រាជធានីភ្នំពេញ ៖ ទំនាស់ពាក្យសម្តីនៅក្នុងការដ្ឋានសាង់សង់ផ្ទះមួយកន្លែងរវាងបុរស២នាក់ បង្កឱ្យមានអំពើហិង្សាកើតឡើងដោយបុរសជាជនសង្ស័យបានទាញកាំបិតប័ុងតោ កាប់ទៅលើប្រពន្ធបុរសដែលជាដៃគូជម្លោះរបស់ខ្លួន បណ្តាលឱ្យរបួសស្រាលដោយសារបុរសជាប្តីចាប់កដៃជនសង្ស័យជាប់ ។ ហេតុការណ៍នេះកើតឡើងកាលពីវេលាម៉ោង ៩និង២០នាទីយប់ ថ្ងៃទី២៥ មេសា នៅក្នុងការដ្ឋានសាងសង់ផ្ទះមួយកន្លែង ស្ថិតនៅភូមិអូរអណ្តូងមួយ សង្កាត់ព្រែកប្រា ខណ្ឌមានជ័យ ។
ជនបង្កមានឈ្មោះ ពេញ ទី ភេទប្រុស អាយុ២៦ឆ្នាំ ជាកម្មករសំណង់ ស្រុកកំណើតនៅភូមិអរិយក្សត្រ ស្រុកល្វាឯម ខេត្តកណ្តាល។ ជនរងគ្រោះ ឈ្មោះ នុត សាវន ភេទស្រី អាយុ៤៧ឆ្នាំ ជាកម្មករសំណង់ ស្នាក់នៅកន្លែងកើតហេតុ មានស្រុកកំណើតនៅភូមិកំពង់ហ្លួង ស្រុកខ្សាច់កណ្តាល ខេត្តកណ្តាល ចំណែកប្តី ស្រ្តីរងគ្រោះ មានឈ្មោះ ឌឹម ភា អាយុ៤៧ឆ្នាំជាកម្មករ សំណង់ ស្នាក់កន្លែងកើតហេតុ មានស្រុកកំណើតនៅក្នុងភូមិបឹងគ្រំ សង្កាត់ល្វាឯម ស្រុកខ្សាច់កណ្តាល។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញជនបង្កបានមកផឹកស៊ី នៅការដ្ឋានមួយជាកន្លែងដែលជនរងគ្រោះស្នាក់នៅធ្វើការបច្ចុប្បន្ន ដោយជនបង្កស្គាល់អ្នកធ្វើការនៅក្នុងការដ្ឋាននេះ ហើយណាមួួយមារបស់ជនបង្កគឺជាមេការនៅក្នុងការដ្ឋានខាងលើផងដែរ។ ពេលផឹកស៊ីជនបង្កបាននិយាយឡូឡារំខានដល់ភាគីជនរងគ្រោះកំពុងគេង នៅក្បែរកន្លែងផឹកស៊ីនោះ ហើយប្តីស្រ្តីរងគ្រោះក៏ប្រាប់ទៅជនបង្កថា(អាអូនផឹកស៊ីស្រវឹងកុុំឡូឡា) ជនបង្កបានតបថា(ខ្ញុំផឹកស៊ីតែខ្ញុំទេ)ហើយមានកាឈ្លោះប្រកែកគ្នាហូរហែរ ដោយប្តីស្រី្តរងគ្រោះបានជេប្រមាថដល់ជនសង្ស័យផងដែរ ធ្វើឱ្យជនសង្ស័យខឹងក៏ទាញកាំបិតបុ័ងតោកាប់ទៅលើប្រពន្ធរបស់បុរសគូជម្លោះ ប៉ុន្តែត្រូវបានបុរសជាប្តីចាប់កករដៃជនបង្កបានធ្វើឱ្យប្រពន្ធរងរបួសស្រាល។
ក្រោយពេលកើតហេតុជនបង្កបានទាញម៉ូតូជិគេចខ្លួនតែត្រូវបានគេនាំគ្នាដេញតាមរហូតចាប់បាននៅចមណុច ផ្លូវ៣៦៩រួចនាំទៅសាលាសង្កាត់ព្រែកប្រាដើម្បីធ្វើការដោះស្រាយគ្នាតាមផ្លូវច្បាប់។
ចែករំលែកព័តមាននេះ