រាជធានីភ្នំពេញ ៖ ក្នុងអំឡុងបុណ្យចូលឆ្នាំថ្មីប៉ុន្មានថ្ងៃកន្លងមកនេះ ទាំងអ្នកដំណើរ និងអ្នកទេសចរ នៅពេលទៅដល់តំបន់មាត់ទន្លេខាងជើងព្រះបរមរាជវាំង មានការភ្ញាក់ផ្អើល និងងឿងឆ្ងល់ពេលក្រឡេកមើលទៅរូបសំណាកតេជោមាស និងតេជោយ៉ត ហើយឃើញរូបសំណាកតេជោយ៉ត បាត់ដាវពីលើខ្នង ។
រាជធានីភ្នំពេញ ៖ ក្នុងអំឡុងបុណ្យចូលឆ្នាំថ្មីប៉ុន្មានថ្ងៃកន្លងមកនេះ ទាំងអ្នកដំណើរ និងអ្នកទេសចរ នៅពេលទៅដល់តំបន់មាត់ទន្លេខាងជើងព្រះបរមរាជវាំង មានការភ្ញាក់ផ្អើល និងងឿងឆ្ងល់ពេលក្រឡេកមើលទៅរូបសំណាកតេជោមាស និងតេជោយ៉ត ហើយឃើញរូបសំណាកតេជោយ៉ត បាត់ដាវពីលើខ្នង ។
ទាក់ទិននឹងការបាត់ដាវនេះ មន្ត្រីសាលារាជធានីភ្នំពេញម្នាក់បានឱ្យដឹងថា តាមពិតដាវនោះបានជ្រុះមកដី មិនមែនបាត់ទេ តាំងតែពីមានបាតុកម្មរបស់បក្សប្រឆាំងនៅរញ៉េរញ៉ៃទីនោះម្លេ៉ះ និងត្រូវបានអាជ្ញាធរសាលារាជធានីយកមករក្សាទុកសិន ។ មន្ត្រីដដែលនិយាយថា ដោយសារឃើញព័ត៌មានផ្សាយហូរហែពីការបាត់នេះ អាជ្ញាធរនឹងយកដាវនេះទៅបំពាក់លើខ្នងជូនរូបសំណាកតេជោយ៉ត នៅព្រឹកនេះវិញហើយ ។
គួររំឭកថា រូបសំណាកមេទ័ពខ្មែរ «តេជោមាស» និង «តេជោយ៉ត» នេះ ត្រូវបានសាលារាជធានីភ្នំពេញកសាងឡើង នៅសួនច្បារមុខវត្តឧណ្ណាលោម ប្របមាត់ទន្លេសាប (អតីតទីលានព្រះគម្លង់) ដែលបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី១ កញ្ញា ឆ្នាំ២០១២ ត្រូវនឹងថ្ងៃពេញបូណ៌មីខែស្រាពណ៍ ឆ្នាំរោង ចត្វាស័ក ពុទ្ធសករាជ២៥៥៦ ដែលជាទិវាខួបមួយ «ចក្ររាសី» របស់សម្តេចអគ្គមហាសេនាបតីតេជោ ហ៊ុន សែន ។ ពិធីសម្ពោធនេះ ស្ថិតក្រោមអធិបតីភាពលោកជំទាវ ម៉ែន សំអន ឧបនាយករដ្ឋមន្ត្រីប្រចាំការតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ដោយមានការចូលរួមពីមន្ត្រីអ្នកមុខអ្នកការជាច្រើនរូបទៀត ។
