រាជធានីភ្នំពេញ ៖ សាលាដំបូងរាជធានីភ្នំពេញ បានប្រកាសថានឹងបន្តបើកសវនាការនៅថ្ងៃទី៦ ឧសភា បន្ទាប់ពីការបើកសវនាការតាមការគ្រោងទុកនៅថ្ងៃទី២៥ មេសា ដែលតុលាការបានលើកយកសំណុំរឿងកាប់បំផ្លិចបំផ្លាញទ្រព្យសម្បត្តិសាធារណៈនិងទ្រព្យសម្បត្តិរោងចក្រកាត់ដេរមួយចំនួនមកបើកសវនាការដោយបានធ្វើឡើងបែងចែកដាច់ពីគ្នាបីបន្ទប់សវនាការ ។ បន្ទប់ទី១ មានជនជាប់ចោទ១០នាក់ រួមទាំងលោក វន់ ពៅ ។ បន្ទប់ទី២ មានជនជាប់ចោទចំនួន១៣នាក់ និងបន្ទប់ទី៣មានជនជាប់ចោទចំនួន២នាក់ (២នាក់នៅក្រៅឃុំរួចហើយ ។
ជនជាប់ចោទត្រូវបាននាំមកសវនាការទាំងអស់និងមានមេធាវីការពារពួកគាត់រៀងៗខ្លួន ហើយសវនាការបានធ្វើឡើងក្រោមការឃ្លាំមើលពីបណ្ដាមន្ត្រី អ្នកការទូត និងអង្គការការពារសិទ្ធិមនុស្សព្រមទាំងសង្គមសីុវិលជាច្រើន ។ លោក កែវ មុនី ចៅក្រមសាលាដំបូងរាជធានីភ្នំពេញដែលទទួលខុសត្រូវបន្ទប់សវនាការទី១បានថ្លែងថា ក្នុងបន្ទប់សវនាការទី១មានវត្តមានជនជាប់ចោទចំនួន១០នាក់ រួមទាំងវត្តមានលោក វន់ ពៅ ដែលជាប្រធានសហជីពសេដ្ឋកិច្ចក្រៅប្រព័ន្ធ ។ ជនជាប់ចោទត្រូវបានប្រើប្រាស់សិទ្ធិរបស់ពួកគេក្នុងការឆ្លើយសំណួរឬមិនឆ្លើយសំណួរដែលបានសាកសួរដោយចៅក្រមនិងព្រះរាជអាជ្ញានូវអ្វីដែលពួកគេបានដឹង ។ ក្នុងពេលសវនាការមានការសាកសួរដេញដោលខ្លាំងពីសំណាក់ចៅក្រម និងព្រះរាជអាជ្ញាទៅលើជនជាប់ចោទ ហើយមានតែជនជាប់ចោទ៤នាក់ក្នុងចំណោម១០នាក់បានសាកសួររួច ។ ចំណែក៦នាក់ទៀតរាប់ទាំងលោក វន់ ពៅ នៅមិនទាន់បានសាកសួរ ។
ក្នុងបន្ទប់សវនាការទី១ មានជនជាប់ចោទ១-ឈ្មោះ វន់ ពៅ ភេទប្រុស អាយុ៣៦ឆ្នាំ ២-ឈ្មោះ យ៉ុង សំអន ភេទប្រុស អាយុ២៤ឆ្នាំ ៣-ឈ្មោះ ណាគ្រី វណ្ណដា ភេទប្រុស អាយុ២៤ឆ្នាំ ៤-ឈ្មោះចាន់ ពុទ្ធិសក្តិ ៥-ឈ្មោះ ឈឹម ធឿន ភេទប្រុស អាយុ២៧ឆ្នាំ ៦-ឈ្មោះតេង ចន្ធី ៧-ឈ្មោះរ៉េត រដ្ឋា ៨-ឈ្មោះលន សាន ៩-ឈ្មោះសុគន្ធ សម្បត្តិពិសិដ្ឋ និង១០-ឈ្មោះខេង សារឿន ។ ជនជាប់ចោទ ជាកម្មករធ្វើការនៅរោងចក្រយ៉ាកជីង និងខ្លះទៀតមិនមែនជាកម្មករទេ តែនៅថ្ងៃទី២ មករា ២០១៤ ពួកគាត់បានចូលរួមជាមួយក្រុមអ្នកតវ៉ាទាំងនោះដែរ ។
