តាមទីភ្នាក់ងារព័ត៌មានកូរ៉េខាងត្បូង YONHAP ថា ប្រតិបត្តិការតាមរកអ្នកបាត់ខ្លួនជាង២៤០នាក់ទៀតដោយសារការលិចនាវាឈ្មោះ SEWOL ក្នុងដែនទឹកនៃកោះជីនដូភាគនិរតីឧបទ្វីបកូរ៉េបន្តធ្វើទៀតនាថ្ងៃទី២១ មេសា ជាថ្ងៃទី៦ ក្រោយការលិចនាវានេះ ។ នាព្រឹកព្រលឹមថ្ងៃទី២១ មេសា ពួកអ្នកជួយសង្គ្រោះរកឃើញសាកសពមនុស្ស៣នាក់ទៀតធ្វើឱ្យចំនួនជនរងគ្រោះដែលស្រង់ចេញពីទឹកឡើងដល់៦១នាក់ គិតត្រឹមម៉ោង៨ព្រឹក ។
អ្នកមុជទឹកជាច្រើនរយនាក់បន្តមុជតាមរកពួកអ្នកបាត់ខ្លួន ខណៈមនុស្ស២១៤នាក់ទៀតនៅតែបាត់ខ្លួន ។ ការជួយសង្គ្រោះដោយប្រើនាវាមុជទឹកគ្មានមនុស្សជិះមួយគ្រឿងជាជំនួយ នាវា៩០គ្រឿងរបស់បូ៉លិសសមុទ្រ នាវា៣២គ្រឿងរបស់កងម៉ារីន នាវាឯកជន៩០គ្រឿង យន្តហោះ៣៤គ្រឿង និងអ្នកជួយសង្គ្រោះ៥៥៦នាក់ ក្នុងនោះរួមមានពួកអ្នកមុជទឹកនៅបន្តប្រតិបត្តិការតាមរកអ្នកបាត់ខ្លួនទៀត ។
នាវាឈ្មោះ SEWOL ដែលលិចមានចំណុះ៦.៨២៥តោន ។ នាវានេះចាកចេញពីទីក្រុងកំពង់ផែ INCHEON របស់កូរ៉េខាងត្បូងកាលពីយប់ថ្ងៃទី១៥ មេសា ទៅកាន់កោះទេសចរណ៍ JEJU បានលិចនៅជិតកោះជីនដូ ចុងនិរតីនៃប្រទេសកូរ៉េខាងត្បូង ។ ក្នុងចំណោមមនុស្ស៤៧៦នាក់ជិះក្នុងនាវានេះមានសិស្សសាលាដល់ទៅ៣២៥នាក់ និងគ្រូបង្រៀន១៥នាក់ដែលត្រូវធ្វើដំណើរសិក្សារយៈពេល៤ថ្ងៃ ។
សាច់ញាតិគ្រួសារជនរងគ្រោះ ព្រមទាំងសាធារណជនកាន់តែមានកំហឹងចំពោះការផ្តល់ព័ត៌មានមិនច្បាស់របស់រដ្ឋាភិបាលទាក់ទិនដល់ការលិចនាវានេះ ។ ក្រោយពេលនាវានេះលិចកាលពីថ្ងៃទី១៦ មេសា ក្រសួងសន្តិសុខ និងរដ្ឋបាលសាធារណៈប្រកាសថា មនុស្សដល់ទៅ៣៦៨នាក់ត្រូវបានជួយសង្គ្រោះ ។ បុ៉ន្មានម៉ោងក្រោយមកតួលេខនេះធ្លាក់មកនៅត្រឹមតែ១៦៤នាក់បុ៉ណ្ណោះ ។
លោក LEE KYUNG-OK អនុរដ្ឋមន្ត្រីក្រសួងនោះពន្យល់ថា ព័ត៌មានមិនច្បាស់នេះបណ្តាលមកពីសេចក្តីរាយការណ៍ច្របូកច្របល់របស់តួអង្គផ្សេងៗដែលមានវត្តមាននៅកន្លែងនាវាលិច ។ តុល្យការក្រោយមកមានការប្រែប្រួលជាច្រើនលើកមុនពេលកំណត់នាថ្ងៃទី១៨ មេសា ពីចំនួនអ្នកជួយសង្គ្រោះថា មាន១៧៤នាក់ ។
ទោះបីជាកាពីតែននាវានោះចាកចេញពីនាវាមុនអ្នកដំណើរភាគច្រើន តែមានក្មេងស្រីសិស្សសាលាម្នាក់នាង PARK JI YOUNG បានសុខចិត្តបូជាជីវិតនាងជួយសង្គ្រោះអ្នកដំណើរជាច្រើននាក់ ដោយចែកអាវពោងដល់ពួកគេ ។ បណ្តាសិស្សសាលាដែលនៅរស់រានមានជីវិត ក៏អះអាងផងដែរថា គ្រូៗពួកគេក៏ខិតខំជួយឱ្យមនុស្សចេញពីនាវាកំពុងលិចដែរ ។ ចំណែកការស្លាប់របស់សាស្ត្រាចារ្យ២នាក់ត្រូវបានអះអាង ហើយសាស្ត្រាចារ្យ១០នាក់ក្នុងចំណោមសាស្ត្រាចារ្យទាំង១៥នាក់ដែលរួមដំណើរជាមួយសិស្សនៅតែបាត់ខ្លួន ។ រីឯសាស្ត្រាចារ្យម្នាក់ដែលនៅរស់រានមានជីវិតត្រូវជានាយករងសាលាបានចងកសម្លាប់ខ្លួននៅលើកោះជីនដូ ៕
ចែករំលែកព័តមាននេះ