ខេត្តព្រះសីហនុ ៖ បើតាមសេចក្តីរាយការណ៍បឋមបានឲ្យដឹងថា មានការភ្ញាក់ផ្អើលមួយបានកើតឡើង ខណៈគេប្រទះឃើញសាកសពមនុស្សមួយកំណាត់ខ្លួនម្នាក់នៅក្នុងដីឡូតិ៍មួយកន្លែង បង្កឱ្យមានការភ្ញាក់ផ្អើលកាលពីម៉ោង៩ព្រឹក ថ្ងៃទី០១ ខែតុលា ឆ្នាំ២០១៩នេះ ស្ថិតក្នុងភូមិអូរត្រេះ…
ខេត្តព្រះសីហនុ ៖ បើតាមសេចក្តីរាយការណ៍បឋមបានឲ្យដឹងថា មានការភ្ញាក់ផ្អើលមួយបានកើតឡើង ខណៈគេប្រទះឃើញសាកសពមនុស្សមួយកំណាត់ខ្លួនម្នាក់នៅក្នុងដីឡូតិ៍មួយកន្លែង បង្កឱ្យមានការភ្ញាក់ផ្អើលកាលពីម៉ោង៩ព្រឹក ថ្ងៃទី០១ ខែតុលា ឆ្នាំ២០១៩នេះ ស្ថិតក្នុងភូមិអូរត្រេះ សង្កាត់លេខ៤ ក្រុង-ខេត្ដព្រះសីហនុ ។
សេចក្តីរាយការណ៍ទៀតថា ក្រោយពេលមានការភ្ញាក់ផ្អើលនោះ កម្លាំងជំនាញនៃអធិការដ្ឋាននគរបាលខេត្តបានចុះទៅពិនិត្យនៅទីតាំងកើតហេតុខាងលើ ក៏បានឃើញថង់ពណ៌ខ្មៅរុំជិត ដោយនៅក្នុងថង់នោះមានភួយ៣ជាន់រុំសាកសពជនរងគ្រោះមួយកំណាត់ខ្លួនផ្នែកខាងលើ ។
សេចក្តីរាយការណ៍បន្តទៀតថា ឆ្លងតាមការពិនិត្យ និងធ្វើកោសល្យវិច្ឆ័យរបស់ការិយាល័យនគរបាលនៃស្នងការដ្ឋាននគរបាលខេត្ដព្រះសីហនុឃើញថា សពជនរងគ្រោះជាបុរស អាយុប្រហែល៣០ឆ្នាំជាង មានពាក់អាវយឺតដៃខ្លី ពណ៌ខ្មៅ មិនស្គាល់អត្ដសញ្ញាណ (ដោយសង្ស័យថា អាចជាជនជាតិចិន) ។
សេចក្តីរាយការណ៍បន្តទៀតថា ជាជំហានដំបូង ជនរងគ្រោះរូបនេះអាចត្រូវគេធ្វើឃាតនៅកន្លែងផ្សេង ដោយបានកាត់ផ្ដាច់ខ្លួនចេញជាពីរកំណាត់ ហើយបានរុំវេចខ្ចប់មួយកំណាត់ខ្លួនខាងលើ រួចយកមកប្លុងចោលនៅក្នុងដីឡូតិ៍ទីតាំងខាងលើ ។ ករណីនេះអាចជាករណីឃាតកម្មគិតទុកជាមុន ដែលសង្ស័យបណ្ដាលមកពីរការគំនុំ។
ក្រោយពេលពិនិត្យរួច សាកសពជនរងគ្រោះត្រូវបានរក្សាទុកនៅមន្ទីរពេទ្យបង្អែកខេត្ដព្រះសីហនុ និងកំពុងស្វែងរកអត្ដសញ្ញាណ ព្រមទាំងសាច់ញាតិនៃសព ។ ហើយខណៈពេលនេះ កម្លាំងជំនាញនៃស្នងការដ្ឋាននគរបាលខេត្ដ កំពុងស្រាវជ្រាវយ៉ាងយកចិត្ដទុកដាក់ ដើម្បីស្រាវជ្រាវស៊ើបអង្កេតរកជនល្មើស និងអ្នកពាក់ព័ន្ធយកមកផ្ដន្ទាទោសតាមផ្លូវច្បាប់ ។ (កែសម្រួលដោយ ៖ បុប្ផា)
ចែករំលែកព័តមាននេះ