ពួកសកម្មប្រយុទ្ធ និងសារព័ត៌មានក្នុងស្រុកអះអាងថា ពួកឧទ្ទាមជាង៣០នាក់ក្នុងនោះរួមមានបណ្ដាមេបញ្ជាការផងបានត្រូវស្លាប់ កាលពីថ្ងៃទី៦ មេសា ក្នុងការផ្ទុះឃ្លាំងគ្រាប់មួយនៅខេត្ដហូម ភាគកណ្ដាលស៊ីរី ។ យោងតាមពួកឧទ្ទាមមានមូលដ្ឋាននៅខេត្ដហូមថា ការផ្ទុះយ៉ាងខ្លាំងកើតមាននៅតំបន់ JOURET AL SHAYAH បណ្ដាលមកពីមីស៊ីលធុន GRAD ១គ្រាប់ដែលធ្លាក់លើឃ្លាំងគ្រាប់មួយ ។ ពួកឧទ្ទាមរៀបចំឃ្លាំងគ្រាប់នោះដើម្បីធ្វើការវាយលុកមួយប្រឆាំងកងទ័ពរដ្ឋាភិបាល ហើយបំបែកការឡោមព័ទ្ធរបស់កងទ័ពរយៈពេល១ឆ្នាំមកហើយ ។
ចំណែកពួកឧទ្ទាមឯទៀតនិយាយថា រថយន្ដបង្កប់គ្រឿងផ្ទុះមួយជាប្រភពនៃការផ្ទុះឃ្លាំងគ្រាប់នោះ ។ ចំណែកបណ្ដាញអីុនធើរណេតស្និទ្ធរដ្ឋាភិបាល AL-KHABAR រាយការណ៍ថា ការផ្ទុះបណ្ដាលមកពីការបាញ់កាំភ្លើងធំរបស់កងទ័ពរដ្ឋាភិបាលលើឃ្លាំងគ្រាប់នោះដែលបណ្ដាលឱ្យពួកឧទ្ទាមស្លាប់ជាង៣០នាក់ ក្នុងនោះរួមទាំងប្រមុខក្រុមប្រឹក្សាយោធារបស់ពួកឧទ្ទាមនៃក្រុមកងទ័ពស៊ីរីសេរី លោក អាប់ឌុល កាឌ័រ ហ្សូម៉ា និងមេបញ្ជាការឧទ្ទាមម្នាក់ទៀតលោក អឺយ៉ាដហ្សូហ្គាអីុប ផង ។ ចំណែកកាសែតស៊ីរី AL-WATAN រាយការណ៍កាលពីថ្ងៃទី៦ មេសា ថា ពួកឧទ្ទាមយ៉ាងតិច៧៥នាក់ត្រូវបានសម្លាប់ក្នុងការវាយលុករបស់កងទ័ពស៊ីរីនៅខេត្ដហូម ។
យោងតាមកាសែតនោះថា កងទ័ពស៊ីរីបានវាយប្រហារសំដៅលើទីតាំងទាំងឡាយរបស់ពួកឧទ្ទាមក្នុងតំបន់ YUB-AL JARRAH ភាគខាងកើតខេត្ដហូម ដោយសម្លាប់ពួកបះបោរជាង៧៥នាក់ ក្នុងនោះរួមមានពួកឧទ្ទាមជាជនបរទេសចូលរួមក្នុងក្រុមរណសិរ្សអាល់ណូស្រ្ដា ជាសាខាអាល់កៃដានៅស៊ីរី និងក្រុមរណសិរ្សអ៊ិស្លាមជាសម្ព័ន្ធភាពរបស់ពួកអ៊ិស្លាមនិយម៦ក្រុម ផង ។ ម៉្យាងវិញទៀត កាសែតនោះរៀបរាប់ពីជនស៊ីវិល៧នាក់ស្លាប់ និង២៥នាក់ទៀតត្រូវរបួស ក្នុងនោះមាននារីនិងកុមារ ដោយសារការបាញ់គ្រាប់កាំភ្លើងត្បាល់របស់ពួកឧទ្ទាមក្នុងបណ្ដាស្រុកកាន់កាប់ដោយរដ្ឋាភិបាលនៅភាគកណ្ដាលខេត្ដហូម ។
កងទ័ពស៊ីរី ក៏បន្ដការវាយលុកនៅភាគខាងកើតខេត្ដអាឡែប ហើយកម្ទេចការវាយប្រហារមួយរបស់ពួកឧទ្ទាមប្រឆាំងទីតាំងយោធាយុទ្ធសាស្រ្ដមួយនៅខេត្ដ LATAQUIE ជាប់មាត់សមុទ្រ ។ ទន្ទឹមនឹងនេះ អង្គការសិទ្ធិមនុស្សស៊ីរី OSDH មានមូលដ្ឋាននៅក្រុងឡុងដ៍ ស្និទ្ធពួកឧទ្ទាមលាតត្រដាងថា បណ្ដាឧទ្ធម្ភាគចក្រយោធាស៊ីរី បានទម្លាក់ធុងសាំងផ្ទុះលើទីក្រុង OM HAWSH ត្រួតត្រាដោយពួកឧទ្ទាម ស្ថិតនៅជាយក្រុងអាឡែប ដោយសម្លាប់មនុស្ស៥នាក់ ៕
ចែករំលែកព័តមាននេះ