រាជធានីភ្នំពេញ៖ ស្របពេលប្រាក់ឈ្នួលអប្បបរមាក្នុងវិស័យកាត់ដេរសម្រាប់កម្មករ-កម្មការិនីត្រូវបានប្រកាសជាផ្លូវការកំណត់ចំនួន ១៩០ដុល្លារសម្រាប់ឆ្នាំ២០២០ ដ៏ខ្លីខាងមុខនេះ អគ្គលេខាធិការសមាគមរោងចក្រកាត់ដេរនៅកម្ពុជា ហៅកាត់ថា (GMAC) បានឱ្យដឹងថា សព្វថ្ងៃនេះខាងសមាគមក៏ដូចជាសមាជិកទាំងអស់នៅតែមានការព្រួយបារម្ភអំពីការបាត់បង់ប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ (Everything But Arms—EBA) ដែលខាងសហគមន៍អឺរ៉ុបផ្តល់ជូនកម្ពុជា។
លោក ខេន លូ អគ្គលេខាធិការ GMAC បានឱ្យដឹងកាលពីថ្ងៃទី២០ ខែកញ្ញាម្សិល
មិញថា ការតម្លើង ឬការផ្តល់ជូនប្រាក់ខែដល់កម្មករក្នុងវិស័យកាត់ដេរនៅកម្ពុជាកើនឡើងយ៉ាងលឿនចាប់ពី ឆ្នាំ២០១៣ដល់២០១៨ បើប្រៀបធៀបទៅនិងប្រទេសជិតខាងកម្ពុជា ប៉ុន្តែដល់ឆ្នាំ២០២០ ឬ២០២១ ការតម្លើងប្រាក់ខែជូនដល់កម្មករចង់ឱ្យមានការគិតគូរតាមបែបអត្រាកំណើនសេដ្ឋកិច្ចប្រចាំឆ្នាំវិញ។
ទន្ទឹមនឹងប្រាក់ឈ្នួលអប្បបរមារបស់និយោជិតសម្រាប់ឆ្នាំ២០២០ ត្រូវបានប្រកាសកាលពីថ្ងៃទី ២០ ខែកញ្ញា ម្សិលមិញនេះកំណត់ផ្តល់ជូនកម្មករ-កម្មការិនីនៃរោងច្រកកាត់ដេរសម្លៀកបំពាក់និងស្បែកជើង ចំនួន ១៩០ដុល្លារអាមេរិកក្នុងមួយខែ តំណាងខាង GMAC នៅតែមានក្តីកង្វល់ជុំវិញបញ្ហានៃភាពមិនច្បាស់លាស់របស់ EBA ថាតើប្រព័ន្ធអនុគ្រោះពន្ធនេះនឹងត្រូវសហភាពអឺរ៉ុបសម្រេចដកចេញពីកម្ពុជាឬយ៉ាងណានោះ ។
លោក ខេន លូ បានបញ្ជាក់ថា «មកដល់សព្វថ្ងៃខាងសមាគមនៅតែមានការព្រួយបារម្ភអំពីការបាត់បង់ប្រព័ន្ធអនុគ្រោះពន្ធ (អ្វីៗគ្រប់យ៉ាងលើកលែងតែអាវុធ) ដែលសហគមន៍អឺរ៉ុបបានផ្តល់ជូនមកកម្ពុជា។ យើងនៅតែបន្តតាមដានព័ត៌មានជាបន្តបន្ទាប់អំពីរឿងនេះ» ។
លោក លី តេកហេង ប្រធានប្រតិបត្តិនៃសមាគមរោងចក្រកាត់ដេរនៅកម្ពុជាធ្លាប់មានប្រសាសន៍ថា «ជារួមវិស័យវាយនភ័ណ្ឌក្នុងប្រទេសយើងនៅតែមានសកម្មភាពល្អប្រសើរ ហើយអ្នកវិនិយោគិននូវតែបន្តចូលមកវិនិយោគបន្តបន្ទាប់ក្នុងឆ្នាំ២០១៩នេះ។ បើខ្ញុំប្រៀបធៀបកាល២ឆ្នាំមុននិងឆ្នាំនេះ ឧស្សាហកម្មកាត់ដេរយើងមានលក្ខណៈល្អប្រសើរជាង គឺមានរោងចក្រចំនួន៣៤រោងចក្រចូលមកបើកនៅកម្ពុជា។ បច្ចុប្បន្នសមាគមរោងមានសមាជិកជាង៦០០រោងចក្រ ហើយផ្តល់ការងារដល់ពលរដ្ឋកម្ពុជាធ្វើប្រមាណ៧០ម៉ឺននាក់»។
ពាក់ព័ន្ធនឹងការប្រកាសជាផ្លូវការនៃប្រាក់ឈ្នួលថ្មីសម្រាប់ឆ្នាំ ២០២០ នេះផងដែរ បើតាមប្រធានចលនាសហជីពកម្មករកម្ពុជាលោក ប៉ាវ ស៊ីណា បានឲ្យដឹងថាទោះបីការតម្លើងប្រាក់ខែសម្រាប់កម្មករនិយោជិតឆ្នាំ២០២០ មិនឆ្លើយតបទៅតាមការចង់បាន តែវាជាចំណុចវិជ្ជមានមួយខណៈប្រទេសកម្ពុជាមិនទាន់មានភាពច្បាស់លាស់ពីការបាត់បង់ប្រព័ន្ធអនុគ្រោះពន្ធ។
