ខេត្តបាត់ដំបង ៖ ប្រជាពលរដ្ឋប្រមាណ៤០នាក់ មកពីភូមិត្រពាំងក្បាលស្វា ឃុំឃ្លាំងមាស ស្រុកបវេល បានលើកគ្នាមកតវ៉ាដល់ខាងមុខទីបញ្ជាការកងរាជអាវុធហត្ថខេត្ត កាលពីវេលាម៉ោង១០ និង៣០នាទីព្រឹកថ្ងៃទី០៧ តុលា…
ខេត្តបាត់ដំបង ៖ ប្រជាពលរដ្ឋប្រមាណ៤០នាក់ មកពីភូមិត្រពាំងក្បាលស្វា ឃុំឃ្លាំងមាស ស្រុកបវេល បានលើកគ្នាមកតវ៉ាដល់ខាងមុខទីបញ្ជាការកងរាជអាវុធហត្ថខេត្ត កាលពីវេលាម៉ោង១០ និង៣០នាទីព្រឹកថ្ងៃទី០៧ តុលា នេះ ដើម្បីស្នើសុំលោកមេបញ្ជាការកងរាជអាវុធហត្ថខេត្តនេះ ជួយអន្តរាគមន៍ដកលោកសុខជា សំណាង ចេញពីមេបញ្ជាការមូលដ្ឋានស្រុកបវេល ដែលពួកគាត់ចោទថា បានលែងគោទាំងហ្វូងឱ្យស៊ីដំណាំពួកគាត់ជារៀងរាល់ឆ្នាំ គ្មានដំណោះស្រាយ គំរាមកំហែង និងធ្វើទុក្ខបុកម្នេញពលរដ្ឋនៅក្នុងមូលដ្ឋានរាល់ថ្ងៃ ស្ទើរមិនអាចរស់នៅបាន។ ហើយពួកគាត់ថា បើមិនដោះស្រាយឱ្យទេ នឹងលើកគ្នាទៅតវ៉ាដល់ភ្នំពេញទៀត ដើម្បីសុំឱ្យសម្ដេច ហ៊ុន សែន ជួយអន្តរាគមន៍វិញម្តង ។
ប្រជាពលរដ្ឋបាននិយាយថា សត្វគោរាប់រយក្បាលរបស់លោកសុខជា សំណាង មេបញ្ជាការមូលដ្ឋានស្រុកបវេល ត្រូវបានលែងយ៉ាងអនាធិបតេយ្យ ហើយបានចូលលុកលុយស៊ីដំណាំកសិកម្មរបស់ពលរដ្ឋនៅភូមិ-ឃុំខាងលើស្ទើររាល់ថ្ងៃ និងជារៀងរាល់ឆ្នាំ ។ មិនតែប៉ុណ្ណោះ លោកសុខជា សំណាង និងកូនប្រុសគំរាមកំហែងម្ចាស់ដំណាំទៀតផង នៅពេលគេនាំគ្នាដេញគោឬតវ៉ាពីរឿងគោស៊ីដំណាំនេះ។ អ្នកភូមិបានបញ្ជាក់ថា ដោយសារមិនអាចស៊ូទ្រាំនឹងហ្វូងគោលោកសុខជា សំណាង នេះមិនបាន អ្នកភូមិក៏បាននាំគ្នាផ្តិតមេដៃដាក់ពាក្យបណ្ដឹងទៅអាជ្ញាធរឃុំឃ្លាំងមានឲ្យជួយរកដំណោះស្រាយ។
ប៉ុន្តែអ្នកភូមិបានប្រាប់ថា ពាក្យបណ្ដឹងបានដាក់តាំងពីថ្ងៃទី១៦ កញ្ញា តែរហូតដល់ពេលនេះ នៅមិនទាន់មានដំណោះស្រាយពីលោកមេឃុំនៅឡើយទេ ។ ដូច្នេះហើយ ទើបពួកគាត់លើកគ្នាមកតវ៉ាដល់មុខបញ្ជា ការកងរាជអាវុធហត្ថខេត្ត ដើម្បីសុំឲ្យលោកមាស សុវណ្ណ មេបញ្ជាការខេត្តជួយអន្តរាគមន៍ ។
កោះសន្តិភាព មិនទាន់អាចសុំការឆ្លើយតបពីលោកសុខជា សំណាង មេបញ្ជាការមូលដ្ឋានស្រុកបវេលបានភ្លាមៗទេ នៅអំឡុងពេលមានការតវ៉ានេះ ។ ប៉ុន្តែបើតាមប្រជាពលរដ្ឋដែលមកតវ៉ាបានប្រាប់ថា ភ្លាមៗនោះ កម្លាំងកងរាជអាវុធហត្ថខេត្តបានអនុញាតឲ្យតំណាងអ្នកតវ៉ាប៉ុន្មាននាក់ ចូលជួបហើយដើម្បីសួរនាំ និងដោះស្រាយ ។
ក្រុមអ្នកតវ៉ាបានបញ្ជាក់ថា ពួកគាត់ដែលលើកគ្នាមកតវ៉ាដល់មេបញ្ជាការខេត្តនេះ គឺទាមទាឲ្យមានសំណងការខូចខាតផលដំណាំ ។ ជាពិសេស សុំឲ្យលោកមេបញ្ជាការខេត្ត ដកលោកសុខជា សំណាង ចេញពីមេបញ្ជាការស្រុកបវេលតែម្ដង ។ ពីព្រោះសព្វថ្ងៃ ទាំងលោកសុខជា សំណាង ទាំងកូនប្រុសម្នាក់កំពុងធ្វើទុក្ខ បុកម្នេញពលរដ្ឋសម្បើមដៃណាស់ ។
ពួកគាត់និយាយថា ប្រលែងសត្វគោទាំងហ្ហូងឲ្យស៊ីដំណាំពលរដ្ឋហើយ ថែមទាំងគំរាមកំហែង និងបង្កហឹង្សាលើពលរដ្ឋថែមទៀត ។ ក្រុមអ្នកតវ៉ាបានព្រមានថា បើលោកមាស សុវណ្ណ មេបញ្ជាការខេត្តមិនអាចរកដំណោះស្រាយឲ្យពួកគាត់មិនបានទេ ពួកគាត់នឹងលើកគ្នាទៅតវ៉ាដល់ភ្នំពេញទៀត ដើម្បីសុំឲ្យសម្ដេច ហ៊ុន សែន ជួយអន្តរាគមន៍តែម្ដង ។
ចែករំលែកព័តមាននេះ