រាជធានីភ្នំពេញ ៖ ចាប់តាំងពីថ្ងៃទី២ មេសាមក ព័ត៌មានពីកម្មករ-កម្មការិនីដួលសន្លប់នៅតាមរោងចក្រកាត់ដេរមួយចំនួន បានកើតមានជាបន្តបន្ទាប់ និងមានចំនួនរាប់រយនាក់ទៅហើយ ។ ប៉ុន្តែមូលហេតុដែលបណ្តាលឱ្យមានការដួលសន្លប់នេះ មិនទាន់បានទទួលនូវការអះអាងជាផ្លូវការណាមួយឡើយ ។ ទោះបីជាបែបនេះក្តី មិនមានកម្មករ-កម្មការិនីណាម្នាក់ឈានដល់ស្ថានភាពធ្ងន់ធ្ងរ ឬក៏ស្លាប់បាត់បង់ជីវិតនោះទេ។
ព័ត៌មានថ្មីបំផុតចុងក្រោយគិតត្រឹមថ្ងៃទី៤ មេសា កម្មការិនីជាង៤០នាក់ ដែលបម្រើការងារនៅក្នុងរោងចក្រកាត់ដេរយីហោអាយស៊ី (IC) ដែលមានទីតាំងស្ថិតនៅតាមបណ្តោយផ្លូវបេតុងក្នុងបុរីចោមចៅ ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ បានដួលសន្លប់ជាបន្តបន្ទាប់ កាលពីវេលាម៉ោង៩ព្រឹក ដោយមិនទាន់ដឹងពីមូលហេតុនៅឡើយ ។
មន្ត្រីនគរបាលមូលដ្ឋានបានឱ្យដឹងថា រោងចក្រកាត់ដេរអាយស៊ី មានកម្មករ-កម្មការិនីបម្រើការងារសរុបចំនួន៧៣០នាក់ ហើយកន្លងមក មិនដែលមានបញ្ហាដួលសន្លប់បែបនេះទេ គឺពួកគេធ្វើការក្នុងសភាពសុខសប្បាយរហូត ។
ដោយឡែក នៅថ្ងៃកើតហេតុខាងលើ ខណៈពេលដែលកម្មករ-កម្មការិនីកំពុងធ្វើការញាប់ដៃញាប់ជើង ស្រាប់តែមានអាការមិនស្រួលខ្លួន ដោយអ្នកខ្លះងងឹតមុខ ខ្លះវិលមុខរកកល់ចង់ក្អួតចង្អោរ ហើយបានទន់ដៃទន់ជើង និងដួលសន្លប់ជាបន្តបន្ទាប់តែម្តង ។
ខណៈនោះ ធ្វើឱ្យកម្មការិនីដទៃទៀត មានការភ័យស្លន់ស្លោ និងច្រួលច្របល់ពេញក្នុងរោងចក្រផងនោះ ក៏នាំគ្នារត់ចេញយ៉ាងប្រសេចប្រសាចជាន់ជើងគ្នាបោះបង់ចោលការងារ ។ ស្ថិតក្នុងសភាពបែបនេះ រោងចក្រនោះក៏បានបិទទ្វារជាបណ្តោះអាសន្នផងដែរ នាព្រឹកថ្ងៃដដែលនោះ ។
កម្មការិនីរងគ្រោះទាំងនោះ ត្រូវគេបញ្ជូនតាមរថយន្តសង្គ្រោះរបស់អង្គភាព៧១១ ចំនួន៥គ្រឿង ទៅកាន់មន្ទីរពេទ្យបង្អែកពោធិ៍ចិនតុង ដើម្បីសង្គ្រោះបន្ទាន់ ហើយមូលហេតុនៃការដួលសន្លប់នោះ មិនទាន់ដឹងថាបណ្តាលមកពីអ្វីនៅឡើយទេ ។
ដោយឡែកនៅព្រឹកថ្ងៃដដែល នៅក្នុងរោងចក្រកាត់ដេរញូវវ៉ាយ ដែលមានទីតាំងស្ថិតនៅក្នុងភូមិទួលពង្រ សង្កាត់ចោមចៅ ក៏មានកម្មការិនីចំនួន៥១នាក់ និងកម្មករចំនួន៣នាក់ ដួលសន្លប់ដែរ ដែលគិតរហូតមកទល់ពេលនេះ មានរយៈពេល៣ថ្ងៃជាប់ៗគ្នាហើយ សម្រាប់រោងចក្រនេះ និងត្រូវគេបញ្ជូនទៅកាន់គ្លីនិកឯកជនមូលមិត្ត ដើម្បីសង្គ្រោះបន្ទាន់ ។ មូលហេតុនៃការដួលសន្លប់នោះ គឺប្រភពក្រៅផ្លូវការសង្ស័យថា បណ្តាលមកពីធុំក្លិនថ្នាំស្រៃ្ប៉ត៍បាញ់ស៊ុមកញ្ចក់នៅបន្ទប់ការិយាល័យក្នុងរោងចក្រ និងការភ័យតៗគ្នានៅពេលដែលឃើញមានអ្នកដួលសន្លប់ហើយ ក៏ដួលតាមគ្នាជាបន្តបន្ទាប់តែម្តង ។
សមត្ថកិច្ចបន្តថា នៅក្នុងរយៈពេល១សប្តាហ៍នេះ នៅក្នុងភូមិសាស្ត្រសង្កាត់ចោមចៅ ខណ្ឌពោធិ៍សែនជ័យ មានរោងចក្រកាត់ដេរចំនួន៤ហើយ ដែលមានកម្មករ-កម្មការិនីដួលសន្លប់ ក្នុងនោះមានរោងចក្រកាត់ដេរយីហោញូវ៉ា រោងចក្រកាត់ដេរសេនចូវ រោងចក្រកាត់ដេរដាឃ្វីន និងរោងចក្រកាត់ដេរអាយស៊ី (IC) ។
