អ្នកទស្សនវិជ្ជាព្រះពុទ្ធសាសនាបានចាត់ទុកកតញ្ញុតាធម៌ថាជាគុណប្រយោជន៍ដ៏សំខាន់ ជាភូមិឋាន និងជាសសរស្តម្ភនៃជីវិត បុគ្គលណាមាននូវកតញ្ញុតាធម៌ បុគ្គលនោះគឺជាអ្នកមានគ្រឹះនៃជីវិតដ៏មាំទាំ ជីវិតរបស់គេ រមែងរុងរឿងខ្ពង់ខ្ពស់តទៅ ។
ចំណែកឯបុគ្គលណាខ្វះខាតនូវកតញ្ញុតាធម៌ឈ្មោះថា ខ្វះខាតនូវគ្រឹះដ៏មាំទាំក្នុងជីវិត សូម្បីបុគ្គលនោះមានសេចក្ដីល្អផ្សេងៗជាខាងក្រៅរាប់រយមុខក៏ដោយ តែបើខ្វះនូវកតញ្ញុតាធម៌ហើយ គឺមិនអាចញុំាងជីវិតឱ្យរុងរឿងទៅបានយូរឡើយ ។
ប្រៀបដូចអគារធំៗ ដែលគ្រឹះមិនមាំទាំដូច្នោះឯង សូម្បីតាក់តែងរចនាលម្អធ្វើឲ្យស្អាតស្រស់យ៉ាងណាក៏ដោយ ថ្ងៃណាមួយគង់នឹងបាក់ស្រុតជាក់ជាមិនខាន ។
ដូចកន្លងមកថ្មីៗនេះជាតឹកតាងស្រាប់ មានអគារខ្លះសង់មិនទាន់ទាំងរួចផង ក៏ត្រូវស្រុតបាក់ទៅហើយ យ៉ាងណា មនុស្សដែលខ្វះនូវកតញ្ញុតាធម៌ក៏ឈ្មោះថាខ្វះខាតនូវគ្រឹះរឹងមាំនៃជីវិតក៏យ៉ាងនោះដែរ ។ (ដោយសាន សារិន)
ចែករំលែកព័តមាននេះ