ខេត្តមណ្ឌលគិរី ៖ ករណីបាញ់ប្រហារលើមន្ត្រីការពារព្រៃឈើចំនួន៣នាក់ក្នុងខេត្តមណ្ឌលគិរី បណ្តាលឱ្យស្លាប់ ត្រូវបានចៅក្រមសាលាដំបូងរាជធានីភ្នំពេញសម្រេចផ្ដន្ទាទោសជនដៃដល់ដាក់គុកអស់មួយជីវិត និងបក្ខពួកចំនួន៥នាក់ទៀត ក្នុងម្នាក់ៗជាប់ទោសចំនួន៣០ឆ្នាំ។
សេចក្ដីរាយការណ៍បានឲ្យដឹងថា កាលពីថ្ងៃទី៨ តុលា ២០១៩ តុលាការសម្រេចផ្ដន្ទាទោសដាក់ពន្ធនាគារអស់មួយជីវិតចំពោះជនដៃដល់ម្នាក់ឈ្មោះ ផល ពេញ ជាអ្នកបាញ់សម្លាប់ជនរងគ្រោះដោយផ្ទាល់ ។ចំណែកបក្ខពួកដទៃទៀតដែលពាក់ព័ន្ធនឹងឃាតកម្មនេះដែរ ត្រូវផ្ដន្ទាទោសម្នាក់ៗដាក់ពន្ធនាគារចំនួន៣០ឆ្នាំ គិតពីថ្ងៃចាប់ឃុំខ្លួន ។
ជនដៃដល់ក្នុងករណីបាញ់សម្លាប់នោះឈ្មោះ ផល ពេញ ភេទប្រុស ជានាយនគរបាលប៉ុស្ដិ៍អូររលែ នៃវរការពារព្រំដែនគោកលេខ៦២១ នៃស្នងការដ្ឋាននគរបាលខេត្តមណ្ឌលគិរី ត្រូវបានចាប់ខ្លួនកាលព្រឹកថ្ងៃទី២ ខែកុម្ភៈ ឆ្នាំ២០១៨ ស្ថិតនៅហាងគុយទាវមួយកន្លែង ក្នុងស្រុកមេមត់ ខេត្តត្បូងឃ្មុំ គឺជាអ្នកបាញ់ផ្ទាល់ទៅលើជនរងគ្រោះទាំង៣នាក់ ។
ចំណែកជនសង្ស័យចំនួន៥នាក់ដែលជាប់ពាក់ព័ន្ធករណីខាងលើនេះ ក្នុងនោះ១-ឈ្មោះ កើត វេហា ហៅឆៃ ជាទាហានការពារព្រំដែន ត្រូវបានចាប់ខ្លួនកាលពីយប់ថ្ងៃទី៣១ ខែមករា ឆ្នាំ២០១៨ ជាជនពាក់ព័ន្ធ ២-ឈ្មោះ កើត វេតា ជាទាហានការពារព្រំដែន ៣-ឈ្មោះ ឡាយ សាវី ជាទាហានការពារព្រំដែន ៤-ឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ ដែលអ្នកទាំង៤នេះ ត្រូវបានចាប់ខ្លួនកាលពីយប់ថ្ងៃទី១ ខែកុម្ភៈ ឆ្នាំ២០១៨ និង៥-ឈ្មោះ ឈាង វ៉ាន់និត ត្រូវជាប្អូនថ្លៃរបស់ឈ្មោះ ផល ពេញ ត្រូវបានចាប់ខ្លួនកាលពីរសៀលថ្ងៃទី២ ខែកុម្ភៈ ឆ្នាំ២០១៨ ។
សូមរំឮកថា ករណីបាញ់ប្រហារខាងលើនេះបានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះម៉ោង៤ ទៅម៉ោង៥ល្ងាចថ្ងៃទី៣០ ខែមករា ឆ្នាំ២០១៨ បានបណ្ដាលឲ្យស្លាប់មនុស្សចំនួន៣នាក់ ក្នុងនោះរួមមាន ១-មន្ដ្រីអាវុធហត្ថលើផ្ទៃប្រទេសម្នាក់ ឈ្មោះ សេក វឌ្ឍនា ២-មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និង៣-បុគ្គលិកអង្គការសមាគម អភិរក្សាសត្វព្រៃ Wildlife Conservation Society (WCS) ឈ្មោះ ថុល ខ្នា ។ ករណីបាញ់ប្រហារនេះផ្តើមចេញពីគំនុំនៃបទល្មើសព្រៃឈើ ៕ (កែសម្រួលដោយ ៖ ធីតា)
ចែករំលែកព័តមាននេះ