រាជធានីភ្នំពេញ ៖ រថយន្តកុងតឺន័រ២គ្រឿងបើកប្រដេញគ្នា ដោយរថយន្ដកុងតឺន័របង្កមួយគ្រឿងបើកងាកមកខាងស្តាំវ៉ាជែងរថយន្ដកុងតឺន័រមួយគ្រឿងផ្សេងទៀតនៅពីមុខ ហើយរថយន្តកុងតឺន័រនោះបានជាន់ហ្វ្រាំងឈប់ស្តុបភ្លាមៗដែរ ស្រាប់តែម៉ូតូមួយគ្រឿងជិះគ្នា២នាក់ដែលធ្វើដំណើរមកពីក្រោយចាប់ហ្វ្រាំងមិនទាន់ក៏ជ្រុលទៅបុកគូទរថយន្តកុងតឺន័របង្កនោះយ៉ាងពេញទំហឹង បណ្ដាលឲ្យអ្នកបើកបរម៉ូតូស្លាប់ភ្លាមនៅនឹងកន្លែងកើតហេតុ ចំណែកអ្នករួមម្នាក់ទៀតបានរងរបួសស្រាល។
ហេតុការណ៍ខាងលើនេះកើតឡើងកាលពីវេលាម៉ោង១០និង៤០នាទីយប់ថ្ងៃទី១០ ខែតុលា នៅចំណុចមុខផ្ទះលក់អីវ៉ាន់ចាប់ហួយមួយកន្លែង តាមបណ្ដោយផ្លូវលេខ២៧១កែងនឹងផ្លូវ៣៧១ ស្ថិតនៅក្នុងសង្កាត់ផ្សារដើមថ្កូវ ខណ្ឌចំការមន ។
ជនរងគ្រោះទាំង២នាក់ខាងលើ ក្នុងនោះម្នាក់ឈ្មោះ គីម សីហា ភេទប្រុស អាយុ២៥ឆ្នាំ មុខរបរអ្នកដាក់ទឹកនៅតារាងបាល់ទាត់នៅផ្លូវ៦០ម៉ែត្រ ស្នាក់នៅភូមិ ព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើត នៅស្រុកចំការលើ ខេត្តកំពង់ចាម ជាអ្នកបើកបរម៉ូតូ បានស្លាប់នៅនឹងកន្លែងកើតហេតុ និងម្នាក់ទៀតដែលជាអ្នករួមដំណើររងរបួសស្រាលឈ្មោះលាង ចំរើន ភេទប្រុស អាយុ២៥ឆ្នាំ ស្នាក់នៅផ្ទះលេខ៦១អឺ១ ផ្លូវលេខ៦៣ សង្កាត់បឹងកេងកង១ ខណ្ឌបឹងកេងកង ។ ជនរងគ្រោះទាំង២នាក់ជិះម៉ូតូមួយគ្រឿងម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ ១CU-៤៣៥១ ។
ចំណែករថយន្ដកុងតឺន័របង្កមួយគ្រឿងខាងលើ ពណ៌លឿង ក្បាលរថយន្តគ្មានស្លាកលេខ រីឯកន្ទុយសណ្តោងរ៉ឺម៉ក ពាក់ស្លាកលេខ ព្រះសីហនុ ៤A-២៣៤៩ អ្នកបើកបរមិនស្គាល់អត្តសញ្ញាណ ត្រូវសមត្ថកិច្ចចាប់ឃាត់ខ្លួន។
