រាជធានីភ្នំពេញ ៖ ក្រុមជម្រេីសជាតិកម្ពុជាបានមកដល់ព្រះរាជាណាចក្រកម្ពុជាវិញហេីយ បន្ទាប់ពីការប្រកួតនៅប្រទេសអុីរ៉ង់ ហេីយក្រុមគោព្រៃយេីងនឹងចាប់ផ្ដេីមហ្វឹកហាត់នៅថ្ងៃស្អែក(ថ្ងៃទី១២ តុលា) ដេីម្បីត្រៀមប្រកួតជាមួយអុីរ៉ាក់ នៅថ្ងៃទី១៥ ខាងមុខនេះ នៅឯពហុកីឡដ្ឋានជាតិ ។ នេះបើយោងតាមផេកសហព័ន្ធកីឡាបាល់ទាត់កម្ពុជា កាលពីយប់ថ្ងៃទី១០ តុលា ។
សូមរំលឹកថា តាមរយៈនៃការផ្សាយបន្តផ្ទាល់តាមកញ្ចក់ទូរទស្សន៍ ជុំវិញការប្រកួតរវាងក្រុមជម្រើសជាតិកម្ពុជាជាមួយនឹងក្រុមម្ចាស់ផ្ទះអុីរ៉ង់ក្នុងវគ្គសន្សំពិន្ទុសម្រាប់ពូលC ពានរង្វាន់ FIFA Word Cup Qatar 2022 នៅកីឡដ្ឋាន Azadi នាទីក្រុងតេហេរ៉ង់ នាយប់ថ្ងៃទី១០ តុលា បន្ទាប់ពីការប្រកួតរយៈពេល៩០នាទី អ្វីដែលត្រូវបានចាប់អារម្មណ៍បំផុតនោះគឺអ្នកគាំទ្រកម្ពុជាមានតែម្នាក់ បានបង្ហាញឆន្ទៈមោះមុតគួរឱ្យមានមោទនភាពជាតិខ្មែរពិតៗ ។
តើអ្នកគាំទ្រតែម្នាក់នៅលើទឹកដីអុីរ៉ង់ ដែលមានអ្នកគាំទ្ររាប់ម៉ឺននាក់នៅកីឡដ្ឋាននោះមានអត្ថន័យបែបណា ? តាមរយៈការទស្សនាតាមកញ្ចក់ទូរទស្ស៍ ពិតជាធ្វើឱ្យប្រជាជាតិខ្មែររំភើបញាប់ញ័រពេកណាស់ ទោះបីសំឡេងស្រែកហ៊ោកញ្ជ្រៀវរបស់ភាគីអុីរ៉ង់ ខណៈដែលគ្រាប់បាល់រហូតដល់១៤គ្រាប់បានបំប៉ោងសំណាញ់កម្ពុជាក៏មិនអាចរារាំងការបន្លឺសំឡេងតាមមីក្រូហ្វូន ការវាយស្គរពីអ្នកគាំទ្រកម្ពុជា ដែលនៅ
ក្រោយខ្នងមានទង់ជាតិកម្ពុជាធំមួយ ពិតជាបញ្ជាក់យ៉ាងច្បាស់ថា ប្រជាជាតិកម្ពុជានៅតែប្រកួតលុះទីបំផុត ។
តើអ្នកគាំទ្រកម្ពុជាដ៏មោះមុត១រូបនេះជាអ្នកណា ? ការពិតអ្នកគាំទ្ររូបនេះឈ្មោះ សុខា រ៉ានាថ គឺជាកូនប្រុសលោកនាយឧត្តមសេនីយ៍ សៅ សុខា ដែលក្រៅតែពីជាមន្ត្រីយោធាជាន់ខ្ពស់ រូបលោកក៏ជាប្រធានសហព័ន្ធបាល់ទាត់កម្ពុជាផងដែរ ។ យើងជាខ្មែរពិតជាមានមោទនភាពពេកណាស់ ចំពោះការបង្ហាញចេញនូវឆន្ទៈកូនខ្មែរពិតៗបែបនេះ ។ ការប្រយុទ្ធលើទីលានវាលស្មៅជាមួយក្រុមអុីរ៉ង់ ពិតណាស់ក្រុមគោព្រៃកម្ពុជាស្ទើរតែគ្មានឱកាសស៊ុតទៅលើក្រុមម្ចាស់ផ្ទះឡើយ ។ ក្រុមអុីរ៉ង់ បានដាក់សម្ពាធលើក្រុមគោព្រៃកម្ពុជាពេញ៩០នាទី ដោយគ្មានការបន្ធូរដៃឡើយ ដោយពួកគេបានទាត់បំប៉ោងសំណាញ់ទីកម្ពុជាចំនួន៧គ្រាប់នៅតង់ទី១ និងបន្ថែម៧គ្រាប់ទៀតនៅតង់ទី២ ដើម្បីទទួលបាន៣ពិន្ទុពេញពីការប្រកួតទី២ របស់ខ្លួននេះក្នុងលទ្ធផល១៤-០ ។
