រាជធានីភ្នំេពញ ៖ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសអំពីប្រតិទិនសម្រាប់ថ្ងៃឈប់សម្រាករបស់កម្មករនិយោជិតក្នុងវិស័យការងារនៅក្នុងឆ្នាំ២០២០ ។ ក្រសួងការងារនិងបណ្តុះបណ្តាលវិជ្ជាជីវៈបានចេញសេចក្តីប្រកាសចេញផ្សាយកាលពីថ្ងៃទី៤ ខែតុលា ឆ្នាំ២០១៩ បានឲ្យដឹងថា ត្រូវបានអនុញ្ញាតឱ្យកម្មករនិយោជិតនៃសហគ្រាស គ្រឹះស្ថានទាំងអស់ ដែលមានចែងក្នុងមាត្រា១នៃច្បាប់ស្តីពីការងារ បានឈប់សម្រាក ការងារដោយមានប្រាក់ឈ្នួល តាមប្រតិទិនដូចខាងក្រោម ៖
-ថ្ងៃទី១ ខែមករា ទិវាចូលឆ្នាំសកល សម្រាក១ថ្ងៃ
-ថ្ងៃទី៧ ខែមករា ទិវាជ័យជម្នះលើរបបប្រល័យពូជសាសន៍ សម្រាក១ថ្ងៃ
-ថ្ងៃទី៨ ខែមីនា ទិវាអន្តរជាតិនារី សម្រាក ១ថ្ងៃ
-ថ្ងៃទី១៣-១៤-១៥-១៦ ខែមេសា ពិធីបុណ្យ
ចូលឆ្នាំថ្មីប្រពៃណីជាតិ ឆ្នាំជូត ទោស័ក សម្រាក ៤ថ្ងៃ
-ថ្ងៃទី១ ខែឧសភា ទិវាពលកម្មអន្តរជាតិ សម្រាក១ថ្ងៃ
-ថ្ងៃទី៦ ខែឧសភា ពិធីបុណ្យវិសាខបូជា សម្រាក១ថ្ងៃ
-ថ្ងៃទី១០ ខែឧសភា ព្រះរាជពិធីច្រត់ព្រះនង្គ័ល សម្រាក១ថ្ងៃ
-ថ្ងៃទី១៤ ខែឧសភា ព្រះរាជពិធីបុណ្យចម្រើនព្រះជន្ម ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណា ចក្រកម្ពុជា សម្រាក១ថ្ងៃ
-ថ្ងៃទី១៨ ខែមិថុនា ព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ សម្រាក១ថ្ងៃ
-ថ្ងៃទី១៦-១៧-១៨ ខែកញ្ញា ពិធីបុណ្យភ្ជុំបិណ្ឌ សម្រាក៣ថ្ងៃ
-ថ្ងៃទី២៤ ខែកញ្ញា ទិវាប្រកាសរដ្ឋធម្មនុញ្ញ សម្រាក១ថ្ងៃ
-ថ្ងៃទី១៥ ខែតុលា ទិវាប្រារព្ធពិធីគោរពព្រះវិញ្ញាណក្ខន្ធ ព្រះករុណាព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ«ព្រះបរមរតនកោដ្ឋ» សម្រាក១ថ្ងៃ
-ថ្ងៃទី២៩ ខែតុលា ព្រះរាជពិធីគ្រងព្រះបរមរាជសម្បត្តិរបស់ព្រះករុណាព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា សម្រាក១ថ្ងៃ
-ថ្ងៃទី៣០-៣១ ខែតុលា និង១ ខែវិច្ឆិកា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក សម្រាក៣ថ្ងៃ
-ថ្ងៃទី៩ ខែវិច្ឆិកា ពិធីបុណ្យឯករាជ្យជាតិ សម្រាក១ថ្ងៃ ។
ចំពោះថ្ងៃឈប់សម្រាកបុណ្យទាំងឡាយណាដែលត្រូវចំលើថ្ងៃអាទិត្យ នោះកម្មករនិយោជិតនឹងត្រូវបានឈប់សម្រាកមួយថ្ងៃបន្តទៀត។ជាមួយគ្នានេះ ចំពោះសហគ្រាស គ្រឹះស្ថានទាំងឡាយណា ដែលកម្មវត្ថុអាជីវកម្មមានចរិតលក្ខណៈសកលត្រូវប្រព្រឹត្តទៅជាប្រចាំ និងមិនអាចបញ្ឈប់សកម្មភាពបាន ហើយការឈប់សម្រាកបុណ្យនៃកម្មករនិយោជិតទាំងអស់ព្រមគ្នាក្នុងពេលតែមួយនាំឱ្យខូចប្រយោជន៍ដល់សាធារណជន ឬក៏ធ្វើឱ្យខូចដល់ដំណើរការរបស់សហគ្រាសគ្រឹះស្ថាននោះ ម្ចាស់ ឬនាយកសហគ្រាស គ្រឹះស្ថាន ត្រូវរៀបចំបែងចែកឱ្យកម្មករនិយោជិត បានឈប់សម្រាកទៅតាមថ្ងៃបុណ្យនីមួយៗដោយផ្លាស់ប្តូរគ្នា ។
ប្រភពដដែលបន្តថា ករណីមានការព្រម ព្រៀងគ្នារវាងកម្មករនិយោជិតសាមី និងនិយោជក ឬមានចែងនៅក្នុងបទបញ្ជាផ្ទៃក្នុងរបស់សហគ្រាស គ្រឹះស្ថាន ឬអនុសញ្ញារួម ការឈប់សម្រាករបស់កម្មករនិយោជិត អាចអនុវត្តនៅពេលណាមួយផ្សេងទៀត ដែលខុសពីថ្ងៃឈប់សម្រាកបុណ្យដូចមានកំណត់នៅក្នុងប្រកាសនេះ ។
ម្ចាស់ ឬនាយកសហគ្រាស គ្រឹះស្ថាន ត្រូវរៀបចំបញ្ជីឈ្មោះកម្មករនិយោជិតដែលត្រូវផ្លាស់ប្តូរគ្នាឈប់សម្រាកនៅថ្ងៃបុណ្យនីមួយៗ ហើយរក្សាទុកជាប្រចាំសម្រាប់ការត្រួតពិនិត្យរបស់អធិការការងារ។ក្នុងកំឡុងពេលនៃការឈប់សម្រាកដោយផ្លាស់ប្តូរគ្នានេះ ម្ចាស់ ឬនាយកសហគ្រាស គ្រឹះស្ថាន អាចប្រើប្រាស់កម្មករនិយោជិតផ្សេងជាបណ្តោះអាសន្នមកជំនួសកម្មករនិយោជិតដែលបានឈប់សម្រាក ៕
ចែករំលែកព័តមាននេះ