កាលពីថ្ងៃទី៣ មេសា កម្មការិនីចំនួន១១៣នាក់ ដែលបម្រើការងារនៅក្នុងរោងចក្រកាត់ដេរ ២ផ្សេងគ្នា ប៉ុន្តែមានថៅកែគ្រប់គ្រងតែមួយ បានដួលសន្លប់ជាបន្តបន្ទាប់ ។ តាមការពិនិត្យរបស់គណៈកម្មការចម្រុះ បានសង្ស័យទៅលើការពុលសាច់មាន់ចៀន ដែលខាងរោងចក្រធ្វើឱ្យកម្មករហូបនៅក្នុងរោងចក្រ មុនពេលមានរឿងបែបនេះកើតឡើង ។
រោងចក្រកាត់ដេរទាំង២ខាងលើ គឺរោងចក្រសេនចូវ និងរោងចក្រ daqian textile (Cambodia) Co.,Ltd. ដែលមានទីតាំងស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
តាមប្រភពព័ត៌មានឱ្យដឹងថា មុនពេលកើតហេតុ ក្រុមកម្មការិនីខាងលើ បាននាំគ្នាធ្វើការងារជាធម្មតា លុះមួយសន្ទុះក្រោយមក ស្រាប់តែមានអ្នកដួលសន្លប់ជាបន្តបន្ទាប់ ហើយខាងតំណាងរោងចក្របានយករថយន្តដឹកទៅសង្គ្រោះបន្ទាន់នៅតាមគ្លីនិកឯកជន ដែលស្ថិតនៅជិតនោះ ។ បន្ទាប់មក ទើបគេបញ្ជូនតាមរថយន្តសង្គ្រោះទៅកាន់មន្ទីរពេទ្យរដ្ឋមួយចំនួន ដូចជាមន្ទីរពេទ្យមិត្តភាពខ្មែរ-សូវៀត មន្ទីរពេទ្យបង្អែកពោធិ៍ចិនតុង និងមន្ទីរពេទ្យរដ្ឋផ្សេងទៀត ព្រោះមិនអាចទុកពួកគេព្យាបាលនៅគ្លីនិកឯកជនបានទេ ដោយសារតែពួកគេភាគច្រើនសុទ្ធតែមានសភាពធ្ងន់ធ្ងរ ។ ទោះបីជាបែបណា មិនមានកម្មការិនីណាម្នាក់មានគ្រោះថ្នាក់ដល់អាយុជីវិតនោះឡើយ ។ ក្រោយពេលមានហេតុការណ៍នេះកើតឡើង រោងចក្របានបិទទ្វារបណ្តោះអាសន្ន មិនមានកម្មករ-កម្មការិនីធ្វើការបន្តឡើយ ។
គួររំលឹកថា ក្នុងចំណោមរោងចក្រទាំង២ខាងលើនេះ គឺរោងចក្រកាត់ដេរសេនចូវ មានកម្មការិនីដួលសន្លប់២ថ្ងៃជាប់ៗគ្នាមកហើយ ដែលកាលពីវេលាម៉ោង៨ព្រឹក ថ្ងៃទី២ មេសា មានការដួលសន្លប់ម្តងរួចមកហើយ ហើយតាមសេចក្តីរាយការណ៍ កម្មការិនីដួលសន្លប់នោះ មានចំនួនជាង១០០នាក់ ។ ចំណែកឯរោងចក្រកាត់ដេរ daqian textile (Cambodia) Co., Ltd. មិនមានកម្មការិនីដួលសន្លប់ទេ នៅថ្ងៃទី២ មេសា នោះ លុះដល់ព្រឹកថ្ងៃទី៣ មេសា ស្រាប់តែមានអ្នកដួលសន្លប់ ហើយរោងចក្រកាត់ដេរ សេនចូវ ក៏មានកម្មការិនីដួលសន្លប់ជាបន្តបន្ទាប់ទៀតដែរ ។ បើតាមរបាយការណ៍របស់គណៈកម្មការចម្រុះ បានឱ្យដឹងថា ពួកគេរងគ្រោះដោយសារការពុលម្ហូបអាហារ ក្នុងនោះមានសាច់មាន់ចៀន ដែលខាងរោងចក្របានធ្វើឱ្យបរិភោគ ។ ម្យ៉ាងទៀត រោងចក្រទាំង២នោះ មានថៅកែគ្រប់គ្រងតែមួយ ចំណែកឯការហូបចុក គឺដូចគ្នាទាំងអស់ ដូច្នេះហើយទើបមានការសង្ស័យថាពុលដួលសន្លប់ដូចគ្នាបែបនេះ ។
បន្ទាប់ពីហូបសាច់មាន់ប្រឡាក់ចៀននោះរួចមក ពួកគេមានអាការៈមិនស្រួលខ្លួន ដោយចុកពោះក្អួត វិលមុខ ឈឺក្បាល រាករូស បន្ទាប់មកក៏ដួលសន្លប់ជាបន្តបន្ទាប់តែម្តង ហើយពួកគេត្រូវបានរ៉ាប់រងក្នុងការចេញថ្លៃព្យាបាល ដោយថៅកែរោងចក្រទាំងអស់ ៕
ចែករំលែកព័តមាននេះ