លោកព្រះរាជអាជ្ញារង លី សុផាន់ណា ថ្លែងថា ជនជាប់ចោទឈ្មោះ ឈឹម ធឿន ត្រូវបានសាលាដំបូងចោទពីបទ«ហិង្សា និងបង្កឱ្យមានការខូចខាតដោយចេតនា» ។ សាលាដំបូងចោទប្រកាន់ពួកគាត់ពីការប្រើហិង្សា និងបំផ្លិចបំផ្លាញទ្រព្យសម្បត្តិ ។ ក្នុងករណីនេះមានដើមបណ្តឹងចំនួន៤នាក់បានប្តឹងពួកគេមកសាលាដំបូង ។ ក្នុងករណីនេះសាលាដំបូងបានបញ្ជាក់ថា នៅដើមខែមករា ឆ្នាំ២០១៤ មានសំណុំរឿងអំពើហិង្សាដែលបានកើតឡើងគឺ ១-សំណុំរឿងនៅរោងចក្រយា៉កជីង មានជនជាប់ចោទចំនួន១០នាក់ រួមទាំងលោក វន់ ពៅ ។ សំណុំរឿងទី២ នៅផ្លូវវ៉េងស្រេង១៣នាក់ និងសំណុំរឿងនៅគល់ស្ពានស្ទឹងមានជ័យ មានជនជាប់ចោទចំនួន២នាក់។ លោកវរសេនីយ៍ទោ ជូ អេង មន្ត្រីយោធា កងពលតូចលេខ៩១១ថ្លែងថា ក្រោយពីបានទទួលបញ្ជាពីមេបញ្ជាការលោកក៏បានដឹកនាំកម្លាំងចំនួន៣០នាក់មកអន្តរាគមន៍នៅរោងចក្រយា៉កជីង និងបានឃើញមានក្រុមបាតុកររុញរបងរោងចក្រយា៉កជីង ។ ពេលនោះលោកបានបញ្ជាឱ្យឃាត់ខ្លួនមនុស្សចំនួនបីនាក់ជាបន្ទាន់នៅព្រឹកថ្ងៃទី២ ខែមករា ឆ្នាំ២០១៤ ។ ក្រោយពេលចាប់ពួកគេភ្លាម ក្រុមបាតុករបានគប់ដុំថ្មលើសមត្ថកិច្ចបណ្តាលឱ្យមានអ្នករងរបួសមួយចំនួន ដោយសារក្រុមបាតុករបានប្រើប្រាស់ដំបងដែក និងចំពាមកៅស៊ូ ។
ការបើកសវនាការជំនុំជម្រះសំណុំរឿងក្តីប៉ះ ទង្គិចគ្នារវាងក្រុមកុបករជាមួយកងកម្លាំងសមត្ថកិច្ចនៅខាងមុខរោងចក្រយ៉ាកជីង ជិតតំបន់សេដ្ឋកិច្ចពិសេសកំបូលកាលពីថ្ងៃទី២ មករា ២០១៤ និងនៅជិតសួនឧស្សាហកម្មកាណាឌីយ៉ា តាមបណ្តោយផ្លូវវ៉េងស្រេងនៅក្នុងសង្កាត់ចោមចៅ ខណ្ឌពោធិ៍សែនជ័យ កាលពីថ្ងៃទី៣ មករា ២០១៤ ដែលបណ្តាលឱ្យមានមនុស្សស្លាប់ និងរបួសមួយចំនួន រួមទាំងករណីប៉ះទង្គិចគ្នារវាងកម្មកររោងចក្រ SL ជាមួយសមត្ថកិច្ចនៅមុខវត្តស្ទឹងមានជ័យ នៅក្នុងសង្កាត់ស្ទឹងមានជ័យ ខណ្ឌមានជ័យ កាលពីថ្ងៃទី២២ វិច្ឆិកា ២០១៣ មានជនសង្ស័យចំនួន២៥នាក់ត្រូវបានជំនុំជម្រះ ។សវនាការនេះត្រូវបានជំនុំជម្រះដាច់ដោយឡែកពីគ្នា ដោយមានសវនាការចំនួន៣ ក្នុងពេលតែមួយ ។ ក្នុងនោះសំណុំរឿងក្តីប៉ះទង្គិចគ្នារវាងក្រុមកុបករជាមួយកងកម្លាំងសមត្ថកិច្ចនៅខាងមុខរោងចក្រយ៉ាកជីង ជិតតំបន់សេដ្ឋកិច្ចពិសេសកំបូលមានជនសង្ស័យចំនួន១០នាក់ ក្នុងនោះរួមមានឈ្មោះវន់ ពៅ និងចាន់ ពុទ្ធិសក្តិ ត្រូវបានជំនុំជម្រះដោយលោកចៅក្រម កែវ មុនី និងតំណាងអយ្យការ២រូប គឺលោកលី សុផាន់ណា និងលោកហោ លីណា ។
សំណុំរឿងប៉ះទង្គិចគ្នានៅជិតសួនឧស្សាហកម្មកាណាឌីយ៉ា តាមបណ្តោយផ្លូវវ៉េងស្រេង មានជនសង្ស័យចំនួន១៣នាក់ត្រូវបានជំនុំជម្រះដោយលោកចៅក្រមលាង សំណាត់ និងតំណាងអយ្យការកញ្ញា វ៉ា សក្តា ព្រះរាជអាជ្ញារងអមសាលាដំបូងរាជធានីភ្នំពេញ ។ ចំណែកសំណុំរឿងប៉ះទង្គិចគ្នា ដែលមានជនសង្ស័យចំនួន២នាក់នៅមុខវត្ដស្ទឹងមានជ័យ ត្រូវបានជំនុំជម្រះដោយលោកចៅក្រម សួស សំអាត និងតំណាងអយ្យការ លោក សៀង សុខ ។
គួររំលឹកថា កាលពីថ្ងៃទី២ មករា មានការប៉ះទង្គិចគ្នារវាងក្រុមបាតុករដែលដឹកនាំដោយលោក វន់ ពៅ ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធជាមួយកម្លាំងអាជ្ញាធរមានសមត្ថកិច្ច នៅមុខរោងចក្រយ៉ាកជីន ជិតតំបន់សេដ្ឋកិច្ចពិសេសកំបូល បង្កឱ្យមានការប្រើហិង្សា និងចាប់ខ្លួនមនុស្ស១០នាក់ ។ នៅថ្ងៃទី៣ មករា ក៏មានការប៉ះទង្គិចគ្នារវាងក្រុមបាតុករជាមួយកម្លាំងអាជ្ញាធរមានសមត្ថកិច្ចនៅផ្លូវវេ៉ងស្រេងជិតសួនឧស្សាហកម្មកាណាឌីយ៉ា បណ្ដាលឱ្យមានអ្នកស្លាប់និងរបួស ហើយមនុស្ស១៣នាក់ត្រូវបានចាប់ខ្លួន ។
