កីឡាការិនីលំដាប់ទី៧ពិភពលោកម៉ារីយ៉ា សារ៉ាប៉ូវ៉ាបានក្លាយជាម្ចាស់ពានកម្មវិធី Porsche Tennis Grand Prix ជាថ្មីម្តងទៀតបន្ទាប់ពីបានបំបាក់អតីតកីឡាការិនីលំដាប់ទី១ពិភពលោក នាងអាណា អុីវ៉ាណូវិច ក្នុងវគ្គផ្តាច់ព្រ័ត្រ កាលពីថ្ងៃអាទិត្យទី២៧មេសា ។ កម្មវិធីប្រកួតនេះត្រូវបានរៀបចំធ្វើនៅទីក្រុង Stuttgart ប្រទេសអាល្លឺម៉ង់ ។
កីឡាការិនីរុស្ស៊ីរូបនេះបានបំបាក់នាងអុីវ៉ាណូវិច សញ្ជាតិស៊ែប៊ី ក្នុងលទ្ធផល ៣-៦, ៦-៤និង៦-១ដណ្តើមបានពាន WTA លើកទី៣០ក្នុងអាជីព ។ ដោយឡែក សម្រាប់តែនៅអាល្លឺម៉ង់នេះវិញជាពានលើកទី៣ហើយ ។ គិតមកទល់នឹងពេលនេះ សារ៉ាប៉ូវ៉ា បានជួបប្រកួតជាមួយនាង អុីវ៉ាណូវិចចំនួន៩លើកហើយ ដោយក្នុងនោះនាងបានយកឈ្នះចំនួន៧លើក ។ ការជួបគ្នា៣លើកចុងក្រោយរវាងពួកគេគឺនៅលើតារាងដីក្រហមដូចជានៅអាល្លឺម៉ង់នេះ ។
នាងបានថ្លែងថា៖ «ការប្រកួតនៅថ្ងៃនេះជួបការលំបាកខ្លះៗដែរ ។ លទ្ធផលកន្លះសិតដំបូង ខ្ញុំគិតថា វាមិនមែនជារបស់ខ្ញុំនោះទេ ។ ទោះជាយ៉ាងណា បន្តិចក្រោយមក ខ្ញុំក៏អាចស្តារស្ថានការណ៍បាន ។ ខ្ញុំសប្បាយចិត្តខ្លាំងណាស់ដែលបានឈ្នះជើងឯកនេះជាថ្មីម្តងទៀត។ វាជាកម្មវិធីដ៏ល្អមួយដែលប្រមូលផ្តុំដោយកីឡាការិនីខ្លាំងៗ» ។ នាងបានបន្តថា៖ «អុីវ៉ាណូវិច ជាកីឡាការិនីជើងខ្លាំងមួយរូប ។ ដូច្នេះអំឡុងពេលប្រកួត ខ្ញុំចាំបាច់ត្រូវចេះប្រើឱកាស»។
ស្របពេលជាមួយគ្នានេះដែរ នៅទីក្រុងម៉ាឌ្រីដ ប្រទេសអេស្ប៉ាញ កីឡាករជប៉ុន Kei Nishikori បានយកឈ្នះពានជើងឯកកម្មវិធី Barcelona Open បន្ទាប់ពីបានបំបាក់កីឡាករកូឡុំប៊ី Santiago Giraldo នៅវគ្គផ្តាច់ព្រ័ត្រក្នុងលទ្ធផល២សិតទល់នឹងសូន្យ គឺ៦-២និង៦-២ ។ សម្រាប់ Nishikori នេះជាពានជើងឯកសមាគម ATP Tour លើកទី៥របស់គេហើយក្នុងអាជីពនិងជាពានលើតារាងដីក្រហមលើកដំបូង ។ គេបានថ្លែងថា៖ «ខ្ញុំពេញចិត្តមកប្រកួតនៅទីនេះ ។ វាជារឿងរីករាយ និងជាកិត្តិយសមួយផងដែរដែលដណ្តើមបានពាននៅទីនេះ» ៕
ចែករំលែកព័តមាននេះ