ខេត្តកំពង់ឆ្នាំង ៖ ថ្ងៃបញ្ចប់ពិធីបុណ្យភ្ជុំបិណ្ឌ និងជាថ្ងៃជូនដំណើរដូនតាត្រឡប់ទៅវិញ រដ្ឋបាលឃុំកោះថ្កូវ ស្រុកជលគីរី បានរៀបចំពិធីប្រណាំងទូកមហាជនចំនួន២៦ទូក ដើម្បីឲ្យមហាជនចូលរួមទស្សនាសប្បាយរីករាយ ។ គណៈកម្មការរៀបចំពិធីប្រណាំងទូកឲ្យដឹងថា…
ខេត្តកំពង់ឆ្នាំង ៖ ថ្ងៃបញ្ចប់ពិធីបុណ្យភ្ជុំបិណ្ឌ និងជាថ្ងៃជូនដំណើរដូនតាត្រឡប់ទៅវិញ រដ្ឋបាលឃុំកោះថ្កូវ ស្រុកជលគីរី បានរៀបចំពិធីប្រណាំងទូកមហាជនចំនួន២៦ទូក ដើម្បីឲ្យមហាជនចូលរួមទស្សនាសប្បាយរីករាយ ។
គណៈកម្មការរៀបចំពិធីប្រណាំងទូកឲ្យដឹងថា ទូកដែលបានចូលរួមប្រណាំងទាំងចំនួន២៦ទូកនោះពីស្រុកកំពង់ត្រឡាច ស្រុកជលគិរី ស្រុករលាប្អៀរ និងទូកពីស្រុកបាធាយ ខេត្តកំពង់ចាម ក៏បានមកចូលរួមប្រណាំងដែរ ។
អធិបតីលោកស៊ុន សុវណ្ណរិទ្ឋ អភិបាលរងខេត្តកំពង់ឆ្នាំង ចាត់ទុកការរៀបចំប្រណាំងទូកមហាជននេះជាពិធីបង្កភាពសប្បាយរីករាយជូនមហាជនផង និងដើម្បីជូនដំណើរដល់ដូនតា បុព្វការីជនផង និងដើម្បីហាត់សមត្រៀមលក្ខណៈទៅចូលរួមប្រណាំងក្នុងព្រះរាជពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ នៅរាជធានីភ្នំពេញក្នុងពេលខាងមុខនេះផង ។
លោកអភិបាលរងខេត្តថ្លែងថា«យើងបានសប្បាយរីករាយក្នុងពេលបច្ចុប្បន្ននេះ គឺដោយសារប្រទេសជាតិរបស់យើងមានសុខសន្តិភាពពេញលេញ ។ បើយើងក្រឡេកមើលទៅក្រោយបន្តិច នៅកន្លែងដែលយើងកំពុងរៀបចំពិធីនៅពេលនេះ គឺជាកន្លែងសមរភូមិក្តៅ ប្រឈមមុខដាក់គ្នារវាងទ័ពខ្មែរក្រហម និងកងទ័ពរបស់រាជរដ្ឋាភិបាល ។ ប៉ុន្តែក្រោមការដឹកនាំដ៏ឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលនៃព្រះរាជាណាចក្រកម្ពុជា បានប្រើនយោបាយឈ្នះ-ឈ្នះ ទើបប្រទេសជាតិយើងបានបញ្ចប់សង្គ្រាមផ្ទៃក្នុង និងមានសន្តិភាពរហូតដល់សព្វថ្ងៃ ។
បច្ចុប្បន្ន ប្រទេសជាតិមិនត្រឹមតែមានសុខសន្តិភាពទេ គឺថែមទាំងមានការរីកចម្រើនលើគ្រប់វិស័យទាំងសាលារៀន ផ្លូវថ្នល់ មន្ទីរពេទ្យ វត្តអារាម មិនតែប៉ុណ្ណោះ ដោយសារការទុកចិត្តពីក្រុមហ៊ុនបរទេស ទើបគេដាក់ទន់មករកស៊ីនៅប្រទេសកម្ពុជា ធ្វើអោយប្រទេសដែលទើបរួចផុតពីភ្លើងសង្គ្រាមមួយនេះ មានកំណើនសេដ្ឋកិច្ចខ្ពស់ត្រូវបានបរទេសទទួលស្គាល់ »។
អ្នកចូលរួមទស្សនាជាច្រើនបានសម្ដែងក្ដីសប្បាយរីករាយ ហើយចាត់ទុកជាការញ៉ាំងបរិយាកាសសប្បាយរីករាយមួយចំពោះមហាជន បន្ថែមពីលើបុណ្យភ្ជុំបិណ្ឌ ៕ (កែសម្រួលដោយ ៖ បុប្ផា)
ចែករំលែកព័តមាននេះ