ខេត្តក្រចេះ ៖ សេចក្តីរាយការណ៍បឋមបានឲ្យដឹងថា ការធ្វើនេសាទដោយខុសច្បាប់ពីសំណាក់ជនឱកាសនិយមដោយប្រើរូបភាពផ្សេងៗនៅតាមតំបន់នានាដូចជា ទន្លេ ព្រែក បឹងបួរ ក្នុងភូមិសាស្ត្រន៍ខេត្ត គឺនៅតែកើតមានគួរឲ្យព្រួយបារម្ភ ខណៈតួលេខនៃការបង្ក្រាបពីក្រុមមន្ត្រីជំនាញក៏ដូចជា…
ខេត្តក្រចេះ ៖ សេចក្តីរាយការណ៍បឋមបានឲ្យដឹងថា ការធ្វើនេសាទដោយខុសច្បាប់ពីសំណាក់ជនឱកាសនិយមដោយប្រើរូបភាពផ្សេងៗនៅតាមតំបន់នានាដូចជា ទន្លេ ព្រែក បឹងបួរ ក្នុងភូមិសាស្ត្រន៍ខេត្ត គឺនៅតែកើតមានគួរឲ្យព្រួយបារម្ភ ខណៈតួលេខនៃការបង្ក្រាបពីក្រុមមន្ត្រីជំនាញក៏ដូចជា អាជ្ញាធរពាក់ព័ន្ធនៅតែកើនឡើងឥតឈប់ឈរ ។
ខេត្តក្រចេះជាខេត្តមួយដែលមានទីតាំងលាតសន្ធឹងតាមបណ្តាយដងទន្លេមេគង្គ និងជាអំណោយផលលើសក្ការនុពលនេសាទ ។ ខេត្តជាប់ និងតំបន់មេគង្គប៉ែកខាងលើនេះក៏ អំណោយផលល្អដល់ជីវចម្រុះទឹកសាបសម្បូរដោយជម្រកត្រីពងកូន ត្រីមេពូជ ពិសេសនោះ សត្វផ្សោតទឹកសាប ។ ដោយសារតែខេត្តសម្បូរដោយធនធានជាតិទឹកសាបបែបនេះ ទើបពលរដ្ឋជាងពាក់កណ្តាលនៃចំនួនពលរដ្ឋសរុបជិត១០ម៉ឺននាក់បានចាប់យករបរនេសាទជារបស់ចម្បងសម្រាប់ជីវភាពគ្រួសារប្រចាំថ្ងៃ ។
ទន្ទឹមនិងការធ្វើនេសាទដែលកំពុងតែកើមមានលើផ្ទៃទន្លេ ព្រែក បឹង របស់ពលរដ្ឋជា លក្ខណះគ្រួសារតាមទ្រង់ទ្រាយតូច ឬធំ ដើម្បីចាប់យកត្រីនោះជាមួយគ្នានេះបទល្មើសនេសាទដែលប្រព្រឹត្តដោយជនឱកាសនិយមក៏នៅតែកើតមាន ខណៈការចុះល្បាតបង្ក្រាបពីអាជ្ញាធរក៏ដូចជាមន្ត្រីជំនាញជលផលនៅតែខិតខំបន្តធ្វើយ៉ាងសស្រាក់សស្រាំយ៉ាងណាក៏ដោយ ។
តាមរបាយការណ៍មួយរបស់ខណ្ឌរដ្ឋបាលជលផលខេត្តបានបង្ហាញឲ្យដឹងថា រយៈពេល៩ដើមឆ្នាំ២០១៩ ខណ្ឌរដ្ឋបាលជលផលសហការជាមួយគណៈបញ្ជាការឯកភាពស្រុក ក្រុង និងអាជ្ញាធរតាមមន្ទីរស្ថាប័នពាក់ព័ន្ធចុះធ្វើការបង្ក្រាបបទល្មើសនេសាទ នៅតាមតំបន់ភូមិសាស្ត្រទន្លេ ព្រែក បឹងបួរ បានចំនួន១៣៦ករណី ។
