ខេត្តបន្ទាយមានជ័យ ៖ នគរបាលការពារព្រំដែនគោកលេខ៩១១ ប៉ុស្តិ៍ព្រៃគប់ សហការណ៍ជាមួយអ្នកស្រុក ក្របួចចាប់បានជនសង្ស័យលួចម៉ូតូម្នាក់ ខណ:ម្ចាស់តាមទាន់កំពុងយកទៅឲ្យជាងជួយធ្វើសោរព្រោះធាក់មិនឆេះ ក្រោយពីលួចបានសម្រេច កាលពីវេលាម៉ោងជិត ៥រសៀលថ្ងៃទី០៣ ខែមេសា ឆ្នាំ២០១៤ នៅភូមិ
ខេត្តបន្ទាយមានជ័យ ៖ នគរបាលការពារព្រំដែនគោកលេខ៩១១ ប៉ុស្តិ៍ព្រៃគប់ សហការណ៍ជាមួយអ្នកស្រុក ក្របួចចាប់បានជនសង្ស័យលួចម៉ូតូម្នាក់ ខណ:ម្ចាស់តាមទាន់កំពុងយកទៅឲ្យជាងជួយធ្វើសោរព្រោះធាក់មិនឆេះ ក្រោយពីលួចបានសម្រេច កាលពីវេលាម៉ោងជិត ៥រសៀលថ្ងៃទី០៣ ខែមេសា ឆ្នាំ២០១៤ នៅភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត។
ជនសង្ស័យខាងលើឈ្មោះ សេង ពេក ភេទប្រុស អាយុ២៨ឆ្នាំមុខរបរជាកម្មករ មានទីលំនៅក្នុងភូមិកើតហេតុ។ នគរបាលការពារព្រំដែនគោកប៉ុស្តិ៍ព្រៃគប់ ប្រាប់ថាជនសង្ស័យបានធ្វើសកម្មភាពលួចម៉ូតូ ម៉ាកហុងដាឌ្រីម ពណ៏ខ្មៅ សេរីឆ្នាំ២០០៣ របស់ស្ត្រីម្នាក់ នៅក្នុងភូមិជាមួយគ្នាហើយក្រោយពីលួចបានដោយសារម៉ូតួអត់សោរព្រោះសោរនៅម្ចាស់រវល់ចូលលេងផ្ទះអ្នកស្រុក ក៍ត្រូវជនសង្ស័យអូសរត់ យកទៅកុហកជាងជួសជុលម៉ូតូថាជារបស់គេជិះជ្រុះបាត់សោរ។
ស្ត្រីជាម្ចាស់ម៉ូតូឈ្មោះ នួម រ៉ាយូ អាយុ២៦ឆ្នាំ មានទីលំនៅក្នុងភូមិកើតហេតុ និយាយថាម៉ូតូរបស់គាត់ក្រោយពីដឹងថាបាត់ភ្លាមគាត់បានចេញមកសួរអ្នកស្រុក ហើយគេប្រាប់ថាឃើញជនសង្ស័យឈ្មោះ ពេកអូស រត់ទៅទិសខាងកើត ក្នុងនោះបុរសអ្នកឃើញហេតុការណ៍ម្នាក់ក្នុងចំណោម២នាក់ថែមទាំងយកម៉ូតូឌុបស្ត្រី ជាម្ចាស់ម៉ូតូទៅតាមរកផងដែរ។
ស្ត្រីខាងលើបន្តថាពេលទៅដល់ចំណុចរង្វង់មូល (ចំណុចឃួនវណ្ណា) ក្នុងភូមិកើតហេតុក៍ឃើញម៉ូតូរបស់នាង កំពុងស្ថិតនៅកន្លែងជាងជួសជុលម៉ូតូ ហើយពេលសួរនាំ ថាតើនណាយកម៉ូតូរបស់នាងជនសង្ស័យឆ្លើយថា ជាម៉ូតូរបស់គេជ្រុះបាត់សោរនិងយកមកធ្វើសោរ។ ស្ត្រីម្ចាស់ម៉ូតូបន្តថា ពេលនោះនាងចាប់ទាញសោរ ពីហោប៉ៅហើយនិយាយថានេះជាសោរម៉ូតូរបស់ខ្ញុំ ភ្លាមនោះជនសង្ស័យនិយាយដោះសារថា អីចឹងខ្ញុំអត់ដឹងទេ សុំទៅផ្ទះមុនហើយ។ស្ត្រីខាងលើបន្តថាភ្លាមនោះ នាងក៍ប្ដឹងសមត្ថកិច្ចនគរបាលការពារព្រំដែនគោក ដែលនៅក្បែរ នោះដេញប្រផាប់ចាប់ប្រភីងបានភ្លាមៗតែម្ដង។
ម្ចាស់ម៉ូតូនិយាយថា បើជាងជួសជុលម៉ូតូ មិនស្គាល់ថាជាម៉ូតូនាងទេ ម្លេះធ្វើសោរឲ្យជិះទៅបាត់ហើយ ប៉ុន្តែពេលជនសង្ស័យយកម៉ូតូទៅឲ្យធ្វើសោរជាងម៉ូតូនោះ ស្គាល់ម្ចាស់និងសង្ស័យក៍ពន្យាពេលមិនព្រមធ្វើឲ្យរហូតទាល់តែម្ចាស់តាមទាន់ដេញចាប់ជាមួយសមត្ថកិច្ច។
ទោះជាយ៉ាងណាជនសង្ស័យ ក្រោយពីធ្វើកំណត់ហេតុសួរនាំរួច នគរបាលការពារព្រំដែនគោកប៉ុស្តិ៍ព្រៃគប់ ក៍បានប្រគល់ជនសង្ស័យ ទៅនគរបាលរដ្ឋបាលប៉ុស្តិ៍ផ្សារកណ្ដាល ដើម្បីចាត់ការបន្តតាមនិតិវិធីច្បាប់។ ចំណែកម៉ូតូរបស់ជនរងគ្រោះ ត្រូវនគរបាលរដ្ឋបាលប៉ុស្តិ៍ផ្សារកណ្ដាលប្រាប់ថាក្រោយធ្វើកំណត់ហេតុរួចនិងប្រគល់ឲ្យម្ចាស់វិញ ។
ចែករំលែកព័តមាននេះ