រាជធានីភ្នំពេញ ៖ ខណៈកម្ពុជាហាក់កំពុងប្រឈមនឹងការបាត់បង់ភ្ញៀវទេសចរបរទេសទៅកំសាន្តនៅរមណីដ្ឋានសៀមរាប-អង្គរ និងព្រះវិហារ ជាពិសេសគឺការធ្លាក់ចុះ
ភ្ញៀវទេសចរចិននិងជ៉បុននោះ លោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនថ្មីប្រចាំកម្ពុជាបានសន្យាយ៉ាងមុះមុតថា លោកនឹងជួយជំរុញអ្នកវិនិយោគ និងភ្ញៀវទេសចរឱ្យមកវិនិយោគ និងទស្សនាកម្សាន្តនៅកម្ពុជា កាន់តែច្រើនបន្ថែមទៀត។
ការអះអាងរបស់លោក មិកាមិ បានធ្វើឡើងនាជំនួបពិភាក្សាជាមួយលោក ថោង ខុន រដ្ឋមន្ត្រីក្រសួងទេសចរណ៍ នៅស្ដីការក្រសួងទេសចរណ៍នារសៀលថ្ងៃទី៩ ខែតុលា ឆ្នាំ២០១៩ លោក MIKAMI Masahiro ឯកអគ្គរាជទូតជប៉ុនថ្មីប្រចាំកម្ពុជា ។ នេះបើតាមការឲ្យដឹងរបស់លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍ នៃក្រសួងទេសចរណ៍។
លោក ជុក ជំនោរ បានឱ្យដឹងថា នៅក្នុងជំនួបនោះទាំងលោករដ្ឋមន្ត្រី ថោង ខុន និងឯកអគ្គរាជទូតជប៉ុន បានកត់សម្គាល់អំពីការ អភិវឌ្ឍ និងការវិវត្តថ្មីៗលើវិស័យទេសចរណ៍រវាងប្រទេសទាំងពីរ។ ជាក់ស្តែងកាលពី ឆ្នាំ២០១៨កន្លងមក ក្នុងចំណោមភ្ញៀវ ទេសចរអន្តរជាតិ ៦លាន២សែននាក់ មានភ្ញៀវទេសចរ ជប៉ុនជាង ២០ម៉ឺននាក់ ដោយឡែកសម្រាប់៧ខែ ដើមឆ្នាំ២០១៩នេះ កម្ពុជាទទួលបានភ្ញៀវ ទេសចរណ៍ជប៉ុនសរុប១៤ម៉ឺននាក់ ហើយភ្ញៀទេសចរជប៉ុននៅតែជាភ្ញៀវទេសចរដែលមានកំណើនសម្រាប់តំបន់ខេត្តសៀមរាប ។
នាឱកាសនោះ លោក ថោង ខុន ក៏បានស្នើដល់ឯកអគ្គរាជទូតជប៉ុនជួយជំរុញឲ្យមានជើងហោះហើរត្រង់បន្ថែមទៀត ភ្ជាប់ទីក្រុងសំខាន់ៗរវាងប្រទេសជប៉ុននិងកម្ពុជា ដែលកន្លងមកនេះភាគីទាំងពីរមានជើងហោះហើរត្រង់ពីអាកាសយានដ្ឋានឡារីតា នៃទីក្រុងតូក្យូ មកកាន់ រាជធានីភ្នំពេញ។ លោកសំណូមពរផងដែរឲ្យមានការតភ្ជាប់ពីទីក្រុងតូក្យូមកកាន់ខេត្តសៀម រាប ក៏ដូចជាពីទីក្រុងសំខាន់ៗរបស់ជប៉ុនមកកាន់កម្ពុជាផងដែរ។
ទន្ទឹមនោះលោករដ្ឋមន្ត្រីក៏បានស្នើសុំឲ្យឯកអគ្គរាជទូតជប៉ុន ជួយសម្រួលឲ្យមានស្លុតចុះយន្តហោះនៅទីក្រុងអូសាកា ដែលក្រុមហ៊ុនអាសចរណ៍កម្ពុជាអង្គរអ៊ែរ គឺជាក្រុមហ៊ុនអា កាសចរណ៍ជាតិកំពុងតែមានការសិក្សាគម្រោងហោះហើរទៅកាន់ទីក្រុងអូសាកានេះផងដែរ។បន្ថែមលើនេះ លោករដ្ឋមន្ត្រីបានស្នើឲ្យភាគីជប៉ុនជួយសិក្សារៀបចំខេត្តសៀមរាប ជាពិសេស ក្រុងសៀមរាប និងក្រុងបាត់ដំបង ជាទីក្រុងឆ្លាតវៃ (Smart City) ព្រោះភាគីជប៉ុនមានបច្ចេក វិទ្យាខ្ពស់ ក៏ដូចជាបទពិសោធន៍ក្នុងការរៀបចំកិច្ចការទាំងអស់នេះ។ ព្រមជាមួយនឹងការជំរុញឲ្យមានការវិនិយោគលើវិស័យទេសចរណ៍កាន់តែច្រើន។