លោក ប៉ាវ ស៊ីណា បានមានប្រសាសន៍ថា «សម្រាប់ខ្ញុំមើលឃើញថាបើទោះបីការតម្លើងប្រាក់ខែជូនកម្មករនិយោជិតវាមិនទាន់ដល់ចំណុចដែលយើងចង់បាន ប៉ុន្តែវាតួលេខវិជ្ជមានមួយបន្ទាប់ពីយើងបានខិតខំប្រឹងប្រែងចរចារនាពេលកន្លងមក។ តែយើងបានស្នើសុំលក្ខខណ្ឌការងារចំនួន១៣ចំណុចផ្សេងទៀត ហើយក្នុងនោះសុទ្ធសឹងតែជាចំណុចសំខាន់ៗ ដូចជាសុំប្រាក់សម្រាប់អាហារថ្ងៃត្រង់ ក៏ដូចជាការស្នើសុំជាមធ្យោបាយដឹកជញ្ជូនប្រកបដោយសុវត្ថិភាព, ស្នើសុំពិនិត្យលើការចុះបញ្ជីការតាមរោងចក្រដោយសារសព្វថ្ងៃនេះឃើញមានភាពរាំងស្ទះ រួមនិងការស្នើសុំឱ្យមានការត្រួតពិនិត្យលើការឡើងថ្លៃផ្ទះជួលជាដើម»។ លោកបានបញ្ជាក់បន្ថែមថា «តួលេខនេះវាមិនទាន់ឆ្លើយតបទៅនឹងតម្រូវការរបស់កម្មករនិយោជិតចង់បាន តែប្រទេសយើងស្ថិតក្នុងភាពមួយមិនទាន់ច្បាស់លាស់ពីប្រព័ន្ធអនុគ្រោះពន្ធ អីចឹងខ្ញុំមើលឃើញថាទោះបីវាឡើងបានបន្តិចបន្តួច តែវាអាចជាសារវិជ្ជមានមួយនៅក្នុងគ្រាដែលយើងកំពុងមានបញ្ហាខាងប្រព័ន្ធអនុគ្រោះពន្ធនេះ»។
លោក អ៊ិតសំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈមានប្រសាសន៍ថា «ក្រុមប្រឹក្សាជាតិប្រាក់ឈ្នួលអប្បបរមារបស់យើងបានបញ្ចប់កិច្ចប្រជុំរបស់ខ្លួន ហើយក្រុមប្រឹក្សាបានបោះឆ្នោតតាមនីតិវិធីដោយកំណត់យកតួលេខ១៨៧ដុល្លារអាមេរិក ហើយទន្ទឹមនឹងនេះសម្តេចអគ្គមហាសេនាបតីតេជោហ៊ុនសែនដែលជានិច្ចកាលតែងតែយកចិត្តទុកដាក់ដល់ជីវិភាពរបស់កម្មករនិយោជិត សម្តេចសម្រេចបន្ថែមពីលើ៣ដុល្លារអាមេរិក។ ដូចនេះប្រាក់ឈ្នួលអប្បបរមាផ្នែកវាយនភណ្ឌកាត់ដេរនិងស្បែកជើងសម្រាប់ឆ្នាំ២០២០គឺ១៩០ដុល្លារអាមេរិកក្នុងមួយខែ»។ បើតាមលោករដ្ឋមន្ត្រី ចាប់ពីឆ្នាំ២០២០ទៅកម្មករនិយោជិតនៅក្នុងផ្នែកវាយនភណ្ឌ កាត់ដេរនិងស្បែកជើងក្នុងមួយខែៗ បើបូកជាមួយអត្ថប្រយោជន៍ផ្សេងៗដែលបានផ្តល់ជូន គឺកម្មករនិយោជិតទទួលបានជាង២០០ដុល្លារអាមេរិក។
សូមរម្លឹកថានេះមិនមែនជាលើកទី១ ទេដែលថ្នាក់ដឹកនាំ GMAC បានបង្ហាញក្តីបារម្ភរឿងបាត់បង់ EBA ព្រោះកន្លងមក GMAC បានបញ្ជាក់ក្នុងសេចក្តីថ្លែងការណ៍របស់ខ្លួនជាច្រើនលើកច្រើនសារថា បើសហភាពអឺរ៉ុបផ្អាកប្រព័ន្ធអនុគ្រោះពន្ធ (EBA)នៅពេលខាងមុខនេះ នោះវានឹងធ្វើឲ្យរងគ្រោះដោយផ្ទាល់ដល់កម្មករប្រមាណជាង ៧៥ម៉ឺននាក់ និងប៉ះពាល់ដល់គ្រួសាររបស់ពួកគេ៣លាននាក់ផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