ខេត្តសៀមរាប៖​ អាជីវករលក់​គ្រឿងអលង្ការ ​និងដូរលុយម្នាក់​ បានត្រូវក្រុមចោរប្លន់​ប្រដាប់អាវុធភ្ជង់​ដណ្តើមយកហឹបលុយ​ជិះគេចទៅបាត់ដោយសុវត្ថិភាព ។

ហេតុការណ៏នេះ​បានកើត​ឡើងនៅម៉ោង៥និង១៥នាទីព្រឹកថ្ងៃទី០​៤​ មេសា​ ២០១៤ ​នៅចំណុចមុខផ្ទះជរងគ្រោះ​ ស្ថិតនៅក្នុងភូមិផ្សារដែក​ ឃុំដំដែក ​ស្រុកសូត្រនិគម ។

បើតាមភ្នាក់ងារ​យកព័ត៌មាន​កោះសន្តិភាព​បានស្រង់សម្តីលោក​ ហេង សំណាង​ អធិការរងស្រុកសូត្រ​និគមឲ្យដឹងថា ​ជនរងគ្រោះមានឈ្មោះ ​ប៊ុន អេង​ អាយុ៤៩ឆ្នាំ​ ប្រពន្ឋឈ្មោះ ​សៀង ប៉ាយ ។

សេចក្តីរាយការណ៏បានបន្តថា​ ជនរងគ្រោះ​បានចេញទៅប្រកបរបរ​ដូចសព្វមួយដង ​លុះនៅវេលាកើតហេតុ ​ជនរងគ្រោះបានជិះម៉ូតូ​ដាក់ហឹបលុយ​និងគ្រឿងអលង្ការ​បម្រុងមកផ្សារ ​ស្រាប់តែលេចមុខជន​សង្ស័យ​៣នាក់​ជិះម៉ូតូ០១គ្រឿង ​បានធ្វើសកម្មភាព​ប្រើកំាភ្លើងខី្ល​មិនស្គាល់ម៉ាក ​ភ្ជង់គម្រាមនិង​ដណ្តើមហឹបជិះចេញ​ទៅដោយសុវត្ថិភាព ។ បើតាមជនរងគ្រោះនៅក្នុងហឹបនោះមានគ្រឿងអលង្ការមួយចំនួន និង លុយខ្មែរ១០លានរៀល ។

នៅពេលនេះ​ សមត្ថកិច្ចកំពុងស្រាវជ្រាវ​ ដើម្បីចាប់​ជនសង្ស័យ​យកមកផ្តន្ទាទោស​តាមច្បាប់ ៕