មន្ត្រី​ជំនាញ​ថា សង្ស័យ​បុគ្គលិក​ពុល​មក​ពី​មី ក្រោយ​ចុះ​ពិនិត្យ​ក្នុង​ហាង​ខារ៉ាអូខេ


ខេត្តស្វាយរៀង ៖ កាលពី​ព្រឹក​ថ្ងៃ​ទី​៩ ខែតុលា ឆ្នាំ​២០១៩ មន្ត្រី​សាខា​កាំកុងត្រូល​ខេត្តស្វាយរៀង​សហការ​ជាមួយ​អាវុធហត្ថ​ក្រុង​បា​វិត​និង​មន្ត្រី​សាលាក្រុង​បា​វិត​បាន​ចុះ​ពិនិត្យ​ស្ថានភាព​ជាក់ស្តែង​នៅ​ហាង​ខារ៉ាអូខេ​យីហោ «​ហ្វា​ង​ថា​ង​ល៊ាំ​ង​ហ្វា​ន់​លៀន​ស័​រ​» នៅ​ក្រុង​បា​វិត ហើយ​ការ​ចុះ​ពិនិត្យ​នេះ​ដោយ​មានការ​សហការ​ពី​ម្ចាស់​ហាង​ខាងលើ​ផង​ដែរ​ ដើម្បី​យក​មី​និង​បន្លែ ដែល​បុគ្គលិក​ហាង​ហូប​បណ្តាល​ឱ្យ​ពុល និង​យក​មី​ព្រមទាំង​បន្លែ​ទាំងនោះ​ទៅ​ធ្វើតេស្ត​រក​សារធាតុពុល​នៅ​មន្ទីរពិសោធន៍​ឡា​បូ​ឯ​រាជធានី​ភ្នំពេញ​។

បើ​តាម​លោក​ហោ ដា​រ៉េ​ត អនុប្រធាន​សាខា​កាំកុងត្រូល​ខេត្តស្វាយរៀង​បាន​ថ្លែង​បញ្ជាក់​ប្រាប់​អ្នក​សារព័ត៌មាន​ប្រចាំ​ខេត្តស្វាយរៀង​ឱ្យ​ដឹង​ថា ដោយ​មានការ​ណែនាំ​ពី​លោក​ផឹង និល ប្រធាន​សាខា​កាំកុងត្រូល​ខេត្ត​, លោក​និង​មន្ត្រី​បាន​សហការ​ជាមួយ​អាជ្ញាធរ​ដែនដី និង​សមត្ថកិច្ច​កិច្ច​កងរាជអាវុធហត្ថ​ចុះ​ពិនិត្យ​រក​មូលហេតុ​នៃ​ការ​ពុល​អាហារ​នៅ​ហាង​ខារ៉ាអូខេ​ខាងលើ​នេះ ហើយ​ជំហាន​ដំបូង​មន្ត្រី​ជំនាញ​បាន​យក​មី​ម៉ាក​មី​គី ផលិត​នៅ​ប្រទេស​វៀតណាម និង​បន្លែ​ស្ពៃ​តឿ ស៊ុត ព្រមទាំង​ទឹក​ស៊ុប ទៅ​ធ្វើតេស្ត​ដើម្បី​ពិនិត្យ​រក​សារធាតុពុល​ឲ្យ​ដឹង​ច្បាស់​ថា ពុល​បណ្តា​មក​ពី​អ្វី​ឲ្យ​ពិតប្រាកដ​។

ទោះបី​យ៉ាងណា បើ​តាម​មន្ត្រី​ជំនាញ​បាន​បញ្ជាក់​ថា ជំហាន​ដំបូង​ករណី​ពុល​នេះ​គឺ​សង្ស័យ​មក​ពី​ពុល​មី​ម៉ាក​មី​គី​តែ​ម្តង តែ​ដើម្បី​ឲ្យ​ដឹង​ច្បាស់​នោះ​រង់ចាំ​លទ្ធផល​ពី​មន្ទីរពិសោធន៍​ឡា​បូ​នៅ​ឯ​រាជធានី​ភ្នំពេញ​សិន ទើប​អាច​បញ្ជាក់​ឲ្យ​ដឹង​ច្បាស់ ។

