ក្រុងប៊ុយដាប៉ែស-ហុងគ្រី ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញប្រារព្ធពិធីបើកកិច្ចប្រជុំកំពូលស្ដីពីទឹកលើកទី៣ ក្រោមប្រធានបទ«ការទប់ស្កាត់វិបត្តិទឹក» កាលពីព្រឹកថ្ងៃទី១៥ ខែតុលា…
ក្រុងប៊ុយដាប៉ែស-ហុងគ្រី ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញប្រារព្ធពិធីបើកកិច្ចប្រជុំកំពូលស្ដីពីទឹកលើកទី៣ ក្រោមប្រធានបទ«ការទប់ស្កាត់វិបត្តិទឹក» កាលពីព្រឹកថ្ងៃទី១៥ ខែតុលា ឆ្នាំ២០១៩ នៅឧទ្យាន Millenaris ក្រុងទីក្រុងប៊ុយដាប៉ែស ប្រទេសហុងគ្រី ។
ក្នុងសុន្ទរថា សម្តេចតេជោនាយករដ្ឋមន្ត្រីបានបញ្ជាក់ថា សម្រាប់ទិសដៅខាងមុខ ដើម្បីដោះស្រាយនូវបញ្ហាប្រឈមទាំងនេះក៏ដូចជាហានិភ័យពាក់ព័ន្ធផ្សេងទៀតឲ្យបានគ្រប់ជ្រុងជ្រោយ និងមានប្រសិទ្ធភាព ជាពិសេសក្រោមក្របខណ្ឌគោលដៅអភិវឌ្ឍន៍ប្រកបដោយចីរភាពឆ្នាំ២០៣០សំដៅធានានិរន្តរភាពនៃការប្រើប្រាស់ធនធាន ទឹកប្រកបដោយភាពឈ្លាសវៃសម្រាប់យើងទាំងអស់គ្នា ក៏ដូចជាសម្រាប់មនុស្សជំនាន់ក្រោយៗ និងដោយគ្មានជម្លោះរវាងប្រទេសនិងប្រទេសជាយថាហេតុ សម្ដេចតេជោបានគូសរំលេចនូវអាទិភាពមួយចំនួន ពាក់ព័ន្ធអភិក្រមនៃការគ្រប់គ្រងអភិបាលកិច្ច និងការធ្វើហិរញ្ញប្បទានដូចខាង
ក្រោម ៖
ទី១-បន្តផ្ដួចផ្ដើមបង្កើតនិម្មាបនកម្មនយោបាយសកលលោកថ្មីមួយ សម្រាប់គ្រប់គ្រងធនធានទឹក ដើម្បីកៀរគរការគាំទ្រពីសំណាក់ភាគីពាក់ព័ន្ធទាំងអស់ បណ្ដុះស្មារតីសន្សំសំចៃទឹក ក៏ដូចជាជៀសវាងសកម្មភាពបំពុលប្រភពទឹក កសាងអភិបាលកិច្ចស្ថាប័ននិងគោលនយោបាយទឹកមួយដែលរឹងមាំ ស្រុះស្រួលគ្នា និងមានតម្លាភាព ។
ទី២-ពង្រឹងកិច្ចសម្របសម្រួលកិច្ចសហប្រតិបត្តិការនិងគណនេយ្យភាពស្ដីពីទឹកក្រោមក្របខណ្ឌសាកលលោក ពោលគឺអង្គការសហប្រជាជាតិ ដែលជាអ្នកត្រួសត្រាយផ្លូវដ៏មានប្រសិទ្ធភាពក្នុងការដោះស្រាយបញ្ហាសកល និងក្នុងការអនុវត្តរបៀបវារៈសកលឆ្នាំ២០៣០ ក៏ដូចជាកិច្ចព្រមព្រៀងទីក្រុងប៉ារីស ។