លោក ថោង ខុន បានថ្លែងនូវការកោតសរសើរពីការវិនិយោគរបស់ជប៉ុននៅរមណីយដ្ឋាន វីគិរីរម្យ នៅខេត្តកំពង់ស្ពឺ និងជំរុញឲ្យមានវិនិយោគិន ជួយអភិវឌ្ឍន៍តំបន់ទេទឹកពុះ ដែលជា តំបន់ Hot Spring មួយដ៏ល្អនៅក្នុងស្រុកឱរ៉ាល់ ខេត្តកំពង់ស្ពឺ ហើយដែលភាគីជប៉ុនមានបទ ពិសោធន៍ច្រើនក្នុង ការធ្វើការងារទាំងអស់នេះ។
អ្នកវិនិយោគជប៉ុនបានបង្ហាញនូវការជឿជាក់លើស្ថានភាពនយោបាយ និងសេដ្ឋកិច្ចនៅកម្ពុជាដែលបង្កលក្ខណៈអំណោយផលដល់ការរកស៊ីរបស់វិនិយោគិនបរទេស សំខាន់វិនិយោគគិនមកពីប្រទេសជប៉ុន ។
លោក អាឡិច យ៉ាស៊ូម៉ូតូ សហស្ថាបនិកក្រុមហ៊ុនមួយបានថ្លែងប្រាប់អ្នកសារព័ត៌មាននៅក្នុងសន្និសីទកាសែត កាលពីថ្ងៃទី០៩ ខែតុលានេះ កន្លងទៅនេះដោយបញ្ជាក់ថា កម្ពុជាជាប្រទេសដែលមានសក្តានុពល និងអំណោយផលសម្រាប់ការបណ្តាក់ទុនរកស៊ី សំខាន់ការរកស៊ីលើវិស័យអចនទ្រព្យ ។ លោកថ្លែងអះអាងថា កម្ពុជាជាប្រទេសដែលក្រុមអ្នកវិនិយោគជប៉ុនមើលឃើញថា មានស្ថេរភាពខាងនយោបាយ និងសន្តិសុខរឹងមាំ រួមទាំងកំណើនសេដ្ឋកិច្ចគួរឲ្យកត់សម្គាល់ ។ ទន្ទឹមនោះគោលនយោបាយវិនិយោគ និងច្បាប់ស្តីការវិនិយោគបានបង្កភាពអនុគ្រោះច្រើន ដល់ជនបរទេស ឬក្រុមហ៊ុនបរទេសដែលមកបណ្តាក់ទុនរកស៊ីលើគ្រប់ផ្នែកក្នុងប្រទេសអាស៊ានមួយនេះ ។
លោក មិកាមិ ម៉ាសាហ៊ីរ៉ូ (MIKAMI Masahiro) បានទទួលយកសំណូមពររបស់លោក រដ្ឋមន្ត្រី ក៏ដូចជាជំរុញឲ្យអ្នកវិនិយោគ ក៏ដូចជាវិស័យឯកជននានារបស់ជប៉ុន មកវិនិយោគលើ វិស័យទេសចរណ៍បន្ថែមទៀត ពិសេសជំរុញនូវលំហូរភ្ញៀវទេសចរជប៉ុនមកកាន់កម្ពុជា ។ លោករដ្ឋមន្ត្រីក៏បានថ្លែងអំណរគុណភាគីជប៉ុន ក្នុងនាមជាសហប្រធាន ICC-អង្គរ ដែលបានជួយអភិរក្សតំបន់ប្រាសាទអង្គរ ក៏ដូចជាខេត្តសៀមរាប និងបានសំណូមពរឲ្យភាគីជប៉ុនបន្ត កិច្ចសហប្រតិបត្តិការនេះ រហូតទៅដល់ប្រាសាទសំបូរព្រៃគុកថែមទៀត ដើម្បីជួយផ្សព្វផ្សាយ ក៏ដូចជាជួយអភិរក្សប្រាសាទសំបូរព្រៃគុកនេះឲ្យកាន់តែមានភាពប្រសើរឡើង។ ព្រមជា មួយនឹងការស្នើសុំឲ្យភាគីជប៉ុនជួយជំរុញ ការផ្សព្វផ្សាយបណ្តាញបេតិកភណ្ឌ ភ្ជាប់តំបន់អង្គរទៅបឹងមាលា ប្រាសាទកោះកេរ ព្រះវិហារ ។
លោកបានសាទរផងដែរ ចំពោះភាគីជប៉ុន ជាពិសេសទីក្រុងតូក្យូ ដែលនឹងរៀបចំកីឡា អូឡាំពិកនៅឆ្នាំ២០២០ ហើយកម្ពុជានឹងបញ្ជូនអត្តពលិកទៅចូលរួម។ ភាគីជប៉ុនបានជួយ បណ្តុះបណ្តាលកីឡាជំនាញមួយចំនួនរបស់កម្ពុជា ជាពិសេសកីឡាហែលទឹក ក្នុងការដែល ឲ្យអត្តពលិកកម្ពុជា បានចូលរួមហ្វឹកហាត់បង្កើនសមត្ថភាពជាមួយនឹងការចូលរួមព្រឹត្តិការណ៍នានា៕ កែសម្រួលដោយ ៖សុឃាក់
ចែករំលែកព័តមាននេះ