រដ្ឋាភិបាលមុិកសុិក បានប្រកាសកាលពីពេលថ្មីៗនេះថា នឹងធ្វើការផ្លាស់ប្តូរផែនការយុទ្ធសាស្ត្រផ្នែកសន្តិសុខសម្រាប់ទប់ទល់នឹងអំពើហិង្សា និងឧក្រិដ្ឋកម្មដែលកើនខ្ពស់នៅក្នុងតំបន់ជុំវិញក្រុងមុិកសុីកូស៊ីធី ។ ទីភ្នាក់ងារព័ត៌មានបរទេស កាលពីថ្ងៃទី២ មេសា ផ្សាយថា លោកមីហ្គេល អង់ជែល អូសូរីយូ៉ឆុង រដ្ឋមន្ត្រីក្រសួងមហាផ្ទៃរបស់មុិកសុិក បានបង្ហើបឱ្យដឹងថា តំបន់ជុំវិញក្រុងមុិកសុីកូស៊ីធី ដែលមានពលរដ្ឋរស់នៅជាង១៥លាននាក់ កំពុងក្លាយជាកន្លែងអសន្តិសុខក្រោយពីកើតមានឃាតកម្ម និងអំពើហិង្សាកើនឡើងខ្ពស់ ។
នៅក្នុងរបាយការណ៍បានបញ្ជាក់ថា បទដ្ឋានលើកកម្ពស់យុទ្ធសាស្ត្រផ្នែកសន្តិសុខខាងលើរបស់រដ្ឋាភិបាលមុិកសុិក រួមមានទាំងការបំពាក់ម៉ាស៊ីនថតបង្កប់ជាង៦.០០០គ្រឿង និងកងកុម្មង់ដូពិសេសដែលឆ្លងកាត់ការហ្វឹកហាត់លើការបង្ក្រាបបទឧក្រិដ្ឋប្រហែល២.០០០នាក់ ។ចំណែកលោកអេរូបៀល អាប៊ីឡា ប៊ីយេហ្គាស អភិបាលរដ្ឋអេស្តាដូដេមុិកសុិក ផ្នែកមួយនៅក្នុងរដ្ឋដែលមានតួលេខនៃការកើតឧក្រិដ្ឋកម្មខ្ពស់របស់មុិកសុិក បានធ្វើការអំពាវនាវដល់រដ្ឋាភិបាលមុិកសុិកឱ្យជួយពលរដ្ឋខ្លួនក្នុងការបង្ក្រាបឧក្រិដ្ឋកម្ម រួមទាំងទទួលស្គាល់ថា ពលរដ្ឋដែលស្ថិតក្រោមការគ្រប់គ្រងរបស់ខ្លួនកំពុងជួបនឹងបញ្ហារាតត្បាតនៃបទឧក្រិដ្ឋដែលកើនឡើងយ៉ាងឆាប់រហ័ស ។
បច្ចុប្បន្ន ក្រុងមុិកសុីកូស៊ីធី និងតំបន់នៅជុំវិញចាត់ទុកថា ជាផ្នែកមួយនៃតំបន់ដែលមានប៉ូលិសប្រចាំការច្រើនបំផុតនៅលើពិភពលោក ។ លើសពីនេះ ចំនួនអ្នកដែលក្លាយជាជនរងគ្រោះនៃអំពើឃាតកម្មបានកើនខ្ពស់នៅក្នុងកម្រិត៨,៤នាក់ក្នុងចំណោមពលរដ្ឋ១០០.០០០នាក់ គឺខ្ពស់ជាងក្រុងញូវយ៉ក សហរដ្ឋអាមេរិក ដែលមានអ្នកត្រូវគេធ្វើឃាតប្រហែល៥,៦នាក់ក្នុងចំណោម១០០.០០០នាក់ ៕
ចែករំលែកព័តមាននេះ