បច្ចុប្បន្ននេះ អ៊ីនធើណេតបានផ្តល់នូវឱកាសជាច្រើនក្នុងការរកលុយមិនថា អ្នកមានតែជំនាញ ឬចំណូលចិត្តណាមួយក៏ដោយ ។ វិស័យមួយដែលបើកឱកាសឲ្យមនុស្សជាច្រើន គឺវិស័យថែសម្រស់ និងតុបតែងមុខ បើទោះជាអ្នកមិនទទួលបានការហ្វឹកហាត់បែបជំនាញជាមុនក្តី ។ ដូច្នេះប្រសិនបើអ្នកជាមនុស្សដែលស្រលាញ់ផ្នែកនេះ និងមានការប្តេជ្ញាខ្ពស់អ្នកអាចសាកល្បងវិធីរកលុយខាងក្រោមនេះបាន ។
១. ការធ្វើជា Influencer ផ្នែកសម្រស់ ៖
ការមានវត្តមានច្រើនលើប្រព័ន្ធសង្គម គឺជាកត្តាដ៏សំខាន់មួយដែលជួយឲ្យអ្នករកលុយ ។ ប្រសិន បើអ្នកចេះបង្កើតប្រេនសម្រាប់ឈ្មោះខ្លួនឯងនោះ អ្នកអាចទទួលបានការគាំទ្រពីមនុស្សជាច្រើន ។ ជាលទ្ធផលក្រុមហ៊ុននានានឹងទាក់ទងអ្នកឲ្យជួយផ្សព្វផ្សាយផលិតផលឲ្យពួកគេ និងបង់ថ្លៃឲ្យអ្នកជួយសាកល្បងផលិតផលពួកគេជាដើម ។ ប្រាកដណាស់ ការធ្វើជា Influencer មិនមែនមានន័យថា អ្នកត្រូវតែមានសម្រស់ស្អាតទេ ។ ប្រសិនបើអ្វីដែលអ្នកចែករំលែកគួរឲ្យចាប់អារម្មណ៍ និងអាចជួយអ្នកដទៃបាននោះ អ្នកនឹងទទួលបានអ្នកគាំទ្រដោយឯកឯង ។
២. ធ្វើជាអ្នកជំនាញផ្នែកតុបតែងមុខ៖
ប្រសិន បើអ្នកពិតជាមានចំណាប់អារម្មណ៍ចង់មានអាជីពក្នុងវិស័យនេះពិតមែន ការងារជាអ្នកតុបតែងមុខអាចបើកផ្លូវឲ្យអ្នកច្រើន ដើម្បីរកប្រាក់ចំណូល និងយកបទពិសោធន៍កាន់តែច្រើនក្នុងវិស័យ ។ លើសពីនេះទៅទៀតពេលដែលអ្នកទទួលបានការទទួលស្គាល់ និងគាំទ្រច្រើនហើយ អ្នកក៏អាចក្លាយជាគ្រូបង្រៀនផាត់មុខផងដែរ ។
៣. លក់ ឬធ្វើជាអ្នកចែកចាយគ្រឿងសម្អាង ៖
ក្នុងករណីដែលអ្នកមិនចង់មានអាជីពក្នុងវិស័យនេះ និងគ្រាន់តែចង់បង្កើនប្រាក់ចំណូលខណៈដែលប្រកបការងារប្រចាំថ្ងៃទេនោះ អ្នកអាចពិចារណាលើការលក់ ឬធ្វើជាអ្នកចែកចាយគ្រឿងសម្អាងបាន ។ ទោះជាមានអ្នកលក់ជាច្រើនបានចូលក្នុងទីផ្សារនេះពិតមែនក្តី ក៏តម្រូវការសម្រាប់ផលិតផលថែរក្សាសម្រស់ និងតុបតែងមុខដែលមានគុណភាពល្អនៅតែមានខ្ពស់ដែរ ។ តែប្រសិនបើអ្នកមិនចង់វិនិយោគច្រើនទេនោះ អ្នកអាចទាក់ទងទៅកាន់ក្រុមហ៊ុនចែកចាយ ឬក្រុមហ៊ុនលក់ផ្ទាល់ និងធ្វើជាអ្នកចែកចាយបន្តបានរួចរកកម្រៃបន្ថែមពីការលក់បន្ត ៕ កែសម្រួលដោយ ៖ សុឃាក់
ចែករំលែកព័តមាននេះ