ព្រះមហាក្សត្រ ព្រះរាជទានពរល្អហួស ឱ្យជោគជ័យការប្រកួតលើឆាកអន្តរជាតិ
- ភ្នំពេញ
រាជធានីភ្នំពេញ ៖ ជូរី ល្អហួស មានមោទនភាពខ្លាំង ដ្បិតបានព្រះរាជទានពរដោយផ្ទាល់ពីព្រះមហាក្សត្រឱ្យទទួលបានជោគជ័យសម្រាប់ការប្រកួតបវរកញ្ញានៅលើឆាកអន្តរជាតិនាពេលឆាប់ៗខាងមុខ ។
ល្អហួស បានចាត់ទុកព្រះរាជទានពរពីព្រះមហាក្សត្រនាពេលនេះ គឺជាកម្លាំងចិត្តយ៉ាងធំធេងសម្រាប់នាងនៅក្នុងការខិតខំប្រឹងប្រែងបន្ថែមទៀតចំពោះការប្រកួតប្រជែងលើវិថីបវរកញ្ញាមួយនេះ ។

ជាមួយរូបភាពវីដេអូក្រាបសំពះព្រះមហាក្សត្រដោយផ្ទាល់នៅក្នុងកម្មវិធីមួយកាលពីពេលថ្មីៗកន្លងមក ជូរី ល្អហួស បានភ្ជាប់ជាមួយនឹងសំណេរបង្ហោះលើបណ្តាញសង្គមកាលពីថ្ងៃទី១ វិច្ឆិកា ២០២៦ ថា «នាងខ្ញុំជូរី ល្អហួស ពិតជាមានសេចក្តីសោមនស្សរីករាយ និងកិត្តិយសយ៉ាងក្រៃលែង ដែលបានចូលក្រាបថ្វាយបង្គំ និងទទួលព្រះរាជពរជ័យពី ព្រះករុណា ព្រះបាទនរោត្តម សីហមុនី ។
អ្វីដែលជាកិត្តិយសដ៏វិសេសវិសាល និងមានតម្លៃបំផុត គឺព្រះករុណាទ្រង់បានព្រះរាជទានព្រះពរ និងលើកទឹកព្រះទ័យ ប្រាថ្នាឱ្យរូបនាងខ្ញុំទទួលបានជ័យជម្នះក្នុងការប្រកួតលើឆាកអន្តរជាតិនៅប្រទេសឥណ្ឌូណេស៊ី ដើម្បីនាំមកនូវកិត្តិយស និងជ័យជម្នះជូនជាតិមាតុភូមិកម្ពុជា ។

ព្រះរាជពរជ័យដ៏ថ្លៃថ្លានេះនឹងក្លាយជាកម្លាំងចិត្តដ៏ធំធេង និងជាអនុស្សាវរីយ៍ដ៏មានតម្លៃដែលខ្ញុំនឹងចងចាំជានិច្ច ។
ខ្ញុំនឹងខិតខំប្រឹងប្រែងឱ្យអស់ពីសមត្ថភាព ដើម្បីមិនឱ្យក្តីសង្ឃឹម និងព្រះរាជពរជ័យដ៏មានតម្លៃនេះកន្លងផុតទៅដោយឥតន័យ ។
សូមក្រាបថ្វាយព្រះពរ ព្រះអង្គសូមមានព្រះរាជសុខភាពល្អបរិបូរណ៍ និងព្រះជន្មាយុយឺនយូរ» ។
ល្អហួស បានបញ្ចេញឈុតតំណាងជាតិ ដែលមានឈ្មោះថា«នារីកសិករ»ជាមួយអត្ថន័យដ៏ជ្រាលជ្រៅសម្រាប់ការប្រកួតបវរកញ្ញានៅឥណ្ឌូណេស៊ី ។
ល្អហួស នឹងចេញទៅប្រកួតបវរកញ្ញាតំណាងកម្ពុជាក្នុងកម្មវិធី Miss Teen international ដែលធ្វើឡើងនៅប្រទេសឥណ្ឌូណេស៊ី នៅថ្ងៃទី៧ ខែវិច្ឆិកា ឆ្នាំ២០២៦ ៕




ចែករំលែកព័តមាននេះ