លទ្ធផលនេះគឺជាលើកដំបូងហើយ ដែលកម្ពុជារបូតគ្រាប់បាល់ច្រើនបែបនេះ ក្រោមការដឹកនាំរបស់លោក Keisuke Honda អ្នកចាត់ការទូទៅក្រុមជម្រើសជាតិ និងគ្រូបង្វឹកលោក Felix G.Dalmas ក្នុងរយៈពេលជាង១ឆ្នាំមកនេះ ។ នេះជាការបរាជ័យជាលេីកទី២ ក្នុងចំណោម៣ប្រកួតក្នុងពូលC ដែលធ្វេីឱ្យកម្ពុជាធ្លាក់ទៅបាតតារាងបណ្តោះអាសន្ន មានត្រឹម១ពិន្ទុ ។ ក្រោយពីចប់ការប្រកួត ក្រុមកម្ពុជាធ្វើដំណើរត្រឡប់មកមាតុភូមិវិញហើយនៅរាត្រីថ្ងៃទី១១ខែតុលា ដើម្បីត្រៀមបើកទ្វារទទួលស្វាគមន៍ក្រុម
ជម្រើសជាតិអុីរ៉ាក់វិញម្តង នាថ្ងៃទី១៥ ខែតុលាខាងមុខ នៅទីលានពហុកីឡដ្ឋានជាតិអូឡាំពិក ។
ចាញ់ក្រុមអុីរ៉ង់ ១៤-០ គឺកំណត់ត្រាបរាជ័យធំបំផុតរបស់កម្ពុជា
សម្រាប់បច្ចេកទេសនៃការប្រកួត ត្រូវបាន អ្នកតាមដានមើលឃើញថា ក្រុមជម្រើសជាតិកម្ពុជា បានបរាជ័យដ៏ធ្ងន់ធ្ងរក្នុងលទ្ធផល១៤០ ក្នុងការប្រកួតជម្រុះ World Cup ជុំទី២ ពូលC ដោយសារក្រុមម្ចាស់ផ្ទះអុីរ៉ង់ជាក្រុមលេខ១អាស៊ី ធ្វើឱ្យកម្ពុជាបាត់បង់ឱកាសមាសទម្លាយសំណាញ់ក្រុមអុីរ៉ង់នៅដើមតង់ទី២ បន្ទាប់ពីអ្នកចាំទី Alireza Beiranvand ធ្វើឲ្យ កែវ សុខផេង ដួលនៅតំបន់គ្រោះថ្នាក់។ សុខផេង ជាអ្នកទាត់បាល់ប៉េណាល់ទី ប៉ុន្តែ Alireza Beiranvand ដែលជាអ្នកចាំទីឆ្នើម៤ឆ្នាំជាប់គ្នានៅលីគកំពូលអុីរ៉ង់ និងជាកីឡាករឆ្នើមប្រចាំឆ្នាំ២០១៩ នៅអុីរ៉ង់ សង្គ្រោះបាល់បានយ៉ាងល្អ ។
អ្នកចាំទីអាយុ២៧ឆ្នាំរូបនេះ ក៏ធ្លាប់រារាំងបាល់ប៉េណាល់ទីរបស់ Cristiano Ronaldo នាជំនួបស្មើ ១-១ រវាងក្រុមអុីរ៉ង់ និងក្រុមព័រទុយហ្គាល់ ក្នុងព្រឹត្តិការណ៍បាល់ទាត់ពិភពលោកឆ្នាំ២០១៨កន្លងមកផងដែរ ។ នេះជាលទ្ធផលបរាជ័យដ៏ធ្ងន់ធ្ងរនាពេលនេះរបស់ក្រុមកម្ពុជា ខណៈលទ្ធផលកន្លងមក គឺកើតឡើងនៅឆ្នាំ១៩៩៥ ដែលនៅពេលនោះក្រុមកម្ពុជាបានចាញ់ក្រុមឥណ្ឌូណេស៊ី១០-០ នាព្រឹត្តិការណ៍ស៊ីហ្គេម នៅខេត្តឈៀងម៉ៃ ប្រទេសថៃ ។
