អតីតតារាសម្តែង ម៉េង ប៊ុនឡូ ចាកចេញពីផ្ទះបាត់ខ្លួនដោយគ្មានដំណឹង ខណៈគ្រួសារព្រួយបារម្ភ និងកំពុងស្វែងរក
- ភ្នំពេញ
រាជធានីភ្នំពេញ ៖ មហាជនបានសម្តែងការភ្ញាក់ផ្អើល បន្ទាប់ពីទទួលដំណឺងពីក្រុមគ្រួសាររបស់អតីតតារាសម្តែងលោក ម៉េង ប៊ុនឡូ ប្រកាសស្វែងរករូបលោក ដែលបានចេញពីផ្ទះ និងបាត់ខ្លួនដោយគ្មានដំណឹងអស់រយៈពេល១ថ្ងៃពេញ ដែលធ្វើឲ្យក្រុមគ្រួសាររបស់លោកសម្តែងក្តីបារម្ភយ៉ាងខ្លាំង ។
តាមរយៈបទសម្ភាសន៍ជាមួយអ្នកសារព័ត៌មានមួយ ប្អូនប្រុសបង្កើតរបស់លោកបានអះអាងថា លោក ម៉េង ប៊ុនឡូ បានចាកចេញពីផ្ទះដោយគ្មានដំណឹងអស់រយៈពេលមួយថ្ងៃហើយ ក្នុងពេលដែលក្រុមគ្រួសារបានព្យាយាមទាក់ទងដែរ តែទាក់ទងមិនបាន ។
លោកបញ្ជាក់ថា លោក ម៉េង ប៊ុនឡូ បានចាកចេញពីផ្ទះទាំងកំពុងមានជំងឺ ហើយការចេញពីផ្ទះដោយគ្មានដំណឹងនាពេលនេះក៏លោកម៉េង ប៊ុនឡូ មិនបានយកថ្នាំសម្រាប់លេបទៅតាមខ្លួនដែរ ហេតុនេះធ្វើឲ្យក្រុមគ្រួសារមានការបារម្ភយ៉ាងខ្លាំង ។
បច្ចុប្បន្ន ក្រុមគ្រួសាររបស់លោក ម៉េង ប៊ុនឡូ បានដាក់ពាក្យបណ្តឹងហើយ ព្រោះលោកបានបាត់ខ្លួនរយៈពេលជាងមួយថ្ងៃមកហើយ ខណៈពេលដែលក្រុមគ្រួសារព្យាយាមទាក់ទងដែរ តែមិនអាចទាក់ទងលោកបាននោះឡើយ ។
ដំណឹងនៃការបាត់ខ្លួនរបស់លោក ម៉េង ប៊ុនឡូ នាពេលនេះ មិនមែនតែក្រុមគ្រួសាររបស់លោកប៉ុណ្ណោះទេ ដែលមានការព្រួយបារម្ភ ពោលគេឃើញមានអ្នកសិល្បកររួមជំនាន់របស់លោកជាច្រើនទៀត ក៏មានព្រួយបារម្ភដូចគ្នា ខណៈពេលដែលអ្នកសិល្បៈជិតស្និទ្ធិខ្លះក៏បានព្យាយាមទាក់ទងលោកដែរ តែនៅមិនអាចទាក់ទងបានដូចគ្នា ។
ទោះយ៉ាងណា ពាក់ព័ន្ធបញ្ហាខាងលើនេះ កោះសន្តិភាពនៅមិនទាន់អាចស្វែងរកប្រភពពីក្រុមគ្រួសាររបស់លោក ម៉េង ប៊ុនឡូ ដើម្បីធ្វើការបកស្រាយនៅឡើយទេ ប៉ុន្តែសម្រាប់មិត្តភក្តិដែលធ្លាប់ស្និទ្ធស្នាលជាមួយលោកម្នាក់បានសន្មត់ និងដាក់ការសង្ស័យថា លោក ម៉េង ប៊ុនឡូ បាត់ខ្លួននាពេលនេះគឺអាចទៅសម្ងំនៅកន្លែងណាមួយ ។
ទោះជាយ៉ាងណា ប្រភពខាងលើនេះមិនអាចបញ្ជាក់ពីទីតាំងដែលលោក ម៉េង ប៊ុនឡូ អាចនឹងទៅនោះឡើយ ព្រោះអាចមានបញ្ហាដល់រូបលោក ខណៈពេលបច្ចុប្បន្នលោកក៏បានដាច់ការទាក់ទងគ្នាជាមួយលោក ម៉េង ប៊ុនឡូ មួយរយៈហើយ ទើបលោកមិនចង់និយាយអ្វីពីអតីតរបស់តារាសម្តែងរូបនេះទៀតឡើយ ។
ទោះជាយ៉ាងណាក៏ដោយប្រភពខាងលើជឿថា ប្រសិនបើលោក ម៉េង ប៊ុនឡូ ពិតប្រាកដជាទៅសម្ងំនៅកន្លែងសង្ស័យនោះមែន មិនយូរឡើយលោកនឹងត្រឡប់មកផ្ទះវិញជាមិនខាន ។
គួរបញ្ជាក់ថា លោក ម៉េង ប៊ុនឡូ ធ្លាប់ជាតារាចម្រៀង និងសម្តែងដែលមានកេរ្តិ៍ឈ្មោះមួយរូប ប៉ុន្តែមួយរយៈចុងក្រោយលោកក៏បានបាត់វត្តមានពីអាជីពសិល្បៈ ដោយមិនសូវឮដំណឹងថា លោកមានគ្រួសារ និងរស់នៅទីណានោះឡើយ ។
ទើបតែថ្មីៗនេះ មហាជនក៏បានឃើញវត្តមានរូបលោកសាជាថ្មីឡើងវិញ តាមរយៈការបញ្ចេញឲ្យដឹងពីមិត្តភក្តិដែលជាអ្នកសិល្បៈមួយរូប ក្នុងអំឡុងពេលដែលលោកបានចេញទៅព្យាបាលដោយការវះកាត់ជើងរបស់លោកនៅក្រៅប្រទេស ។
ចាប់តាំងពីពេលនោះមក គេបានឃើញលោក ម៉េង ប៊ុនឡូ ចូលរួមដឹកនាំ និងសម្តែងរឿងខ្លីៗក្នុងផលិតកម្មមួយ ដោយនៅក្នុងនោះក៏មានការចូលរួមសម្តែងរួមគ្នាផងដែរពីសំណាក់អតីតតារាកំប្លែងនាង ប្រិមប្រិយ និងនាយ ក្រិន ផងដែរ៕
ចែករំលែកព័តមាននេះ