុក្រ នៅឯអាកាសយានដ្ឋានអន្តរជាតិ Harry Reid ប៉ុន្តែត្រូវបានអនុញ្ញាតឱ្យចាកចេញពីទឹកដីសហរដ្ឋអាមេរិកដោយគ្មានដីកានិរទេស។ អ្នកនាំពាក្យ ICE បានបញ្ជាក់ថា លោក Khaby Lame បានមកដល់សហ រដ្ឋអាមេរិកនៅថ្ងៃទី៣០ ខែមេសា ហើយបានស្នាក់នៅហួសសុពលភាពទិដ្ឋាការរបស់ខ្លួន។
សារព័ត៌មាន Associated Press (AP) បានផ្ញើសារស្នើសុំការអត្ថាធិប្បាយកាលពីថ្ងៃទី១០ ខែមិថុនា ទៅកាន់អ៊ីមែលរបស់លោក Khaby Lame ពាក់ព័ន្ធនឹងរឿងនេះ ប៉ុន្តែតារា TikTok ដ៏ល្បីបំផុតរូបនេះ មិនបានធ្វើអត្ថាធិប្បាយជាសាធារណៈអំពីការឃុំខ្លួននោះទេ។
ការឃុំខ្លួន Khaby Lame និងការចាកចេញដោយស្ម័គ្រចិត្តពីទឹកដីសហរដ្ឋអាមេរិក កើតឡើងចំពេលដែលប្រធានាធិបតីអាមេរិក លោក ដូណាល់ ត្រាំ (Donald Trump) មានការបង្ក្រាបកាន់តែខ្លាំងឡើងលើជនអន្តោប្រវេសន៍ រួមទាំងការឆ្មក់ចូលបង្ក្រាប់នៅក្នុងទីក្រុងឡូសអាន់ជ័រលេស (Los Angeles) កាលពីថ្មីៗនេះ ដែលបង្កឱ្យផ្ទុះការតវ៉ាជាច្រើនថ្ងៃប្រឆាំងនឹង ICE។
ការចាកចេញដោយស្ម័គ្រចិត្ត ដែលបានផ្តល់ឱ្យលោក Khaby Lame គឺជាការអនុញ្ញាតឱ្យបុគ្គលដែលប្រឈមមុខនឹងការចាកចេញពីទឹកដីសហរដ្ឋអាមេរិក ជៀសវាងការបញ្ជាឱ្យនិរទេសខ្លួននៅលើកំណត់ត្រាអន្តោប្រវេសន៍របស់ពួកគេ ដែលអាចរារាំងពួកគេពីការអនុញ្ញាតឱ្យវិលត្រឡប់មកសហរដ្ឋអាមេរិកវិញ រហូតដល់រយៈ១០ឆ្នាំ។
គួរបញ្ជាក់ជូនថា គិតត្រឹមថ្ងៃទី៧ ខែមិថុនា ឆ្នាំ២០២៥ លោក Khaby Lame កំពុងឈរជាបុគ្គលមានអ្នកតាមដាន (Follower) លើបណ្តាញសង្គម TikTok ច្រើនជាងគេបំផុតនៅលើពិភពលោក ពោល១៦២,២លាននាក់ តាមក្រោយដោយកញ្ញា Charli D’Amelio ដែលមានចំនួន១៥៦,៨លាននាក់៕
ចែករំលែកព័តមាននេះ