តាមប្រភពព័ត៌មានពីបុរសជាអ្នករួមដំណើរដែលរងរបួសស្រាលបានប្រាប់ឲ្យដឹងថា នៅមុនពេលកើតហេតុ ពួកគាត់បានហូបគ្រឿងស្រវឹងតិចតួចនៅកន្លែងធ្វើការរបស់ជនរងគ្រោះ នៅតារាងបាល់ទាត់ម្តុំផ្លូវ៦០ម៉ែត្រ លុះផឹកចប់ក៏នាំគ្នាជិះម៉ូតូមួយគ្រឿងទៅផ្ទះ ដោយជនរងគ្រោះបានឌុបជូនគាត់ទៅផ្ទះ ហើយជនរងគ្រោះបន្តដំណើរទៅផ្ទះរបស់ខ្លួននៅពោធិចិនតុង ។
តាមប្រភពដដែលបានបន្តថា លុះពួកគាត់ជិះម៉ូតូធ្វើដំណើរតាមបណ្តោយផ្លូវលេខ២៧១ ក្នុងទិសដៅពីត្បូងក្នុងល្បឿនលឿន មកដល់ចំណុចកើតហេតុខាងលើ ស្រាប់តែមានរថយន្តកុងតឺន័រ២គ្រឿងបើកប្រដេញគ្នា ដោយរថយន្ដកុងតឺន័របង្កមួយគ្រឿងខាងលើបានបើកងាកមកខាងស្តាំវ៉ាជែងរថយន្ដកុងតឺន័រមួយគ្រឿងផ្សេងទៀតនៅពីមុខ ហើយរថយន្តកុងតឺន័រនោះបានជាន់ហ្វ្រាំងឈប់ស្តុបភ្លាមៗដែរ បណ្ដាលអោយម៉ូតូរបស់ពួកគាត់ដែលធ្វើដំណើរពីក្រោយចាប់ហ្វ្រាំងម៉ូតូមិនទាន់ក៏ជ្រុលទៅបុកគូទរថយន្តកុងតឺន័រយ៉ាងពេញទំហឹង បណ្តាលឱ្យអ្នកបើកបរម៉ូតូស្លាប់ភ្លាមៗនៅកន្លែងកើតហេតុ ចំណែកគាត់ដែលអង្គុយពីក្រោយរងរបួសស្រាល ។
តាមប្រភពដដែលបានបន្តថា បន្ទាប់ពីកើតហេតុ រថយន្តកុងតឺន័រមួយគ្រឿងខាងលើនោះមិនបានឈប់នៅកន្លែងកើតហេតុនោះទេ ព្រមទាំងបានព្យាយាមបើកគេចខ្លួនតាមបណ្តោយផ្លូវ៣៧១ រហូតដល់មុខផ្សារប៉េសេ ក៏ត្រូវបានសមត្ថកិច្ចឃាត់ជាប់ទាំងរថយន្តនិងអ្នកបើកបរបានតែម្តង។
ក្រោយពេលកើតហេតុ កម្លាំងសមត្ថកិច្ចមូលដ្ឋានបានចុះមកដល់កន្លែងកើតហេតុ និងបានធ្វើការទំនាក់ទំនងទៅសមត្ថកិច្ចជំនាញចរាចរណ៏ក្រុងចុះមកវាស់វែងយករថយន្តកុងតឺន័រ រួមជាមួយម៉ូតូ ព្រមទាំងអ្នកបើកបររថយន្តកុងតឺន័រទៅកាន់ការិយាល័យនគរបាលចរាចរណ៍ផ្លូវគោក នៃស្នងការនគរបាលរាជធានីរាជធានីភ្នំពេញ ដើម្បីដោះស្រាយតាម ច្បាប់នៅពេលក្រោយ ។ ចំណែកសពរងគ្រោះត្រូវបានសាច់ញាតិនិងប្រពន្ធមកដល់បានស្រែកយំឱបសពប្តីទាំងក្តីរន្ធត់ចិត្ត ។ សពជនរងគ្រោះត្រូវក្រុមគ្រួសារដឹកយកទៅធ្វើបុណ្យតាមប្រពៃណីនៅវត្តពោធិចិនតុង ៕ (កែសម្រួលដោយ ៖ ធីតា)
ចែករំលែកព័តមាននេះ