ទី៣-ពង្រឹងកិច្ចសម្របសម្រួលនិងកិច្ចសហប្រតិបត្តិការទាំងកម្រិតបច្ចេកទេស និងគោលនយោបាយស្ដីពីទឹក ថាមពល ការប្រែប្រួលអាកាសធាតុ ស្បៀង សុខភាព និងការអភិរក្សចម្រុះសំដៅលើកកម្ពស់និងពង្រឹងអភិបាលកិច្ចសម្រាប់ធនធានទឹក និងការគ្រប់គ្រងធនធានទឹករួមគ្នា តាមរយៈកិច្ចសម្របសម្រួលអន្តរវិស័យរវាងក្រសួង និងស្ថាប័នរដ្ឋគ្រប់ជាន់ថ្នាក់ ព្រមទាំងតួ អង្គពាក់ព័ន្ធទាំងអស់ រួមទាំងអ្នកប្រើប្រាស់ទឹកផងដែរ ។
ទី៤-បង្កើនការប្ដេជ្ញាចិត្តក្នុងកម្រិតថ្នាក់ជាតិដើម្បីលុបបំបាត់ទីបំពុលប្រភពទឹក ដោយបង្កើនសមត្ថភាពប្រព្រឹត្តិកម្មទឹកកខ្វក់ សមត្ថភាពស្តុកទុកទឹកដែលត្រូវបានបំពុល និងពង្រឹងយន្តការទប់ស្កាត់ប្រភពនៃការបំពុលទឹកគ្រប់ទម្រង់ ។
ទី៥-បង្កើនភាពប្រទាក់ក្រឡាគ្នារវាងគោលនយោបាយពាក់ព័ន្ធនឹងទឹក តាមរយៈភាពពង្រឹងការរៀបចំយន្តការ ស្ថាប័ន ការរឹតបន្តឹងក្របខណ្ឌគតិយុត្តនិងច្បាប់ ។
ទី៦-លើកទឹកចិត្តដល់ការបង្កើតវិធីសាស្ត្រថ្មីដោយមានការវាយតម្លៃពីការបែងចែកផលប្រយោជន៍ពីទឹក និងការទទួលខុសត្រូវលើការថែទាំប្រភពទឹក ក៏ដូចជាការរៀបចំផែនការនិងប្រតិបត្តិការកសាងហេដ្ឋារចនាសម្ព័ន្ធទឹកឆ្លងដែនសំដៅទប់ស្កាត់ជម្លោះជាយថាហេតុ និងធានានិរន្តរភាពនៃការប្រើប្រាស់ប្រភពទឹករួមគ្នា ។
ទី៧-បង្កើនការវិនិយោគសាធារណៈសម្រាប់ការគ្រប់គ្រងទឹកនិងការប្រើប្រាស់ទឹកស្អាត និង អនាម័យ ឲ្យស្របទៅនឹងទិសដៅដែលបានកំណត់ក្នុងគោលដៅអភិវឌ្ឍន៍ប្រកបដោយចីរភាព ។
ទី៨-ចូលរួមរៀបចំបរិស្ថានគាំទ្រដល់គំរូធុរកិច្ចបង្កើតថ្មី ដែលផ្ដល់ការលើកទឹកចិត្តដល់ចីរភាពហិរញ្ញវត្ថុក្នុងការផ្ដល់សេវាទឹកស្អាត ដោយធានានូវការទទួលបានទឹកស្អាតក្នុងតម្លៃសមរម្យជាមួយស្តង់ដារអនាម័យខ្ពស់ ស្របគ្នានឹងការការពារ ព្រមទាំងការធ្វើឱ្យប្រព័ន្ធអេកូឡូសុីផ្អែកលើទឹកនិងដីមានចីរភាព ។
