ការផ្ទុះគ្រាប់បែកមួយគ្រាប់ដែលលាក់ក្នុងកេសផ្លែឈើមួយបណ្តាលឱ្យមនុស្សស្លាប់យ៉ាងតិច២០នាក់ ហើយជាច្រើនសិបនាក់ទៀតត្រូវរបួសកាលពីថ្ងៃទី៩ មេសា ក្នុងផ្សារដ៏មានប្រជាប្រិយមួយនៃក្រុងអុីស្លាម៉ាបាដ រដ្ឋធានីប៉ាគីស្ថាន។ ក្នុងផ្សារលក់ផ្លែឈើនោះ កាលពីព្រឹកថ្ងៃទី៩ មេសា មនុស្សម្នាបាននាំគ្នាទៅទិញផ្លែប៉ោម ក្រូច ស្វាយ ។ល។ ស្រាប់តែគ្រាប់បែកខ្លាំងមួយមានទម្ងន់ប្រមាណជា៥គីឡូក្រាមលាក់ក្នុងកេសផ្លែឈើមួយបានផ្ទុះបង្កើតជារណ្តៅមួយមានវិជ្ជមាត្រប្រមាណជា១,៥០ម៉ែត្រ ។ គេឃើញសាច់មនុស្សខ្ទាតពេញផ្សារ និងឃើញថ្លុកឈាមគួរឱ្យព្រឺព្រួចបំផុត ។
លោក JAMEEL HASHMI អ្នកទទួលខុសត្រូវជាន់ខ្ពស់ម្នាក់នៃប៉ូលិសប៉ាគីស្ថានថ្លែងថា មនុស្សយ៉ាងតិច២០នាក់បានត្រូវស្លាប់ ហើយប្រមាណជា៦៩នាក់ទៀតត្រូវរបួស ។ លោកបញ្ជាក់ថា សាកសពមនុស្ស១៨នាក់ត្រូវបានបញ្ជូនទៅកាន់មន្ទីរពេទ្យ PIMS នៃរដ្ឋធានី ហើយសាកសពមនុស្ស២នាក់ទៀតបញ្ជូនទៅកាន់ទីក្រុងរ៉ាវ៉ាល់ពីនឌីជិតខាង ។
លោកមូហាម៉ាដ ខាលីដខាតតាក់ នាយស្នងការប៉ូលិសក្រុងអុីស្លាម៉ាបាដថ្លែងថា ក្នុងផ្សារមានមនុស្សប្រមាណជា២.០០០នាក់ពេលគ្រាប់បែកផ្ទុះ ។ការវាយប្រហារភេរវកម្មនេះដែលពុំទាន់មានក្រុមណាប្រកាសទទួលខុសត្រូវនៅឡើយក្នុងពេលភ្លាមៗ ជាការវាយប្រហារយ៉ាងបង្ហូរឈាមបំផុតនៅរដ្ឋធានីអុីស្លាម៉ាបាដ ដែលជាទូទៅគេចផុតពីអំពើហិង្សាទាំងឡាយដែលតែងកើតមាននៅកន្លែងផ្សេងៗរបស់ប្រទេសចាប់តាំងពីការវាយប្រហារប្រឆាំងសណ្ឋាគារ MARRIOTT ដែលបណ្តាលឱ្យមនុស្សស្លាប់៥០នាក់កាលពីឆ្នាំ២០០៨ មក ។
នៅប៉ាគីស្ថាន ការវាយប្រហារភេរវកម្មកើតមានញឹកញាប់នៅទីក្រុងសេដ្ឋកិច្ចការ៉ាជី ភាគខាងត្បូងប្រទេស ក្នុងបណ្តាតំបន់នៅភាគពាយ័ព្យជាប់ព្រំដែនអាហ្វហ្គានីស្ថាន និងនៅខេត្តមានអស្ថេរភាពបាលូតជីស្ថាន ជាកន្លែងដែលមនុស្ស១៥នាក់ទៀតស្លាប់កាលពីថ្ងៃទី៨ មេសា ដោយសារការផ្ទុះគ្រាប់បែកក្នុងរថភ្លើងមួយជាស្នាដៃរបស់ក្រុមឧទ្ទាមបំបែកខ្លួននិយមមូលដ្ឋាន។
ការវាយប្រហារនេះនៅក្រុងអុីស្លាម៉ាបាដកើតមានពេលរដ្ឋាភិបាលប៉ាគីស្ថាន និងពួកតាលីបង់បានសន្យាគោរពបទឈប់បាញ់គ្នា ព្រោះសង្ឃឹមជំរុញការចរចាសន្តិភាព ។ ពួកបះបោរតាលីបង់នៅប្រកាសពន្យារពេលបទឈប់បាញ់គ្នារហូតដល់ថ្ងៃទី១០ មេសា ហើយស្នើដល់រដ្ឋាភិបាលឱ្យដោះលែងមនុស្សរបស់គេ៣០០នាក់។
អ្នកនាំពាក្យម្នាក់របស់ពួកតាលីបង់ ប៉ាគីស្ថាន លោកសាហុីឌុលឡាហ៍ សាហុីដ និយាយថា ប្រសិនបើរដ្ឋាភិបាលឆ្លើយតបតាមសំណើរបស់យើងនោះយើងនឹងកោះប្រជុំក្រុមប្រឹក្សាកណ្តាលរបស់យើងដើម្បីសម្រេចថា តើបន្ទាប់មកទៀតត្រូវធ្វើអ្វីខ្លះ ។ ទោះបីយ៉ាងណា ពួកអ្នកវិភាគប៉ាគីស្ថាននៅតែពុំសង្ឃឹមលើច្រកចេញមួយនៃការចរចានោះ ដោយវាយតម្លៃថា ភាគីទាំងពីរជាបឋមសុទ្ធតែចង់ឱ្យចំណេញពេលដូចគ្នា ខណៈជិតដល់ពេលដកកងកម្លាំងអូតង់ចេញពីអាហ្វហ្គានីស្ថាន ៕
ចែករំលែកព័តមាននេះ