មន្ត្រីសាលារាជធានីភ្នំពេញបានឱ្យដឹងថា ការកសាងរូបសំណាកអតីតមេទ័ពខ្មែរដ៏ខ្លាំងពូកែនេះឡើង ព្រោះតេជោមាស និងតេជោយ៉ត មានលក្ខណៈពិសេសជាច្រើន គឺលោកទាំងពីរជាចៅហ្វាយស្រុក និងជាមេទ័ពដែលមានវីរភាពអង់អាចក្លាហាន ធ្វើចម្បាំងឈ្នះមារសត្រូវរាល់លើក មានប្រាជ្ញាឈ្លាសវៃ និងមានប្រជាប្រិយភាពពីគ្រប់មជ្ឈដ្ឋានរបស់មេទ័ពខ្មែរនាសតវត្សទី១៦ ទី១៧ ។ បើតាមការស្រាវជ្រាវរបស់ប្រវត្តិវិទូបានបង្ហាញថា ចាប់តាំងពីការកកើតទឹកដីយើងមក មានអ្នកដឹកនាំដែលមានងារជា «តេជោ» ចំនួន៤៩រូបមកហើយ ។ នៅសតវត្សទី២១នេះ ព្រះរាជាណាចក្រកម្ពុជាយើងមានតួអង្គមួយទៀតដែលមានគោរម្យ៍ងារជា «តេជោ» ដែលលោកមានឈ្មោះពេញគឺ សម្តេចអគ្គមហាសេនាបតីតេជោ ហ៊ុន សែន ។ តេជោសែន មិនត្រឹមតែជាមេទ័ព ឬចៅហ្វាយខេត្តដូចតេជោចំនួន៤៩រូបមុនឡើយ គឺលោកជានាយករដ្ឋមន្ត្រីនៃព្រះរាជាណាចក្រកម្ពុជា ។
ការទទួលបានងារជា «តេជោ» របស់សម្តេច ហ៊ុន សែន គឺអនុលោមទៅតាមវីរភាពរបស់សម្តេចក្នុងការលះបង់កម្លាំងកាយចិត្ត ប្រាជ្ញាស្មារតី ដើម្បីមាតុភូមិជាទីស្នេហានៃ យើង ។ ពិសេសគុណធម៌៥យ៉ាង ដែលសម្តេចមានចំពោះជាតិមាតុភូមិ និងប្រជាជនគឺ ៖
១-ការរំដោះជាតិ និងប្រជាជនចេញពីរបបប្រល័យពូជសាសន៍ប៉ុល ពត ។
២-ការចរចារកដំណោះស្រាយ បញ្ចប់ជម្លោះរវាងភាគីខ្មែរទាំងអស់ ។
៣-គោលនយោបាយឈ្នះ-ឈ្នះ បានផ្តល់នូវស្ថិរភាពនយោបាយ ដើម្បីអភិវឌ្ឍប្រទេសជាតិ ព្រមទាំងអាចបង្រួបបង្រួមទឹកដីកម្ពុជា ដែលពីមុនមកគ្មាននរណាអាចធ្វើបានចាប់តាំងពីសម័យអង្គរ ។
៤-ការធ្វើបដិវត្តន៍ជលផលនៅបឹងទន្លេសាប ក្នុងរយៈពេលជាង១សតវត្ស ។ ការបែងចែកដីជូនប្រជាពលរដ្ឋដែលជាព្រឹត្តិការណ៍ប្រវត្តិសាស្ត្រតាមរយៈនយោបាយចាស់ សកម្មភាពថ្មី។
៥-សម្តេចបានការពារទឹកដីដែលនៅសេសសល់ពីការឈ្លានពានរបស់បរទេសពីមុនមកឱ្យនៅគង់វង្សមិនឱ្យបាត់បង់សូម្បី១មីល្លីម៉ែត្រ។
មន្ត្រីដដែលបញ្ជាក់ថា រូបសំណាកតេជោមាស និងេតជោយ៉ត ពិតជាកសាងឡើងប្រកបដោយអត្ថន័យប្រវត្តិសាស្ត្រ ដើម្បីរំឭកដល់គំរូវីរជនខ្មែរ អ្នកស្នេហាជាតិ និងជាមេទ័ពដ៏ឆ្នើមសម្រាប់ជនជំនាន់ក្រោយចងចាំជារៀងរហូត ៕
ចែករំលែកព័តមាននេះ