ទី៩-ពង្រឹងសមត្ថភាពតាមដានត្រួតពិនិត្យចំណុចដៅពាក់ព័ន្ធនឹងទឹក នៅក្រោមក្របខ័ណ្ឌគោលដៅអភិវឌ្ឍន៍ប្រកបដោយចីរភាព ព្រមទាំងលើកទឹកចិត្តដល់កិច្ចខិតខំប្រឹងប្រែងសម្រាប់ការប្រមូលទិន្នន័យ និងវិភាគពាក់ព័ន្ធនឹងទឹកនៅគ្រប់កម្រិត ជាមួយនឹងការប្ដេជ្ញាចិត្តក្នុងការគាំទ្រផ្នែកនយោបាយនិងហិរញ្ញវត្ថុ ។
ជាមួយគ្នានេះ សម្ដេចតេជោនាយករដ្ឋមន្ត្រីបានជម្រាបជូនកិច្ចប្រជុំកំពូលថា កម្ពុជាមានការប្ដេជ្ញាខ្ពស់ក្នុងការចូលរួមការពារនិងទប់ស្កាត់វិបត្តិទឹក តាមរយៈការអនុវត្តផែនការយុទ្ធសាស្ត្រនិងសកម្មភាពសំខាន់ៗដូចខាងក្រោម ៖
ទី១-បន្តពង្រឹងការអនុវត្តច្បាប់ លិខិតបទដ្ឋានគតិយុត្ត គោលនយោបាយ ផែនការមេស្ដីពីការគ្រប់គ្រងធនធានទឹកឲ្យកាន់តែមានប្រសិទ្ធភាពខ្ពស់ ។
ទី២-បង្កើតនិងពង្រឹងយន្តការគ្រប់គ្រងធនធានទឹកតាមអាងទន្លេ ស្ទឹង ទាំងថ្នាក់ជាតិនិងថ្នាក់ក្រោមជាតិ ដោយរៀបចំនិងអនុវត្តផែនការគ្រប់គ្រងធនធានទឹក និងអាងទន្លេរួមមាន ការគ្រប់គ្រងធនធានទឹកបម្រើឱ្យគ្រប់វិស័យពាក់ព័ន្ធប្រកបដោយតុល្យភាពនិងសមធម៌ ការរៀបចំផែនទីស្ដីពីជំនន់និងទឹកក្រោមដី ការសាងសង់អាងស្តុកទឹក ទំនប់ការពារទឹកជំនន់ ការពារទឹកប្រៃ ប្រព័ន្ធដោះទឹក និងឈានជាបណ្ដើរៗក្នុងការធ្វើទំនើបកម្មគ្រប់ជ្រុងជ្រោយ ។
ទី៣-កសាងមូលដ្ឋានបច្ចេកទេស ធនធានមនុស្ស និងឈានទៅបង្កើតមជ្ឈមណ្ឌលគ្រប់គ្រងទិន្នន័យដែលប្រមូលផ្ដុំទាំងទឹកទាំងអាកាសធាតុ ដើម្បីវិភាគ ធ្វើអាជីវកម្ម និងផ្សព្វផ្សាយបម្រើដល់គ្រប់វិស័យពាក់ព័ន្ធទាំងកម្រិតជាតិនិងអន្តរជាតិ ជាពិសេសបម្រើការគ្រប់គ្រងនិងការអភិវឌ្ឍធនធានទឹក ការបន្តវាយតម្លៃសក្តានុពលធនធានទឹក និងតម្រូវការទឹកទាំងបរិមាណនិងគុណភាពដើម្បីឆ្លើយតបទៅនឹងការអភិវឌ្ឍ ។
ទី៤- ជំរុញនិងលើកទឹកចិត្តដល់វិស័យឯកជនឱ្យចូលរួមក្នុងការអភិវឌ្ឍវិស័យធនធានទឹកព្រមទាំងបង្កើនថវិកាជាតិ និងកៀរគរជំនួយពីស្ថាប័នហិរញ្ញវត្ថុអន្តរជាតិ និងប្រទេសជាដៃគូ ដើម្បីអភិវឌ្ឍន៍វិស័យធនធានទឹក ធានាដល់តម្រូវការទឹកក្នុងគ្រប់វិស័យពាក់ព័ន្ធប្រកបដោយប្រសិទ្ធភាពនិងចីរភាព ៕
ចែករំលែកព័តមាននេះ