តើអ្នកអាចយកក្តីស្រលាញ់នឹងការថតរូបធ្វើជាប្រភពចំណូលបានទេ? វិស័យថតរូបជាទីផ្សារតូចចង្អៀតមួយ ប៉ុន្តែប្រសិនបើអ្នកមានការប្តេជ្ញាខ្ពស់ អ្នកអាចជោគជ័យបាន ជាពិសេសប្រសិនបើអ្នកចេះប្រើប្រព័ន្ធសង្គម ។
បច្ចុប្បន្ននេះ អ្នកមានជំនាញថតរូបមានភាពងាយស្រួលកាន់តែខ្លាំងក្នុងការផ្សព្វផ្សាយពីរូបថតរបស់ខ្លួន និងទាក់ទាញអតិថិជនតាមប្រព័ន្ធសង្គម ។ ហើយខាងក្រោមនេះគឺជាវិធីមួយចំនួនដែលអាចជួយឲ្យអ្នករកលុយបានប្រសិនបើអ្នកស្រលាញ់ និងមានជំនាញផ្នែកថតរូប៖
១. ថតរូបឲ្យអាជីវកម្មតូចៗ៖
ប្រទេសកម្ពុជាមានអាជីវកម្មតូចៗជាច្រើនដែលកំពុងប្រកួតប្រែងគ្នាលើប្រព័ន្ធសង្គម ។ ដោយហេតុដូចនេះភាពទាក់ទាញ គឺពិតជាសំខាន់ណាស់ដែលធ្វើឲ្យអាជីវករងាកទៅកាន់អ្នកថតរូបជំនាញដើម្បីទទួលបានរូបថតស្អាតៗបង្ហាញពីផលិតផលរបស់ពួកគេ ។ សាកល្បងដើរមើលអាជីវកម្មដែលអ្នកគិតថាមានចំណាប់អារម្មណ៍ក្នុងការផ្សព្វផ្សាយ និងណែនាំខ្លួនរួចបង្ហាញពីរូបភាពដែលអ្នកបានថតជាដើម ។ វិធីមួយទៀតគឺអ្នកអាចទាក់ទងអាជីវករលក់អនឡាញបានប្រព័ន្ធសង្គមបានដែរ និងចរចាតម្លៃ ។
២. លក់រូបភាព៖
នរណាក៏ចូលចិត្តរូបភាពស្អាតៗដែរ ហើយរូបភាពដែលអ្នកថតនៅជុំវិញផ្ទះរបស់អ្នក ឬកន្លែងធ្វើការរបស់អ្នកអាចមានទីផ្សារជាពិសេសក្នុងពេលដែលបញ្ហាកម្មសិទ្ធិបញ្ញាកំពុងតែត្រូវបានផ្តោតសំខាន់ ក្រុមហ៊ុនជាច្រើនមិនអាចលួចរូបភាពពីគេហទំព័រដទៃបានទៀតឡើយ ។
ដូច្នេះអ្នកអាចដើរថតរូបភាពជុំវិញទីក្រុង ឬក្នុងប្រទេសរួចបង្ហោះរូបមួយចំនួនលើប្រព័ន្ធសង្គមរបស់អ្នកព្រមទាំងភ្ជាប់លេខទូរស័ព្ទបាន ។ ប្រសិនបើមានអ្នកដែលចាប់អារម្មណ៍ ពួកគេនឹងទាក់ទងអ្នក ហើយអ្នកអាចលក់រូបភាពបានដោយងាយ ។
៣. ដើរថតរូបឲ្យអ្នកមានវត្តមានលើប្រព័ន្ធសង្គម៖
ក្រៅពីអាជីវករហើយ អ្នកដែលល្បីៗលើប្រព័ន្ធសង្គមក៏មានចំណាប់អារម្មណ៍ក្នុងការមានរូបភាពស្អាតៗសម្រាប់បង្ហោះដើម្បីទាក់ទាញអ្នកគាំទ្រដែរ ។ លើសពីនេះទៅទៀត ការចាប់ដៃគូជាមួយពួកគេអាចបង្កើនឱកាសការងារអ្នកតាមរយៈការណែនាំទៀតផងប្រសិនបើអ្នកពិតជាមានសមត្ថភាពខ្ពស់ពិតមែន ៕ កែសម្រួលដោយ ៖ សុឃាក់
ចែករំលែកព័តមាននេះ