អ្នកស្រី Christina DesMarals គឺជាមនុស្សដែលឲ្យតម្លៃលើការអភិវឌ្ឍន៍ខ្លួន ។ សម្រាប់អ្នកស្រី វាមានន័យថាការទុកសៀវភៅលើតុការងារ តុជិតគ្រែគេង និងនៅក្នុងរថយន្តខ្លួនជាដើម ។…
អ្នកស្រី Christina DesMarals គឺជាមនុស្សដែលឲ្យតម្លៃលើការអភិវឌ្ឍន៍ខ្លួន ។ សម្រាប់អ្នកស្រី វាមានន័យថាការទុកសៀវភៅលើតុការងារ តុជិតគ្រែគេង និងនៅក្នុងរថយន្តខ្លួនជាដើម ។ ហើយខាងក្រោមនេះគឺជាមេរៀនសំខាន់ៗទាក់ទិននឹងគន្លឹះក្នុងការក្លាយជាមនុស្សជោគជ័យដែលអ្នកស្រីកត់ចំណាំពីសៀវភៅដែលអ្នកស្រីបានអាន៖
១. អ្នកត្រូវខិតខំធ្វើការច្រើនជាងអ្នកដទៃ៖
យោងតាមសៀវភៅ Rare Breed: A Guide to Success for the Definat, Dangerous, and Different បានឲ្យដឹងថា មនុស្សភាគច្រើនមិនខិតខំធ្វើការដើម្បីក្លាយជាអ្នកឈានមុខក្នុងវិស័យរបស់ខ្លួនទេ ប៉ុន្តែពួកគេមិនសប្បាយចិត្តពេលដែលមិនអាចឈានមុខអ្នកដទៃ ។ ពួកគេមិនធ្វើការនៅថ្ងៃចុងសប្តាហ៍ ឬមិនមកធ្វើការមុនម៉ោងដើម្បីឆាប់សម្រេចការងារដែលមានក្នុងដៃឡើយ ។
២. កុំស្តីបន្ទោសខ្លួនឯងគ្រប់ពេល៖
យោងទៅតាមលោក David Nichtern ដែលជាអ្នកនិពន្ធសៀវភៅ Creativity, Spirituality and Making a Buck បានប្រាប់មកថា ការស្តីបន្ទោសខ្លួនឯងគ្រប់ពេលគឺជាគំនិតអ្នកក្រ ។ មនុស្សជុំវិញខ្លួនអ្នកប្រហែលជាកំពុងតែគាំទ្រឲ្យអ្នកបរាជ័យ ប៉ុន្តែអ្នកមិនគួរក្លាយមនុស្សម្នាក់ក្នុងចំណោមពួកគេទេ ។ ប្រាកដណាស់ អ្នកត្រូវចេះវាយតម្លៃខ្លួនឯងដោយស្មោះត្រង់លើចំណុចខ្លាំង និងខ្សោយរបស់ខ្លួន ប៉ុន្តែអ្នកមិនគួរចុះចាញ់នឹងការស្តីបន្ទោសរបស់ខ្លួនឡើយ ។
៣. អ្នកត្រូវមានអ្នកណែនាំ៖
សៀវភៅ Aligned: Connecting Your True Self With the Leader You’re Meant to Be ប្រាប់មកថាអាជីវករក៏ត្រូវការគ្រួបង្វឹកដូចកីឡាករដែរព្រោះគ្រូបង្វឹក ឬអ្នកណែនាំអាចជួយអភិវឌ្ឍន៍ទេពកោសល្យ និងផ្តល់ជាការគាំទ្រផ្នែកផ្លូវចិត្តដល់ពួកគេជាដើម ។
៤. ផ្តោតស្មារតីលើអ្វីដែលអ្នកមិនមានពីធម្មជាតិ៖
Joseph Deitch បានបកស្រាយក្នុងសៀវភៅ Elevate: An Essential Guide to Life ថាមនុស្សភាគច្រើនចូលចិត្តផ្តោតស្មារតីលើការអភិវឌ្ឍន៍ចំណុចខ្លាំងរបស់ខ្លួន និងមើលរំលងចំណុចខ្សោយរបស់ខ្លួន ។ ប៉ុន្តែសមត្ថភាពក្នុងការបំពេញការងាររបស់អ្នកនឹងកើនឡើងយ៉ាងខ្លាំងប្រសិនបើអ្នកចាប់ផ្តើមរៀនធ្វើអ្វីដែលអ្នកមិនពូកែធ្វើ ។ វាមិនត្រឹមតែជួយដល់ការបំពេញការងារទេ តែវាជួយដល់រូបភាពដែលអ្នកមានផងដែរព្រោះការប្តេជ្ញាក្នុងការធ្វើអ្វីដែលពិបាកជួយធ្វើឲ្យអ្នកមានភាពឈានមុខដៃគូប្រកួតប្រជែងដទៃ ៕ កែសម្រួលដោយ ៖ សុឃាក់
ចែករំលែកព័តមាននេះ