ខេត្តកំពង់ស្ពឺ ៖ គោ គឺជាសត្វចតុប្បាទមួយប្រភេទដែលអាចជួយដល់ការធ្វើស្រែចម្ការរបស់ប្រជាកសិករបានមួយចំណែកធំ ព្រោះគោ គឺជាកម្លាំងអូសទាញដ៏សំខាន់ក្នុងការភ្ជួររាស់ដីស្រែចម្ការទៅតាមរដូវកាល ។ តែដោយបច្ចុប្បន្នការធ្វើកសិកម្មបានវិវត្តន៍ទៅរកភាពជឿនលឿន និងទាន់សម័យដោយការប្រើគ្រឿងចក្រធ្វើឲ្យការចិញ្ចឹមសត្វគោហាក់មានការថមថយ ដោយគ្រួសារខ្លះបានប្រវាស់ពីអ្នកដែលមានគោច្រើនយកមកចិញ្ចឹម ដើម្បីយកកូន ។
ជាក់ស្តែង នៅភូមិត្រពាំងឈូក ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ ដែលជាភូមិមួយស្ថិតជាប់ស្ទឹងស្លាគូមានខណ្ឌសីមាជាប់ស្រុកត្រាំកក់នៃខេត្តតាកែវ មានប្រជាពលរដ្ឋ៣១៤គ្រួសារ ចំណែកសត្វគោវិញមានត្រឹមតែ២០០ក្បាលប៉ុណ្ណោះ ។
ជួបជាមួយអ្នកយកព័ត៌មានយើង ពូរ៉ា បានប្រាប់ថា រាល់ថ្ងៃគ្រួសាររបស់គាត់មិនមានសត្វគោសម្រាប់ចិញ្ចឹមនោះទេ រាល់ថ្ងៃគោដែលគាត់មើលថែ គឺជាគោប្រវាស់ពីបងប្អូន ដើម្បីបានកូនយកមកចិញ្ចឹម ព្រោះគាត់មិនមានប្រាក់សម្រាប់ទិញគោនោះទេ ។ ការប្រវាស់គោនេះ បើសិនជាមេក្រមុំ គឺកូនដំបូងត្រូវបានមកលើអ្នកមើលថែ (អ្នកចិញ្ចឹម) ចំណែកកូនក្រោយត្រូវបានទៅលើម្ចាស់ដើម ។ បើសិនជាមេគោយកមកតែវាមានផ្ទៃពោះស្រាប់នោះកូនកើតមកត្រូវបានទៅលើម្ចាស់ដើមមុន ហើយកូនក្រោយមកទៀតបានមកលើអ្នកមើលថែ ។ ករណីនេះអាស្រ័យទៅលើម្ចាស់ដើម និងអ្នកប្រវាស់និយាយព្រមព្រៀងគ្នាពីដំបូងមក ។
លោក សេក អ៊ិម មេភូមិត្រពាំងឈូកបានប្រាប់ផងដែរថា សព្វថ្ងៃនេះ ទោះបីជាការធ្វើស្រែចម្ការមានការវិវឌ្ឍ និងឈានទៅរកភាពជឿនលឿនដោយការប្រើគ្រឿងចក្រយ៉ាងណាក្តីក៏ក្រុមគ្រួសារខ្លះដែលមិនមានលទ្ធភាពនៅតែប្រើកម្លាំងសត្វគោអូសទាញដដែល ។ លោកបន្តថា សព្វថ្ងៃក្នុងចំណោមទាំង៣១៤គ្រួសារណា ដែលមានលទ្ធភាព (គោច្រើន) បានប្រវាស់ទៅឲ្យអ្នកដែលមិនមានសត្វគោ ដើម្បីសម្រាលការមើលថែ តែពេលបានកូនមកត្រូវចែកគ្នាម្នាក់ម្តងទៅតាមការការនិយាយព្រមព្រៀងគ្នារបស់ម្ចាស់គោ និងអ្នកចិញ្ចឹមមើលថែ ។
បើនិយាយពីតម្លៃវិញ គឺក្នុងគោមួយនឹមហាក់មានតម្លៃថ្លៃគួរសម (គោបារសម្រាប់ទឹម) ចាប់ពី3000ទៅ5000ដុល្លារ ក៏មាន ហេតុដូច្នេះហើយ អ្នកមានលទ្ធភាពល្មមៗមិនអាចមានគោចិញ្ចឹមបានដូចអ្នកមានជីវភាពធូធារបានឡើយ ។ សម័យនេះ ថ្វីត្បិតតែការធ្វើកសិកម្មស្រែចម្ការមានការជឿនលឿន ស្របទៅតាមការអភិវឌ្ឍរបស់ប្រទេសជាតិយ៉ាងណាក្តីក៏បងប្អូនមួយចំនួននៅតែចិញ្ចឹមគោដដែល ព្រោះសត្វគោបានផ្តល់ផលប្រយោជន៍ជាច្រើនដល់ប្រជាកសិករយើង ជាពិសេស គឺកម្លាំងអូសទាញតែម្តង លើសពីនេះទៅទៀត គឺគេត្រូវការលាមករបស់វា ដើម្បីយកមកទុកធ្វើជីធម្មជាតិចៀសវាងការប្រើប្រាស់ជីគីមី ៕ កែសម្រួលដោយ ៖ សុឃាក់
ចែករំលែកព័តមាននេះ