ការបង្ក្រាបករណីបទល្មើសនេសាទខាងលើអាជ្ញាធរមានសមត្ថកិច្ចរឹបអូសអូសបានឧបករណ៍ផ្សេងៗសម្រាប់បម្រើឲ្យបទល្មើសនេសាទមានដូចជា ស្បៃមុងសាច់កាវ ប្រវែងជាងជិត២ពាន់មែត្រ លូសាច់អួនជាង១មែត្រ បង្គលឬស្សីជាងពាន់ដើម និងបានចាក់លែងកូនត្រី ចូលក្នុងទន្លេ និងបឹងធម្មជាតិចំនួនជិត២រយគីឡូក្រាម ។
អនុប្រធានខណ្ឌរដ្ឋបាលជលផលខេត្ត និងជាប្រធានឆ្មាំអភិរក្សសត្វផ្សោតលោក ម៉ុក ពន្លក បានថ្លែងថា មានមងបណ្តែតចំនួន២០៥ត្បូង ត្រូវបានសមត្ថកិច្ចបង្ក្រាបបាននៅតាមតំបន់ អន្លងផ្សោត និងអន្លង់ត្រីមេពូជ ក្នុងតំបន់អភិរក្ស ។ ឧបករណ៍សន្ទូចរាយជាង១ពាន់ម៉ែត្រ សម្រាស់២៨គំនរ មងពាក់ព្រែកចំនួន៣ត្បូង ដែលក្រុមជនល្មើសលបលួចធ្វើការនេសាទនៅតំបន់ហាមឃាត់ក៏ត្រូវបានបង្ក្រាប និងប្រមូលមកកម្ទេចចោលនៅ និងមុខមហាជន ។ ក្រៅពីនោះក៏នៅមានទូកម៉ាស៊ីនចំនួន៣គ្រឿង និងសម្ភារឆក់ត្រីជាច្រើនសម្រាប់ទៀតក៏ត្រូវបានចាប់បង្ក្រាប ។
ទន្ទឹម និងស្ថានភាពការលួចធ្វើនេសាទខុសច្បាប់នៅតែជាបញ្ហាប្រឈម និងស្មុគស្មាញ ដែលកំពុងតែគំរាមកំហែងដល់ពពួកត្រីធម្មជាតិនោះ ប្រធានខណ្ឌរដ្ឋបាលជលផលខេត្តលោក ស៊ៀន គិន បានអះអាងថា កម្លាំងខណ្ឌជលផលបានត្រៀមលក្ខណៈគ្រប់គ្រាន់ដោយសហការជាមួយ និងកម្លាំងប្រដាប់អាវុធទាំង៣ប្រភេទ និងមន្ត្រីអង្គការពាក់ព័ន្ធនានាលើចំណាត់ការបង្ក្រាបបទល្មើសនេសាទ ។ ពិសេសផែនការពង្រឹងសហគមនេសាទឲ្យមានការចូលរួមសហការ ក្នុងការត្រួពិនិត្យ និងល្បាតជាប់ជាប្រចាំ ។
ការអភិរក្ស និងថែទាំអន្លង់ផ្សោត និងអន្លង់មេពូជមួយចំនួនក្នុងដែននេសាទទាំង២៨ចំនុច និងស្រះជម្រកត្រី១០កន្លែង និងការរុករកបន្តស្រាវជ្រាវស្រះជម្រកត្រីថែមទៀត ដើម្បីកំនែទំរង់ទិន្ធផលឲ្យកាន់តែកើនឡើង ។ លោកបានលើកឡើងថា ដោយសារតំបន់មួយចំនួននៅមានភាពស្មុគស្មាញវិសាលភាពទន្លេធំ និងមានកូនកោះច្រើនទើបធ្វើឲ្យក្រុមជនល្មើសងាយ និងលាក់ ខ្លួនពីការចុះល្បាតពីសមត្ថកិច្ចជំនាញក៏ដូចជា មន្ត្រីឆ្មាំ តែយ៉ាងណាក្រុមអាជ្ញាធរនៅតែបង្កើនសកម្មភាពល្បាតរុករក ដើម្បីទប់ស្កាត់ ៕ កែសម្រួលដោយ ៖ សុឃាក់
ចែករំលែកព័តមាននេះ