រាជធានីភ្នំពេញ ៖ រថយន្តឈ្នួលមួយគ្រឿងមិនដឹងថាមានដឹកអ្នកដំណើរប៉ុន្មាននាក់នោះទេ ខណៈពេលកំពុងធ្វើដំណើរក្នុងល្បឿនលឿនចេញពីខេត្តព្រះសីហនុចូលមករាជធានីភ្នំពេញ សង្ស័យអ្នកបើកបរងោកមួយភាំង ស្រាប់តែរេចង្កូតជ្រុលទៅបុកបង្គោលភ្លើងបំភ្លឺផ្លូវ១ដើមដាច់រលើងដល់គល់ដួលរលំធ្លាក់ចូលទៅក្នុងទឹកប្រឡាយលិចបាត់។ បន្ទាប់មកទើបរថយន្តបង្កបានធ្លាក់ចូលទៅក្នុងប្រឡាយទឹកស្អុយទាំងកម្រោលតាមក្រោយដែរ ប៉ុន្តែមិនបណ្ដាលឲ្យអ្នកបើកបរ និងអ្នករួមដំណើរណាម្នាក់រងគ្រោះថ្នាក់នោះឡើយ ។
ហេតុការណ៍ខាងលើនេះបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី១៣ ខែតុលា ឆ្នាំ២០១៩ នៅតាមផ្លូវជាតិលេខ៤ ត្រង់ចំណុចភូមិអង្គកែវ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
រថយន្តឈ្នួលមួយគ្រឿងខាងលើម៉ាកសាំយ៉ុង ពណ៌ស ពាក់ស្លាកលេខ ភ្នំពេញ ២A-៩៨៣៨ បើកបរដោយបុរសម្នាក់មិនប្រាប់អត្តសញ្ញាណនោះទេ ។ រថយន្តមួយគ្រឿងមានដឹកទំនិញ និងអ្នកដំណើរផងដែរ តែមិនដឹងថា មានអ្នកដំណើរប៉ុន្មាននាក់ជិះក្នុងរថយន្តនេះទេ ។
តាមប្រភពពីបុរសជាអ្នកបើកបររថយន្តឈ្នួលមួយគ្រឿងខាងលើបាននិយាយថា នៅវេលាយប់រំលងអាធ្រាត្រឈានចូលថ្ងៃកើតហេតុ គាត់បានបើកបររថយន្តនេះដឹកអ្នកដំណើរ និងទំនិញខ្លះចេញពីខេត្តព្រះសីហនុឆ្ពោះចូលមករាជធានីភ្នំពេញ ខណៈនោះគាត់បានងងុយដេក ប៉ុន្តែអត់បានឈប់សម្រាកឡើយក៏ចេះតែបន្តដំណើរទៅមុខទៀត ព្រោះនឹកឃើញថាជិតដល់ភ្នំពេញហើយដែរ។
តាមប្រភពដដែលបានបន្តថា លុះពេលធ្វើដំណើរមកដល់ចំណុចកើតហេតុខាងលើ គាត់បានងោកមួយភាំងធ្វើឲ្យបាត់បង់ម្ចាស់ការក្នុងការបើកបរ ទើបរេចង្កូតជ្រុលទៅបុកបង្គោលភ្លើងបំភ្លឺផ្លូវបាក់រលើងគល់ដួលរលំធ្លាក់ចូលទឹកប្រឡាយលិចបាត់។ បន្ទាប់មកទើបរថយន្តរបស់គាត់ជ្រុលធ្លាក់ចូលទៅក្នុងប្រឡាយទឹកស្អុយនោះដែរ ហើយគាត់រួមជាមួយអ្នកជិះក្នុងរថយន្តមិនបានរងរបួសឡើយ។
តាមប្រភពពីអ្នកភូមិបាននិយាយថា អ្នកបើកបរនិងអ្នកជិះក្នុងរថយន្តនេះមានសំណាងខ្លាំងណាស់ ព្រោះហេតុការណ៍នោះបានកើតឡើងនៅវេលាម៉ោង៦និង៣០នាទីព្រឹក ប្រសិនបើកើតឡើងនៅវេលាម៉ោង៤ឬ៥ជិតភ្លឺ គឺចំពេលដែលភ្លើងបំភ្លឺផ្លូវមិនទាន់បិទវិញនោះពួកគាត់នឹងត្រូវចរន្តអគ្គីសនីឆក់ បណ្តាលឱ្យស្លាប់ទាំងអស់គ្នាជាក់ជាមិនខានឡើយ ។
តាមប្រភពដដែលបានបន្តថា ព្រោះខ្សែភ្លើងដែលដាច់បានធ្លាក់ត្រាំក្នុងទឹកក្បែររថយន្តនោះដែរ តែហេតុការណ៍ខាងលើនេះបានកើតឡើងចំពេលភ្លើងបំភ្លឺផ្លូវត្រូវបានបិទរួចទៅហើយ ។ ម្យ៉ាងទៀត ហេតុការណ៍ខាងលើនេះកើតឡើងចំថ្ងៃអាទិត្យដែលកម្មកររោងចក្រឈប់សម្រាកអស់ បើសិនចំថ្ងៃដែលកម្មករធ្វើការវិញ ប្រាកដជាមានអ្នកស្លាប់និងរបួសច្រើននាក់ជាមិនខានឡើយ។ ព្រោះថា ជារៀងរាល់ព្រឹកនៅត្រង់ចំណុចកើតហេតុខាងលើនោះ មានកម្មករដើរឆ្លងកាត់ និងឈររង់ចាំជិះរថយន្តទៅធ្វើការយ៉ាងកកកុញ។
តាមប្រភពពីនគរបាលប៉ុស្តិ៍ចោមចៅ៣បាននិយាយថា គ្រោះថ្នាក់ចរាចរណ៍ខាងលើនេះបណ្ដាលមកពីអ្នកបើកបរងងុយដេកហើយងោកមួយភាំងទើបរេចង្កូតធ្លាក់ផ្លូវទៅបុកបង្គោលភ្លើង និងធ្លាក់ចូលប្រឡាយបែបនេះ ប៉ុន្តែអ្នកបើកបរនិងអ្នករួមដំណើរសុទ្ធតែមានសុវត្ថិភាពទាំងអស់គ្នា។ ម្យ៉ាងដោយសារតែគ្រោះថ្នាក់នេះបណ្តាលឱ្យខូចខាតបង្គោលភ្លើងដែលជាទ្រព្យសម្បត្តិរបស់រដ្ឋ ទើបត្រូវរាយការណ៍ជូនទៅខាងនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីឱ្យចុះមកវាស់វែង និងនាំយករថយន្តទៅរក្សាទុក រង់ចាំធ្វើការការដោះស្រាយនៅពេលក្រោយ៕ (កែសម្រួលដោយ ៖ ធីតា)
ចែករំលែកព័តមាននេះ