ក្នុងរដូវបុណ្យភ្ជុំបិណ្ឌដែលនៅតាមវត្តអារាមទូទាំងប្រទេស កុះករទៅដោយមហាជនធ្វើបុណ្យ ឧទ្ទិសកុសលដល់ញាតការបស់ខ្លួននេះ សូមបង្ហាញពីរបៀបនៃការដុតធូបទៅតាមការឧទ្ទិស នីមួយៗ ៖
១-ការអុជធូប១សរសៃ ៖ តំណាងឲ្យការកើតមកមានជីវិតតែមួយ ទៅវិញតែមួយ ។
២-ការអុជធូប៣សរសៃ ៖ ដើម្បីរំឭកនឹកគុណចំពោះព្រះរតនត្រ័យ ព្រះពុទ្ធ ព្រះធម៌ និងព្រះសង្ឃ។
៣ -ការអុជធូប៤សរសៃ ៖ តំណាងឲ្យធាតុទាំង៤ (ទឹក ដី ភ្លើង ខ្យល់) ។
៤ -ការអុជធូប៥សរសៃ ៖ បូជាទៅដល់ព្រះទាំង៥អង្គ គឺព្រះកុក្កុសន្ធោ(មាន់) ព្រះកោនាគមនោ(នាគ) ព្រះកស្សបោ(អណ្ដើក) ព្រះសមណគោត្តម(គោ) និងព្រះសិអារ្យមេត្រី(ខ្លា) ។
៥ -ការអុជធូប៧សរសៃ ៖ បូជាចំពោះញាតិទាំងប្រាំពីរសន្តាន៖ ថ្នាក់លើខ្លួនបីជាន់ មានឪពុកម្ដាយ ជីដូនជីតា យាយទួតតាទួត និងថ្នាក់ក្រោមខ្លួនយើងបីជាន់គឺ កូនចៅ ចៅទួត និងបូករួមទាំងខ្លួនយើងផងគឺប្រាំពីរសន្តាន ។
៦-ការអុជធូប៨សរសៃ ៖ តំណាងឲ្យអដ្ឋង្គិមគ្គ ជាផ្លូវមួយធ្វើឲ្យដឹង និងយល់ច្បាស់ពីធម៌ពិត ពីសច្ចភាពនៃមនុស្សលោក ជាផ្លូវនៃការរំលត់ទុក្ខ ហើយអាចទៅកាន់និពាន្វ ។
៧-ការអុជធូប៩សរសៃ ៖ បូជាចំពោះទេវតា ថែរក្សាទិសទាំងប្រាំបួន ទិសបូព៌ ទិសអាគ្នេយ៍ ទិសទក្សិណ ទិសនិរតី ទិសបស្ចិម ទិសពាយ័ព្យ ទិសឧត្ដរ ទិសឦសាន និងទិសខាងលើ ។
-ការអុជធូប១១សរសៃ តំណាងឲ្យមេត្តាធម៌ទាំង១១ ។
៨-ការអុជធូប១២សរសៃ ៖ បូជាចំពោះគុណម្ដាយ១២ ឬគុណធាតុ ។
៩-ការអុជធូប១៩សរសៃ សម្រាប់ពិធីហៅព្រលឹង (មនុស្សមានព្រលឹង១៩ រួមទាំងព្រលឹងធំ និងព្រលឹងតូច) ។
១០-ការអុជធូប២១សរសៃ បូជាចំពោះគុណឪពុក ។
១១–ការអុជធូប៣៣សរសៃ បូជាចំពោះគុណឪពុក ម្ដាយ ។
១២-ការអុជធូបចំនូន៣៨សរសៃ ៖ រំឭកនឹកគុណព្រះសម្មាសម្ពុទ្ធ បានត្រាស់សម្តែងឲ្យពពួកមនុស្ស ទេវតា ឥន្ទ្រព្រហ្មទាំងអស់បានយល់ដឹងពីមង្គល៣៨ប្រការ ៕ (កែសម្រួលដោយ ៖ បុប្ផា)
ចែករំលែកព័តមាននេះ