រាជធានីភ្នំពេញ ៖ សំណង់អគារកម្ពស់៥ជាន់មួយកន្លែងដែលកំពុងដំណើរការសាងសង់ ត្រូវអាជ្ញាធរខណ្ឌពោធិ៍សែនជ័យសង្ស័យគ្មានច្បាប់អនុញ្ញាតគ្រប់គ្រាន់ និងសាងសង់ប៉ះពាល់ផ្លូវទៀតផង ។ បន្ទាប់មកអាជ្ញាធរដឹកនាំដោយលោក អភិបាលរងខណ្ឌ ប៉ាង លីដា…
រាជធានីភ្នំពេញ ៖ សំណង់អគារកម្ពស់៥ជាន់មួយកន្លែងដែលកំពុងដំណើរការសាងសង់ ត្រូវអាជ្ញាធរខណ្ឌពោធិ៍សែនជ័យសង្ស័យគ្មានច្បាប់អនុញ្ញាតគ្រប់គ្រាន់ និងសាងសង់ប៉ះពាល់ផ្លូវទៀតផង ។ បន្ទាប់មកអាជ្ញាធរដឹកនាំដោយលោក អភិបាលរងខណ្ឌ ប៉ាង លីដា និងមានការចូលរួមពីសំណាក់មន្ត្រីសូរិយោដីខណ្ឌ និងអាជ្ញាធរសង្កាត់កាកាប១ផង បានចុះត្រួតពិនិត្យជាក់ស្ដែង ។
ប៉ុន្តែខណៈនោះកម្លាំងមិនបានផ្អាកដំណើរការសាងសង់ ឬរឹបអូសយកសម្ភារសំណង់នោះទេ ដោយម្ចាស់ប្រាប់ថា សំណង់របស់គាត់មានច្បាប់អនុញ្ញាតត្រឹមត្រូវ ទើបលោកអភិបាលរងខណ្ឌខាងលើប្រាប់ឲ្យម្ចាស់យកឯកសារពាក់ព័ន្ធទាំងអស់ដែលមានចូលទៅសាលាខណ្ឌដើម្បីត្រួតពិនិត្យមើលបញ្ចៀសភាពមន្ទិលសង្ស័យទាំងឡាយ ។
សំណង់អគារខាងលើនោះកម្ពស់៥ជាន់ មានទីតាំងស្ថិតនៅក្នុងភូមិចំការឪឡឹក១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ចំណែកអាជ្ញាធរបានចុះទៅធ្វើការត្រួតពិនិត្យកាលពីវេលាម៉ោង១០ព្រឹកថ្ងៃទី៣ ខែតុលា ឆ្នាំ២០១៩ ដែលជាកម្មសិទ្ធិរបស់ឧត្តមសេនីយ៍ទោកងរាជអាវុធហត្ថនៅសាលាហ្វឹកហ្វឺនកងរាជអាវុធហត្ថកំបូលម្នាក់ ។
មន្ត្រីសាលាខណ្ឌខាងលើបាននិយាយថា សំណង់មួយនេះកំពុងដំណើរការសាងសង់យ៉ាងមមារញឹកហើយត្រូវបានសង្ស័យថា សាងសង់គ្មានច្បាប់អនុញ្ញាត ព្រមទាំងសាងសង់ប៉ះពាលផ្លូវសាធារណៈថែមទៀតផង ដោយសារតែកាលពីពេលកន្លងមកអាជ្ញាធរសង្កាត់កាកាប១ ធ្លាប់បានចុះទៅធ្វើការផ្អាកជាបន្តបន្ទាប់តាមបញ្ជារបស់សាលាខណ្ឌពោធិ៍សែនជ័យ ដើម្បីឲ្យម្ចាស់នាំយកច្បាប់ និងឯកសារផ្សេងៗដែលខ្លួនមានចូលទៅកាន់សាលាខណ្ឌដើម្បីជួបជាមួយមន្ត្រីជំនាញពិនិត្យមើល ប៉ុន្តែម្ចាស់មិនព្រមធ្វើតាម ទើបពេលនេះលោក ប៉ាង លីដា អភិបាលរងខណ្ឌពោធិ៍សែនជ័យ បានដឹកនាំកម្លាំងចុះទៅធ្វើការត្រួតពិនិត្យជាក់ស្ដែងតែម្តង ។
ប្រភពខាងលើបានបញ្ជាក់ថា សំណង់នេះប្រហែលអាចមានច្បាប់សាងសង់ត្រឹមសាលាខណ្ឌពោធិ៍សែនជ័យប៉ុណ្ណោះដែលមិនគ្រប់គ្រាន់ និងត្រឹមត្រូវឡើយ ព្រោះសំណង់នេះតម្រូវឲ្យសុំច្បាប់ដល់សាលារាជធានីភ្នំពេញឯណោះ ។
ចំណែកខាងកម្លាំងអាជ្ញាធរខណ្ឌពោធិ៍សែនជ័យ ក្រោយពីចុះទៅដល់ត្រូវបានម្ចាស់ប្រាប់ថា សំណង់គាត់មានច្បាប់ត្រឹមត្រូវ ទើបខណៈនោះលោកអភិបាលរងខណ្ឌប្រាប់ឲ្យម្ចាស់នាំយកច្បាប់ និងឯកសារទាំងអស់ដែលខ្លួនមានទៅកាន់សាលាខណ្ឌដើម្បីត្រួតពិនិត្យជាក់ស្ដែង ហើយអាជ្ញាធរក៏មិនបានផ្អាកឬក៏រឹបអូសយកសម្ភារសំណង់អ្វីទាំងអស់រង់ចាំការពិនិត្យឯកសារសិន ៕
កែសម្រួលដោយ ៖ សំណាង
ចែករំលែកព័តមាននេះ