ខេត្តកំពង់ឆ្នាំង ៖ ក្នុងឱកាសបុណ្យភ្ជុំបិណ្ឌឆ្នាំនេះភ្ញៀវទេសចរបានសម្រុកទៅកម្សាន្តនៅតំបន់ទេសនានា ពិសេសតំបន់មានទឹកធ្លាក់ដូចជា ទឹកធ្លាក់ថ្មក្រាល ទឹកធ្លាក់ស្រែអំពិល ទឹកធ្លាក់ធារាសាស្ត្រគង្គា និងធារាសាស្ត្រអាចាង ជាដើម ។…
ខេត្តកំពង់ឆ្នាំង ៖ ក្នុងឱកាសបុណ្យភ្ជុំបិណ្ឌឆ្នាំនេះភ្ញៀវទេសចរបានសម្រុកទៅកម្សាន្តនៅតំបន់ទេសនានា ពិសេសតំបន់មានទឹកធ្លាក់ដូចជា ទឹកធ្លាក់ថ្មក្រាល ទឹកធ្លាក់ស្រែអំពិល ទឹកធ្លាក់ធារាសាស្ត្រគង្គា និងធារាសាស្ត្រអាចាង ជាដើម ។ ប៉ុន្តែសម្រាប់ទឹកធ្លាក់ធារាសាស្ត្រគង្គា ដែលមានទីតាំងស្ថិតក្នុងភូមិត្បែងខ្ពស់ ឃុំតាំងក្រសាំង ស្រុកទឹកផុសវិញ មានភាពមិនប្រក្រតីពីភ្ញៀវទេសចរព្រោះតែថ្លៃខ្យូស និងផ្ញើរថយន្តបានយកតម្លៃថ្លៃលើសធម្មតា ដោយខ្យូសមួយកន្លែងមានទំហំ២ម៉ែត្រ៤ជ្រុង យកថ្លៃ២ម៉ឺនរៀល និងថ្លៃរថយន្ត១គ្រឿងថ្លៃ១ម៉ឺនរៀលជាដើម នេះមិនទាន់គិតថ្លៃម្ហូបអាហារ និងភេសជ្ជៈផង ។
យ៉ាងនេះ ក្តីអាជ្ញាធរស្រុកទឹកផុសបានទទួលស្គាល់ថា ពិតជាមានតម្លៃថ្លៃពីម្ចាស់អាជីវកម្មមែន ទោះបីមានការណែនាំពីអាជ្ញាស្រុកយ៉ាងណាក្តី ។
លោក សាំង សុឃឿន អភិបាលស្តីទីស្រុកទឹកផុសបានអោយដឹងថា លោកក៏បានទទួលព័ត៌មាននេះដែរ ដោយមានការលើកឡើងក្នុងបណ្តាញសង្គមការយកថ្លៃផ្ញើរថយន្តទេសចរណ៍១គ្រឿង ថ្លៃ១ម៉ឺនរៀល ។ ក្រោយមកលោកបានអោយអាជ្ញាធរឃុំចុះស្រាវជ្រាវក្នុងរឿងនេះហើយបានដឹងថា កន្លែងផ្ញើម៉ូតូដែលគេមិនចង់ទទួលបញ្ជើរថយន្ត ហើយភ្ញៀវនៅតែសម្រុកយកទៅផ្ញើ គឺពិតជាគេយក១ម៉ឺនរៀលមែន ។ លោកក៏បានណែនាំអោយយកថ្លៃត្រឹមតែ៥ពាន់រៀលប៉ុណ្ណោះ លើកលែងតែរថយន្តទូរីសមានភ្ញៀវច្រើន លោកអនុញ្ញាត្តិ អោយយក១ម៉ឺនរៀល ។
សម្រាប់ថ្លៃខ្យូសវិញ លោកក៏បានណៃនាំអោយយកត្រឹម១ម៉ឺនរៀលដែរ តែមិនដឹងម្ចាស់ខ្យូសទទួលការណែនាំ ឬយ៉ាងណានោះទេ ព្រោះក្នុងរមណីដ្ឋានដែលប្រុងប្រយ័ត្នជាងគេ គឺទឹកធ្លាក់ស្រែអំពិល និងទឹកធ្លាក់ថ្មក្រាល ដោយសារតែមានភ្ញៀវទេសចរច្រើនលើសលុប ។
យោងតាមរបាយការណ៍សម្រាប់ថ្ងៃទី២៩ ខែកញ្ញា ភ្ញៀវទៅកម្សាន្តទឹកធ្លាក់ស្រែអំពិលមានចំនួនជាង១ម៉ឺននាក់ ដោយក្នុងនោះរថយន្តមានជាង៤០០គ្រឿង និងម៉ូតូជាង១ពាន់គ្រឿង ។ ចំណែកទឹកធ្លាកថ្មក្រាលវិញ មានរថយន្ត២៦០គ្រឿង ម៉ូតូជាង៧០០គ្រឿង និងមនុស្សជាង៦ពាន់នាក់ ។ ដោយឡែកនៅទំនប់គង្គាវិញ ទូរលេខលោកមិនបានទទួលទេ តែអាចប្រហាក់ប្រហែល ឬអាចក្រោមទឹកធ្លាក់ថ្មក្រាលបន្តិចបន្តួចប៉ុណ្ណោះ ។
លោកអភិបាលស្តីទីស្រុកទឹកផុសបានបន្តថា ចំពោះសន្តិសុខ សណ្តាប់ធ្នាប់ នៅតំបន់គង្គាវិញ គឺមានភាពល្អប្រសើរ ដោយលោកបានដាក់កម្លាំងនគរបាល កម្លាំងប្រជាការពារ និងកម្លាំងយោធាកងកាំភ្លើងធំ នៅជួយការពារសណ្តាប់ធ្នាប់ និងសម្រួលចរាចរណ៍ជាប្រចាំ ។
សូមរំឮកថាតំបន់គង្គា គឺជាធារាសាស្ត្រស្ទាក់ទឹកដែលកសាងឡើងដោយក្រសួងអភិវិឌ្ឍន៍ជនបទ ដើម្បីយកទឹកធ្វើស្រែរបស់ប្រជាកសិករក្នុងតំបន់នោះ ។ ក្រោយពីប្រទេសជាតិមានសុខសន្តិភាព ជីវភាពប្រជាពលរដ្ឋកាន់តែធូធារ ស្រាប់តែទំនប់ស្ទាក់ទឹកមួយនេះក្លាយជាតំបន់ទេសចរណ៍ គឺជាទីចាប់អារម្មណ៍ ទាំងភ្ញៀវជាតិ និងអន្តរជាតិផងដែរ ធ្វើអោយអ្នកដែលមានដីជាប់និងធារាសាស្ត្រខាងលើនេះមានឱកាសចាប់មុខរបរលក់ដូរធ្វើខ្យូសសម្រាប់ភ្ញៀវ ធ្វើកន្លែងភាស៊ីផ្ញើរថយន្ត ម៉ូតូ លក់ម្ហូបអាហារ និងពោងសម្រាប់ជួយជួលជិះលែងក្នុងទឹកទៀតផង ដែលធ្វើអោយជីវភាពពួកគាត់កាន់តែប្រសើរឡើង ៕ កែសម្រួលដោយ ៖ សុឃាក់
ចែករំលែកព័តមាននេះ