ប្រភពពីវិទ្យុសំទ្បេងសហរដ្ឋអាមេរិក (VOA)បានបញ្ជាក់ថា កាលពីយប់ថ្ងៃទី១ មេសា លទ្ធផលបោះឆ្នោតសមាជិកព្រឹទ្ធសភាថៃ កាលពីចុងសប្តាហ៍កន្លងទៅ បានបង្ហាញថា ក្រុមអ្នកឈរលើជំហររបស់រដ្ឋាភិបាលមានសំទ្បេងភាគច្រើន ។ នេះចាត់ទុកថា ជាដំណឹងល្អដ៏កម្ររបស់លោកស្រីយីងទ្បាក់ ស៊ីណាវ៉ាត្រា ដែលកំពុងត្រូវស្ថាប័នប្រឆាំងអំពើពុករលួយ ធ្វើការចោទប្រកាន់ពាក់ព័ន្ធនឹងគម្រោងការទទួលទិញស្រូវដ៏អាស្រូវនោះ ។
VOA បានផ្សាយថា លោកស្រីយីងទ្បាក់ ស៊ីណាវ៉ាត្រា នាយករដ្ឋមន្ត្រីថៃ បានរងការចោទប្រកាន់ថា មានភាពព្រងើយកន្តើយក្នុងការបំពេញតួនាទីលើគម្រោងការទិញស្រូវរបស់រដ្ឋាភិបាល ដែលបច្ចុប្បន្នកំពុងក្លាយជាការខាតបង់ដ៏ធ្ងន់ធ្ងរមួយ ។ ស្របពេលជាមួយគ្នានេះ ប្រសិនបើគណៈកម្មការការពារ និងប្រឆាំងអំពើពុករលួយបញ្ជាក់ថា មានកំហុសពិត ក្នុងដំណាក់កាលបន្ត គឺបញ្ជូនសំណុំរឿងទៅព្រឹទ្ធសភា ដើម្បីដំណើរការដកលោកស្រីយីងទ្បាក់ ចេញពីតំណែងតាមសំទ្បេង៣ភាគ៥នៃចំនួនសរុប១៥០សំទ្បេងក្នុងព្រឹទ្ធសភា ។ VOA បានបន្តទៀតថា លទ្ធផលបោះឆ្នោតហាក់ដូចជាដាក់សម្ពាធដល់ក្រុមអ្នកតវ៉ា ដែលកំពុងធ្វើបាតុកម្មអស់រយៈពេលជាច្រើនខែមកហើយ ដើម្បីផ្តួលរំលំលោកស្រីយីងទ្បាក់ និងកម្ចាត់ឥទ្ធិពលរបស់លោកថាក់ស៊ីន ស៊ីណាវ៉ាត្រា ដែលជាបងប្រុសរបស់លោកស្រី ។
តាមរបាយការណ៍របស់គណៈកម្មការរៀបចំការបោះឆ្នោតឃើញថា បេក្ខជនព្រឹទ្ធសភា ដែលឈ្នះក្នុងមណ្ឌលបោះឆ្នោតនៅភាគខាងជើង និងឦសាន គឺជាទីតាំងដ៏មានប្រជាប្រិយភាពសំខាន់របស់លោកថាក់ស៊ីន ដែលភាគច្រើនមានសម្ព័ន្ធភាពជាមួយគណបក្សភឿថៃ ។ ស្របពេលជាមួយគ្នានេះ តាមការវិភាគរបស់«ណេស្ហិនម៉ាល់ទីមីឌៀ ហ្គ្រុប» បានបញ្ជាក់ថា ភាគីរបស់រដ្ឋាភិបាលបានទទួលការជ្រើសរើសច្រើនជាង៥០% ឬប្រហែល៧៧អាសនៈ នៃការបោះឆ្នោតកាលពីចុងសប្តាហ៍កន្លងទៅ ៕
ចែករំលែកព័តមាននេះ