ក្រុងបាងកក ៖ អ្នកនាំពាក្យក្រសួងការបរទេសថៃ បាននិយាយនៅថ្ងៃសៅរ៍នេះថា សហរដ្ឋអាមេរិក បានប្រាប់ទីក្រុងបាងកកថា ខ្លួនកំពុងផ្អាកការចរចាបញ្ចប់កិច្ចព្រមព្រៀងពាណិជ្ជកម្មទៅវិញទៅមក រហូតដល់រដ្ឋាភិបាលថៃ បញ្ជាក់ជាថ្មី អំពីការប្តេជ្ញាចិត្តរបស់ខ្លួន…
ក្រុងបាងកក ៖ អ្នកនាំពាក្យក្រសួងការបរទេសថៃ បាននិយាយនៅថ្ងៃសៅរ៍នេះថា សហរដ្ឋអាមេរិក បានប្រាប់ទីក្រុងបាងកកថា ខ្លួនកំពុងផ្អាកការចរចាបញ្ចប់កិច្ចព្រមព្រៀងពាណិជ្ជកម្មទៅវិញទៅមក រហូតដល់រដ្ឋាភិបាលថៃ បញ្ជាក់ជាថ្មី អំពីការប្តេជ្ញាចិត្តរបស់ខ្លួន ចំពោះការអនុវត្តកិច្ចព្រមព្រៀងសន្តិភាពជាមួយកម្ពុជា នេះបើតាមការចេញផ្សាយរបស់សារព័ត៌មានរ៉យទ័រ នៅថ្ងៃទី១៥ ខែវិច្ឆិកា ឆ្នាំ២០២៥ ។
អ្នកនាំពាក្យក្រសួងការបរទេសថៃ លោក Nikorndej Balankura បានប្រាប់អ្នកសារព័ត៌មានថា ប្រទេសថៃ កាលពីយប់ថ្ងៃសុក្រ ទី១៤ ម្សិលមិញនេះ ទទួលបានលិខិតមួយច្បាប់ពីការិយាល័យតំណាងពាណិជ្ជកម្មសហរដ្ឋអាមេរិក ដែលប្រកាសពីការផ្អាកការចរចាបញ្ចប់កិច្ចព្រមព្រៀងពាណិជ្ជកម្មទៅវិញទៅមកជាមួយថៃ ។
លោកបានដកស្រង់លិខិតរបស់ការិយាល័យតំណាងពាណិជ្ជកម្មសហរដ្ឋអាមេរិក ដោយនិយាយថា ការចរចាពាណិជ្ជកម្ម អាចបន្តឡើងវិញ នៅពេលដែលប្រទេសថៃ បានបញ្ជាក់ជាថ្មី នូវការប្តេជ្ញាចិត្តរបស់ខ្លួន ក្នុងការអនុវត្តកិច្ចព្រមព្រៀងសន្តិភាពគូឡាឡាំពួរ។ ភាគីទាំងពីរ(សហរដ្ឋអាមេរិក និងថៃ) ត្រូវតែចរចា និងបញ្ចប់កិច្ចព្រមព្រៀងពាណិជ្ជកម្មជាមួយគ្នា និងរៀបចំសម្រាប់ការចុះហត្ថលេខា មុនពេលវាចូលជាធរមាន ។
កាលពីខែមុន ទីក្រុងវ៉ាស៊ីនតោន និងទីក្រុងបាងកក បានប្រកាសពីក្របខ័ណ្ឌសម្រាប់ពាណិជ្ជកម្មទៅវិញទៅមក ដែលសហរដ្ឋអាមេរិក រក្សាពន្ធគយ 19% លើផលិតផលថៃ ។
ដោយឡែក ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយជាមួយមេដឹកនាំប្រទេសថៃ និងកម្ពុជា តាមទូរព្ទនៅយប់ថ្ងៃសុក្រ បន្ទាប់ពីភាពតានតឹងព្រំដែន បានកើនឡើងឡើងវិញ នៅសប្តាហ៍នេះ ។
លោក ដូណាល់ ត្រាំ មិនបាននិយាយអំពីលិខិតរបស់ការិយាល័យតំណាងពាណិជ្ជកម្មសហរដ្ឋអាមេរិក(USTR) ស្តីពីការផ្អាកការចរចាបញ្ចប់កិច្ចព្រមព្រៀងពាណិជ្ជកម្មទៅវិញទៅមក ជាមួយថៃ នោះទេ។ ហើយក៏មិនមានបង្ហោះនៅលើគេហទំព័រ USTR ឬសេតវិមានដែរ ជាកន្លែងដែលព័ត៌មានស្តីពីការចរចាពាណិជ្ជកម្មជាមួយប្រទេសដទៃទៀត ត្រូវបានផ្សព្វផ្សាយ ។
នៅសប្តាហ៍នេះ នាយករដ្ឋមន្ត្រីថៃ បានប្រកាសផ្អាកកិច្ចព្រមព្រៀងសន្តិភាពជាមួយកម្ពុជា ហើយទាមទារឱ្យកម្ពុជា សុំទោសថៃ ចំពោះការចោទប្រកាន់ថា កម្ពុជាបានដាក់មីនថ្មី ដែលធ្វើឱ្យទាហានថៃ រងរបួស ប៉ុន្តែកម្ពុជាបានបដិសេធ ៕
ចែករំលែកព័តមាននេះ