ក្នុងពេលតុលាការកំពុងបើកសវនាការជំនុំជម្រះ នៅខាងក្រៅបរិវេណសាលាដំបូងឯណោះវិញ អាជ្ញាធរមានសមត្ថកិច្ចបានបិទផ្លូវព្រះមុនីរ៉េតមុខសាលាដំបូងរាជធានីភ្នំពេញ ខាងលិចរង្វង់មូលអាងទឹកពហុកីឡដ្ឋានជាតិអូឡាំពិក រហូតដល់រង្វង់មូលនាងគង្ហីង ផ្សារអូរឫស្សី សង្កាត់វាលវល់ខណ្ឌ៧មករា ដោយមានដាក់របាំងដែកកាត់ទទឹងផ្លូវមិនអនុញ្ញាតឱ្យអ្នកដំណើរឆ្លងកាត់បានឡើយ ហើយក៏ធ្វើឱ្យហាងអាជីវកម្មនានាតាមបណ្តោយផ្លូវនេះត្រូវផ្អាកសកម្មភាព ។
ជាមួយគ្នានេះ ផ្លូវតូចធំជុំវិញបរិវេណសាលាដំបូងត្រូវបានបិទដើម្បីការពារអង្គសវនាការនឹងរក្សាការស្ងៀមស្ងាត់ នៅពេលអង្គជំនុំជម្រះដំណើរការ ។ ទោះជាយ៉ាងណា ក៏មានការអុកឡុកពីសំណាក់ក្រុមអ្នកសហគមន៍បឹងកក់ ដែលមានអ្នកស្រីយ៉ោម បុប្ផា ដឹកនាំ និងក្រុមសហគមន៍បុរីកីឡាសរុបប្រមាណ៤០០នាក់ ក្នុងនោះក៏មានក្រុមអ្នករត់រ៉ឺម៉កម៉ូតូដែលគាំទ្រលោកវន់ ពៅ ផងដែរ និងព្រះសង្ឃប្រមាណ១០អង្គ ។ ក្រុមអ្នកគាំទ្រទាំងអស់នោះមិនត្រូវបានអនុញ្ញាតឱ្យទៅរំខាននៅមុខសាលាដំបូងទេ ដោយ សមត្ថកិច្ចបានឃាត់ឱ្យនៅត្រឹមបារាសរង្វង់មូលនាងគង្ហីង និងរង្វង់មូលអាងទឹកអូឡាំពិកខាងក្រោយបរិវេណតុលាការ។ ក្រុមអ្នកគាំទ្របានលើកបដាជាច្រើនផ្ទាំងបង្ហាញ ដែលមានពាក្យថា សុំឱ្យតុលាការដោះលែងមនុស្សទាំង២១នាក់ឱ្យមានសេរីភាពវិញទៅ ។ ពួកអ្នកគាំទ្រក៏បានទូងស្គរប្រគំលាន់ទ្រហឹងនៅត្រង់រង្វង់មូលនាងគង្ហីងផងដែរ ។
នៅម៉ោងប្រមាណ៩ព្រឹក គេបានសង្កេតឃើញវត្តមានលោកស្រីមូរ សុខហួរ បានទៅដល់ទីនោះដែរ ។ លោកស្រីតំណាងរាស្ត្របក្សប្រឆាំងរូបនេះ មិនត្រូវបានសមត្ថកិច្ចអនុញ្ញាតឱ្យចូលទៅ ក្នុងសាលាដំបូងទេ ។ លោកស្រីបានដើរក្រវែលច្រើនជុំរួចក៏ចេញទៅបាត់ ។ នៅម៉ោងប្រមាណ១០ព្រឹក ក្រុមអ្នកគាំទ្រដែលមានអ្នកស្រី យ៉ោម បុប្ផា អ្នកនាំមុខបានបុកទម្លុះបារាសសមត្ថកិច្ចចង់ទៅឈរពីមុខអគារសាលាដំបូងមានគ្នាប្រមាណ៤ទៅ១០នាក់ តែត្រូវបានសមត្ថកិច្ចរុញច្រានឱ្យចាកចេញទៅវិញ ។ ពេលនោះមានអ្នកបឹងកក់ខ្លះ ត្រូវសមត្ថកិច្ចចាប់សែងយកចេញមកវិញដែលពួកគេបានក្រាញននៀល ក្នុងនោះមានអ្នកស្រី យ៉ោម បុប្ផា និងស្ត្រីចំណាស់ម្នាក់ដែលពូកែននៀលឱ្យគេសែង ៕
ចែករំលែកព័តមាននេះ