ខេត្តក្រចេះ៖ ប្រជាពលរដ្ឋនិងអ្នកធ្វើដំណើរ បានធ្វើការរិះគន់ដល់ការស្ថាបផ្លូវរបស់អាជ្ញាធរថា គ្មានសណ្តាប់ធ្នាប់ ក្រោយមានការចាក់គំនរថ្មជាច្រើនកន្លែង និងបានបង្កឲ្យ មានគ្រោះថ្នាក់ចរាចរណ៏ដល់អ្នកធ្វើដំណើរជាបន្តបន្ទាប់។ គ្រោះថ្នាក់ចរាចរណ៏សារជាថ្មីមួយករណីទៀតបានកើតឡើងកាលពីវេលាយប់ថ្ងៃទី២០ មេសា នៅចំណុចរការកណ្តាល បណ្តាលឲ្យបុរសម្នាក់រងរបួសបាក់ដងកាំបិតធ្ងន់ធ្ងរ បន្ទាប់ពីជនរងគ្រោះជិះម៉ូតូបុកគំនរថ្មធ្វើផ្លូវដែលត្រូវគេចាក់គរពេញចិញ្ចើមផ្លូវ។
នគរបាលនិយាយថា ជនរងគ្រោះឈ្មោះ សាន ពៅ អាយុ២៣ឆ្នាំ មានទីលំនៅក្នុងសង្កាត់រការកណ្តាល ក្រុងក្រចេះ បានរងរបួសបាក់ដងកាំបិត យ៉ាងធ្ងន់ធ្ងរ។ នគរបាលឲ្យដឹងទៀតថា នៅយប់ថ្ងៃកើតហេតុ ជនរងគ្រោះបានជិះម៉ូតូម្នាក់ឯង និងបានជ្រុលទៅបុកគំនរថ្មនៅចិញ្ចើមផ្លូវ បណ្តាលឲ្យដួលសន្លប់ ខណៈដែលផ្លូវមានសភាពហុយខ្លាំងមើលមិនមុខឃើញ។
គួរបញ្ជាក់ថា ផ្លូវក្រាលកៅស៊ូមួយខ្សែ ចេញពីទីរួមខេត្តឆ្ពោះទៅសង្កាត់រការកណ្តាលគឺត្រូវអាជ្ញាធរខេត្ត បានសម្រេចជីកភ្ជួរដើម្បីជួសជុលសារជាថ្មី មានរយៈពេលជាច្រើន ខែមកហើយ តែនៅមិនទាន់សម្រេច។
ប្រជាពលរដ្ឋក៏ដូចជាអ្នកធ្វើដំណើរ បានសម្តែងនូវការរអ៊ូរទាំទៅលើការជួសជុលផ្លូវមួយខ្សែ មានប្រវែងជាង២គីោឡូម៉ែត្រនេះថាមានភាពយឺតយ៉ាវ គឺមិនត្រឹមតែហុយមើលគ្នាមិនឃើញ និងបានបង្កឲ្យមានគ្រោះថ្នាក់ចរាចរណ៍ជាបន្តបន្ទាប់ ក្រោយពីការជួលជុលរបស់ អាជ្ញាធរជំនាញគ្មានសណ្តាប់ធ្នាប់ គឺចាក់ដីថ្មពង្រាយពេញចិញ្ចើមផ្លូវ និងការចតគ្រឿងចាក់ទុកចោលនោះ៕
ចែករំលែកព័តមាននេះ