រាជធានីភ្នំពេញ ៖ យោងតាមគេហទំព័រអគ្គស្នងការនគរបាលជាតិបានឲ្យដឹងថា ក្រុមហេគឃឺ (Hacker) អនាមិកកម្ពុជាចំនួន០២នាក់ ដែលជាប់ពាក់ព័ន្ធការវាយប្រហារទ្រង់ទ្រាយធំមកលើបណ្តាញបច្ចេកវិទ្យាព័ត៌មានរបស់ស្ថាប័នជាតិសំខាន់ៗនាពេលកន្លងមក ត្រូវបានប៉ូលិសការិយាល័យប្រឆាំងបទល្មើសបច្ចេកវិទ្យាព័ត៌មាន នៃនាយកដ្ឋានសន្តិសុខផ្ទៃក្នុងអគ្គស្នងការដ្ឋាននគរបាលជាតិ ក្រសួងមហាផ្ទៃ ឃាត់ខ្លួនកាលពីថ្ងៃទី០៧ មេសា ២០១៤ ។
ជនសង្ស័យទាំងពីរនាក់ ម្នាក់ឈ្មោះ ប៊ុន ឃីងមង្គលបញ្ញា ហៅ Sexmachine ឬ Blackcyber ភេទប្រុស អាយុ២១ឆ្នាំ មុខរបរនិស្សិតឆ្នាំទី០៣ សាកលវិទ្យាល័យ SETEC និង ឈ្មោះ ជូ សុងហេង ហៅZoro ភេទប្រុស អាយុ២១ឆ្នាំ មុខរបរនិស្សិតឆ្នាំទី០៣ សាកលវិទ្យាល័យ SETEC ។
បើតាមគេហទំព័រដដែលបានបង្ហាញទៀតថា ស្ថានប័នជាតិសំខាន់ៗយ៉ាងហោចណាស់៣០ និង ស្ថាប័នឯកជនមួយចំនួនផងដែរ ត្រូវរងគ្រោះពីការវាយប្រហារតាមបច្ចេកវិទ្យាព័ត៌មានពីសំណាក់ក្រុមហេគឃឺអនាមិកកម្ពុជា ចាប់តាំងពីមុនការបោះឆ្នោតជ្រើសតំាងតំណាងរាស្ត្រនីតិកាលទី៥ កាលពីខែកក្កដា ឆ្នាំ២០១៣ ។ ស្ថាប័នជាតិសំខាន់ៗ ដែលទទួលរងគ្រោះមានដូចជា៖ គណៈកម្មាធិការជាតិរៀបចំការបោះឆ្នោត អង្គភាពប្រឆាំងអំពើពុករលួយ ក្រសួងការបរទេសនិងសហប្រតិបត្តិការអន្តរជាតិ ក្រសួងការពារជាតិ និង សាលារាជធានីភ្នំពេញជាដើម។
ក្រុមហេគឃឺអនាមិកកម្ពុជាបានធ្វើសកម្មភាពដូចជា វាយប្រហារធ្វើឲ្យរអាក់រអួលមិនដំណើរការគេហទំព័រ (DDos) ជ្រៀតចូលបណ្តាញព័ត៌មានវិទ្យាដោយខុសច្បាប់ និងលួចទិន្នន័យសំងាត់ជាតិពីប្រព័ន្ធព័ត៌មាន និង ការកែទំព័រដើមនៃគេហទំព័រជាដើម។
ជនសង្ស័យទាំងពីរ បានសារភាពថាខ្លួនពិតជាសមាជិកក្រុមហេគឃឺអនាមិកកម្ពុជា និងបានប្រព្រឹត្តនូវរាល់ទង្វើខុសច្បាប់ដូចបានរៀបរាប់ខាងលើពិតប្រាកដមែន ។ដោយឡែកជនសង្ស័យឈ្មោះ ជូ សុងហេង បានសារភាពថា មិនបានចូលរួមការវាយប្រហារនោះទេ គោលបំណងនៃការចូលរួមក្នុងក្រុមហេគឃឺអនាមិករកម្ពុជា គឺគ្រាន់តែចង់ហាត់រៀនជំនាញនេះតែប៉ុណ្ណោះ។
សមត្ថកិច្ចនាយកដ្ឋានសន្តិសុខផ្ទៃក្នុង បានធ្វើការតាមដាននិងសហការស្រាវជ្រាវជាមួយស្ថាប័ន FBI ប្រចាំកម្ពុជាអស់រយៈពេលប្រមាណ០៨ខែ ទើបកំណត់និងឃាត់ខ្លួនជនសង្ស័យទាំងពីរខាងលើបាន។ ទន្ទឹមនោះ សមត្ថកិច្ចក៏បាននិងកំពុងបន្តស្រាវជ្រាវរកមុខសញ្ញាហេគឃឺជាបក្សពួកនៅសេសសល់ ដើម្បីនាំខ្លួនមកចាត់វិធានការតាមផ្លួវច្បាប់។
បច្ចុប្បន្នជនសង្ស័យទាំងពីរត្រូវបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ យោងតាមមាត្រា ៤២៧, ៤២៨, ៤២៩ នៃក្រមព្រហ្មទណ្ឌ ជនសង្ស័យគឺប្រឈមនឹងការពិន័យជាប្រាក់ពី ១០០ ០០០ (មួយសែន) រៀល ដល់ ៤០០០ ០០០(បួនលាន) រៀល និង អាចជាប់ពន្ធនាគាពី០១ខែ រហូតដល់០២ឆ្នាំ ៕
ចែករំលែកព័តមាននេះ