តាម​ប្រភព​ដដែល​បាន​បន្ត​ទៀត​ថា «​មន្ត្រី​ជំនាញ​យើង​បាន​ចុះ​ទៅ​ដល់​កន្លែង​ទីតាំង​លក់​មី​វៀតណាម​នៅ​ក្នុង​សង្កាត់​បា​វិត​ដើម្បី​ណែនាំ​ដល់​អ្នកលក់​មី​ប្រភេទ​នេះ​បញ្ឈប់​លក់​ជា​បណ្តោះអាសន្ន​សិន រង់ចាំ​មន្ត្រី​ជំនាញ​ធ្វើការ​ពិសោធន៍​ថា​តើ​មាន​ជាតិពុល​ឬ​អត់ តែបើ​មិន​មាន​ទេ​ទើប​អនុញ្ញាត​ឲ្យ​លក់​បន្ត ។ ផ្ទុយ​ទៅ​វិញ បើ​រក​ឃើញ​មី​មាន​ជាតិពុល​វិញ​នោះ​គឺ​មិន​អនុញ្ញាត​ឲ្យ​លក់​មីនេះ​ទៀត​ជា​ដាច់ខាត​»​។

បើ​តាម​ស្ត្រី​ម្នាក់​ដែល​បំរើ​ការងារ​នៅ​ក្នុង​ហាង​ខារ៉ាអូខេ​ខាងលើ​នេះ​បាន​ឲ្យ​ដឹង​ថា នៅ​វេលា​ម៉ោង​១​និ​៣០​នាទី​រំលង​អា​ធ្រា​ត្រ​ឈាន​ចូល​ថ្ងៃ​ទី​៧ ខែតុលា ឆ្នាំ​២០១៩ នៅ​ហាង​ខារ៉ាអូខេ «​ហ្វា​ង​ថា​ង​ល៊ាំ​ង​ហ្វា​ន់​លៀន​ស័​រ​» បាន​នាំ​គ្នា​ហូប​មី​ម៉ាក​មី​គី ដោយ​បាន​ឆុង​ជាមួយ​ទឹក​ធម្មតា​និង​លាយ​ស្ពៃ​តឿ ស្រាប់តែ​មួយសន្ទុះ​ក្រោយមក មាន​អាកា​រៈ​មិន​ស្រួលខ្លួន ដោយ​អ្នកខ្លះ​វិលមុខ​ក្អួតចង្អោរ និង​រាករូស​ថប់ដង្ហើម​ជាដើម ត្រូវ​បាន​មេការ​ខារ៉ាអូខេ​ខាងលើ​បញ្ជូន​ទៅ​សង្គ្រោះ​ភ្លាម​ៗ​នៅ​គ្លីនិក​ឯកជន​មួយ​កន្លែង​នៅ​ក្រុង​បា​វិត​។

តាម​ប្រភព​ពី​ស្ត្រី​ដដែល​បាន​បញ្ជាក់​ថា ជា​រៀងរាល់ថ្ងៃ ពួក​គេ​មិនសូវ​ហូប​មី​ទេ គឺ​ហូប​បាយ​ជាមួយ​ម្ហូប​ធម្មតា ហើយ​នៅ​ថ្ងៃ​កើតហេតុ ដោយសារ​តែ​ចុងភៅ​អត់​នៅ ទើប​បុគ្គលិក​នាំ​គ្នា​ឆុង​មី​ហូប ស្រាប់តែ​ពុល​តែ​ម្តង​ទៅ​។

សូម​រំលឹក​ផង​ដែរ​ថា កាលពី​ថ្ងៃ​ទី​៨ តុលា​កន្លង​ទៅ មន្ត្រី​មន្ទីរ​សុខាភិបាល​ខេត្ត​បាន​ចុះ​ទៅ​ពិនិត្យ​នៅ​ខារ៉ាអូខេ​ខាងលើ​នេះ​ដែរ ក៏​ប៉ុន្តែ​ត្រូវ​ដកថយ​វិញ ហើយ​លោក​ឈូក បណ្ឌិត មន្ត្រី​មន្ទីរ​សុខាភិបាល​ខេត្ត​បាន​ប្រាប់​ថា មូលហេតុ​សមត្ថកិច្ច​នគ​បាល​និង​អាជ្ញាធរ​មិន​សហការ​ ទើប​ថៅកែ​ចិន​មិន​អនុញ្ញាត​ឲ្យ​ចូល​ពិនិត្យ ត្រូវ​ដកថយវិញ​ រីឯ​មន្ត្រី​កាំកុងត្រូល​បាន​សុំ​ការ​សហការ​ពី​កម្លាំង​កងរាជអាវុធហត្ថ ទើប​ថៅកែ​ចិន​ព្រម​បើកទ្វា​ឲ្យ​ចូល​ពិនិត្យ ក៏​ប៉ុន្តែ​សោកស្តាយ​ដោយ​មិន​បាន​ពិនិត្យ​សំណាក​ដែល​មាននៅ​ក្នុង​រោង​បាយ ក្រោយ​ពេល​បុគ្គលិក​កើត​មាន​អាកា​រៈ​ពុល​ភ្លាម​ៗ៕ (​កែសម្រួល​ដោយ ៖ ធីតា​)

Facebook Google Twitter Email

ព្រឹត្តិការណ៍សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