ស្ត្រីអុីរ៉ង់៣.៥០០នាក់ទៅមើលជំនួបក្រុមអុីរ៉ង់-កម្ពុជា
ជាលើកដំបូងក្នុងប្រវត្តិសាស្ត្រ រយៈពេលជិត៤០ឆ្នាំដែលស្ត្រីអុីរ៉ង់រាប់ពាន់នាក់ បានទទួលការអនុញ្ញាតឲ្យចូលកីឡដ្ឋានជាថ្មីដើម្បីទស្សនាការប្រកួតកីឡាបាល់ទាត់របស់ក្រុមបុរសក្នុងប្រទេសរបស់ខ្លួន ។ ស្រី្តអុីរ៉ង់ចំនួន៣.៥០០នាក់បានអង្គុយមើលក្រុមជម្រើសជាតិអុីរ៉ង់លត់ក្រុមកម្ពុជាយ៉ាងចាស់ដៃ ។
ក្រោយពេលឃើញស្ត្រីអុីរ៉ង់មានវត្តមានក្នុងកីឡដ្ឋានសាជាថ្មីឡើងវិញ បន្ទាប់ពីមានការហាមប្រាមតាំងពីឆ្នាំ១៩៧៩មកនោះ សហព័ន្ធកីឡាបាល់ទាត់អន្តរជាតិ(FIFA) បានបង្ហាញក្តីរីករាយដោយលើកឡើងថា នេះជាជំហានវិជ្ជមានមួយឆ្ពោះទៅមុខដែលស្ថាប័នខ្លួន និងជាពិសេសក្មេងស្រី និងស្ត្រីអុីរ៉ង់ទន្ទឹងរង់ចាំជាយូរមកហើយ ។«ភាពត្រេកត្រអាល និងភាពរីករាយដែលពួកគេបានបង្ហាញនៅថ្ងៃនេះ គឺពិតជាអស្ចារ្យ និងជាការលើកទឹកចិត្តដ៏ធំមួយដើម្បីបន្តលើផ្លូវដែលកំពុងចាប់ផ្តើមនេះ ។ ប្រវត្ដិសាស្ដ្របង្រៀន
យើងថា វឌ្ឍនភាពកើតឡើងតាមដំណាក់កាល ហើយនេះគ្រាន់តែជាការចាប់ផ្ដើមនៃជំហានដំបូងប៉ុណ្ណោះ» ។ នេះជាសំណេរក្នុងសេចក្តីថ្លែងការណ៍របស់ FIFA ទៅកាន់ភាគីអុីរ៉ង់ ។
នារយៈពេលជាង១០ម៉ោង មុនដំណើរការប្រកួតនាវេលាម៉ោង៨និង៣០នាទី«ម៉ោងនៅកម្ពុជា» សហព័ន្ធកីឡាបាល់ទាត់កម្ពុជា(FFC) បានបង្ហោះរូបថតជាង៣០សន្លឹក ទាក់ទងនឹងការហ្វឹកហាត់របស់ក្រុមជម្រើសជាតិកម្ពុជា ក្រោមការដឹកនាំរបស់អ្នកចាត់ការទូទៅលោក Keisuke Honda និងគ្រូបង្វឹក Felix Dalmas។ ក្នុងចំណោមនោះ យើងសង្កេតឃើញរូបថតមួយសន្លឹកដែលបង្ហាញពីស្នាមញញឹមរបស់ស្ត្រីអុីរ៉ង់៣នាក់ ទៅកាន់កាមេរ៉ាទូរស័ព្ទរបស់លោក Honda។
លោក Honda មិនមានប្រវត្តិប្រកួតជាមួយក្រុមអុីរ៉ង់ឡើយ ប៉ុន្តែក្រុងតេហេរ៉ង់ ក៏មិនមែនជាទឹកដីដែលលោកទើបជាន់ដំបូងនោះដែរ។កាលពីការប្រកួតជម្រុះ World Cup 2018 កីឡដ្ឋាន Azadi នេះ ត្រូវបានប្រើប្រាស់ជាទឹកដីកណ្តាលនៃជំនួបរវាងក្រុមអាហ្វហ្គានីស្ថាន និងក្រុមជប៉ុន ដោយលោក Honda បានស៊ុតបាល់បញ្ចូលទីគ្រាប់ចុងក្រោយនៃជ័យជម្នះ ៦-០ របស់ក្រុមសាមូរ៉ៃ ៕
ចែករំលែកព័តមាននេះ