ខេត្តកណ្តាល ៖ ចម្ការដើមប្រេងខ្យល់រួមជាមួយនឹងផ្ទៃដីព្រៃសរុបជិត២០ហិកតាដែលគេតែងតែហៅថា ចម្ការបារាំងមានទីតាំងស្ថិតនៅក្នុងភូមិចំនួន៤ គឺភូមិក្រាំងក្រូច ភូមិអង្គស្រែពោធិ៍ ភូមិព្រៃទទឹង និងភូមិគោល ឃុំទួួលព្រិច ស្រុកអង្គស្នួល ត្រូវបានភ្លើងឆេះយ៉ាងសន្ធោសន្ធៅបង្កឱ្យមានការភ្ញាក់ផ្អើលកាលពីវេលាម៉ោង១និង១៥នាទីថ្ងៃទី២៥ មេសា និងស្ទើរតែឆេះរាលដាលដល់លំនៅឋានរបស់ប្រជាពលរដ្ឋដែលមានទីតាំងស្ថិតនៅជិតៗនោះថែមទៀតផង។
តាមប្រភពព័ត៌មានពីសមត្ថកិច្ចប៉ូលិសមូលដ្ឋានឱ្យដឹងថា នៅវេលាកើតហេតុនោះប្រជាពលរដ្ឋរាយការណ៍មកថា មានភ្លើងឆេះចម្ការដើមប្រេងខ្យល់ និងព្រៃរបោះនៅត្រង់ចំណុចចម្ការបារាំង ។ ប្រជាពលរដ្ឋបានសម្តែងនូវការភ័យខ្លាចភ្លើងឆេះរាលដាលដល់លំនៅឋានរបស់ពួកគាត់ដែលមានទីតាំងនៅក្បែរៗនោះថែមទៀតផង និងបានសុំឱ្យសមត្ថកិច្ចជួយអន្តរាគមន៍។ ភ្លាមៗនោះកម្លាំងប៉ូលិសស្រុកអង្គស្នួលបានចេញទៅដោយនាំយករថយន្តពន្លត់អគ្គិភ័យចំនួន២គ្រឿងទៅជាមួយដែរ បុ៉ន្តែពេលទៅដល់រថយន្តពន្លត់អគ្គិភ័យពន្លត់បានតែខាងៗបុ៉ណ្ណោះ ហើយមានកន្លែងខ្លះមិនអាចចូលទៅដល់នោះឡើយ ។
ប្រភពដដែលបន្តថា ដោយសារតែមានឧបសគ្គខ្លះៗបែបនេះទើបមានការលំបាកក្នុងការពន្លត់ភ្លើង ហើយកម្លាំងប៉ូលិស រួមជាមួយប្រជាពលរដ្ឋ និងមានកិច្ចសហការពីកម្លាំងយោធានៅបន្ទាយត្មាតពង នាំគ្នាមកកាច់មែកឈើដើរវ៉ៃពន្លត់ភ្លើងឆេះព្រៃនោះ និងប្រើពេលជាង១ម៉ោងទើបភ្លើងរលត់ទៅវិញ និងមិនបានឆេះរាលដាលដល់ផ្ទះប្រជាពលរដ្ឋឡើយ ។
ប្រភពដដែលបន្តថា នៅទីតាំងខាងលើនោះសម្បូរទៅដោយស្លឹកឈើងាប់ៗជាច្រើនជ្រុះក្បែរគល់ ហើយការឆេះនេះសង្ស័យថា បណ្តាលមកពីអ្នករកអុស ឬអ្នកដើររកឃ្មុំបោះកន្ទុយបារី ឬបោះភ្លើងចោលផ្តេសផ្តាស ទើបបណ្តាលឱ្យមានការឆេះបែបនេះ បុ៉ន្តែជាសំណាងល្អហើយដែលអាចគ្រប់គ្រងបាន និងមិនបង្កឱ្យឆេះរាលដាលដល់ផ្ទះប្រជាពលរដ្ឋក្បែរនោះ ។ ទោះជាបែបណា ព្រៃនិងចម្ការដើមប្រេងខ្យល់ត្រូវបានភ្លើងឆេះស្ទើរតែទាំងអស់ ៕
ចែករំលែកព័តមាននេះ