ខេត្តស្ទឹងត្រែង ៖ មន្ត្រីសាខាកាំកុងត្រូលរួមមន្ត្រីនៃមន្ទីរពាណិជ្ជកម្មខេត្តស្ទឹងត្រែងបានបង្កើនការអប់រំដល់អាជីវករដែលធ្លាប់ទទួលការផ្តល់ព័ត៌មានកន្លងមកជួយបង្ហាញអតិថិជនរបស់ខ្លួនបន្ថែមនៅពេលដែលពួកគាត់មកទិញទំនិញដើម្បីចូលរួមជួយទប់ស្កាត់ និងលើកកម្ពស់ផ្នែកសុខភាពទៅដល់អ្នកបរិភាគ ។
លោក យូ ចំរើន មន្ត្រីសាខាកាំកុងត្រូលខេត្តបានបញ្ជាក់ថា ការចុះពិនិត្យទំនិញតាមតូបក៏ដូចជានៅតាមផ្ទះលក់ដូររបស់បងប្អូនអាជីវករមានការសង្កេតឃើញថា ចំណីអាហារដែលបងប្អូននាំយកមកលក់គឺមានគុណភាពល្អ ។
លោកបន្ថែមថា មន្ត្រីជំនាញតែងចុះត្រួតពិនិត្យណែនាំដល់អាជីវករព្រមទាំងបិទរូបស្លាកសញ្ញាផ្សព្វផ្សាយដើម្បីឱ្យពួកគាត់យកចិត្តទុកដាក់ព្យាយាមពិនិត្យមើលគ្រប់មុខទំនិញមុនពេលនាំចូលមកដាក់តាំងលក់បន្តទៅឱ្យអតិថិជនរបស់ខ្លួនគឺគ្រប់មុខទំនិញ និងផលិតផលត្រូវឱ្យមានស្លាកសញ្ញា និងគុណភាពចេញក្រុមហ៊ុនធានាត្រឹមត្រួវចៀសវាងការប្រើប្រាស់មានករណីផ្សេងៗដែលកើតឡើងដោយយថាហេតុ ។
ស្រី្តជាអាជីវករឈ្មោះ ស៊ូ ឃីន លក់ដូរទំនិញនៅក្រុងស្ទឹងត្រែងបានសាទរជាមួយនឹងសកម្មភាព របស់មន្ត្រីសាខាកាំកុងត្រូលចុះមកពិនិត្យនេះព្រោះសកម្មភាពនេះដូចបានដាស់ស្មារតី បន្ថែមកាន់តែបង្កើនការប្រុងប្រយ័ត្នថែរក្សាសុខភាពទាំងអស់គ្នា ។ ស្រី្តរូបនេះបន្តថា ការនាំទំនិញចូលមកបច្ចុប្បន្នអាជីវករពួកគាត់ក៏បានធ្វើកិច្ចសន្យាជាមួយអ្នកចែកចាយឬតំណាងក្រុមហ៊ុនដែរចំពោះទំនិញណាមានភាពមិនប្រក្រតីត្រូវតែប្តូរវិញដូចជា ភេជ្ជៈកំប៉ុង ក្រពឹត ច្រែស ឬរលប់លេខសញ្ញាសំគាល់ជាដើមគឺត្រូវប្តូរបាន ។
ចំណែកឯស្រី្តដែលជាអាជីវករឈ្មោះ ថៃ គឹមហេង នៅភូមិស្រែសាមី ឃុំតាឡាត ស្រុកសេសានខេត្តស្ទឹងត្រែង បានស្នើឱ្យមន្ត្រីសាខាកាំកុងត្រូល និងមន្ត្រីជំនាញពាក់ព័ន្ធជួយចុះពិនិត្យឱ្យបានញឹកញាប់ និងគ្រប់ទីកន្លែង ជាពិសេសនៅតាមមូលដ្ឋានមានការស្តុកទុកទំនិញយូរ ។ ស្រី្តដដែលបានលើកឡើងថា នៅតាមសាលារៀនក៏ជាកន្លែងប្រឈមមួយដែរទៅលើសុខភាពកុមារ ព្រោះបច្ចុប្បន្នមានទំនិញនាំចូលពីប្រទេសជិតខាងច្រើនហើយទំនិញខ្លះមិនមានបិទស្លាកសញ្ញា និងកាលបរិច្ឆេទអ្វីឡើយ ។
គួរបញ្ជាក់ថា បច្ចុប្បន្នបងប្អូនអាជីវករ និងប្រជាពលរដ្ឋមានការយល់ដឹងច្រើនចំពោះការប្រើប្រាស់ចំណីអាហារចំណែកសកម្មភាពចុះត្រួតពិនិត្យនេះសមត្ថកិច្ចជំនាញបានធ្វើជារៀងរាល់ខែផងដែរហើយប្រតិបត្តិការនារថ្ងៃទី៧ ខែតុលា ឆ្នាំ២០១៩ កម្លាំងជំនាញក៏បានដកហូតផលិតផលទំនិញមួយចំនួនដែលហួសកាលបរិច្ឆេទប្រើប្រាស់យកទៅកម្ទេចចោលផងដែរ ៕
កែសម្រួលដោយ ៖ សំណាង
ចែករំលែកព័តមាននេះ