ខេត្តកោះកុង ៖ នៅរសៀលថ្ងៃទី៣១ មីនា ប្រជាពលរដ្ឋចំនួន១០០គ្រួសារ មកពី៣ឃុំ គឺឃុំជំនាប់ ឃុំប្រឡាយ និងឃុំថ្មដូនពៅ រួមនឹងព្រះសង្ឃផង បានមកតវ៉ានៅមុខសាលាខេត្ត ដោយសុំឱ្យប្រមុខរាជរដ្ឋាភិបាល ផ្អាកគម្រោងសាងសង់វារីអគ្គិសនីនៅតំបន់ស្ទឹងអារ៉ែង ស្ថិតក្នុងស្រុកថ្មបាំង ។
សូមរំលឹកថា ការតវ៉ានេះ ចាប់ផ្តើមតាំងពីថ្ងៃទី១៤ មីនា មកម៉្លេះ ដោយជំហានដំបូងពួកគាត់បានរារាំង និងបិទផ្លូវមិនឱ្យវិស្វករចិនចូលទៅក្នុងតំបន់អារ៉ែងទេ ។
តាមគម្រោងរបស់ក្រសួងរ៉ែ និងថាមពល ក្នុងលិខិតចុះថ្ងៃទី៧ មីនា ឆ្នាំ២០១៤ បានស្នើសុំទៅលោកអភិបាលខេត្ត ជួយសម្របសម្រួលឱ្យក្រុមហ៊ុន SINOHYDRO RESOURCES Ltd ធ្វើការវិនិយោគសាងសង់គម្រោងវារីអគ្គិសនីស្ទឹងអារ៉ែង ហើយក្រុមហ៊ុននេះត្រូវបញ្ជូនអ្នកបច្ចេកទេស និងវិស្វករសិក្សាប្រមូលទិន្នន័យបន្ថែមទៅកាន់ទីតាំងគម្រោង ចាប់តាំងពីថ្ងៃទី១៩ កុម្ភៈ រហូតដល់ថ្ងៃទី២៥ មិថុនា ឆ្នាំ២០១៤ ហើយមានសមាជិកប្រមាណ៦០នាក់ ត្រូវទៅកាន់ទីនោះ ។ ប៉ុន្តែក្រុមការងាររបស់ក្រុមហ៊ុនចិនមួយនេះ ត្រូវប្រជាពលរដ្ឋតំបន់ស្ទឹងអារ៉ែង រារាំងមិនឱ្យចូលទៅកាន់តំបន់នោះឡើយ តាំងពីថ្ងៃទី១៤ មីនា មក តែការរារាំងពុំមានដំណោះស្រាយសោះ ទើបចេះតែអូសបន្លាយរហូតមក ហើយពួកគាត់ក៏បានមកដល់សាលាខេត្តនៅរសៀលថ្ងៃទី៣១ មីនា តែម្តង ។
នៅក្នុងបដាដែលពលរដ្ឋបានលើកឡើងតវ៉ាមានន័យថា «យើងមិនត្រូវការទំនប់វារីអគ្គិសនីនៅតំបន់អារ៉ែងទេ» ។ មិនតែប៉ុណ្ណោះ ទាំងប្រជាពលរដ្ឋ និងព្រះសង្ឃ បានលើកឡើងថា សុំឱ្យប្រមុខរាជរដ្ឋាភិបាល បញ្ឈប់គម្រោងសាងសង់វារីអគ្គិសនីតំបន់អារ៉ែងទៅ ព្រោះវាបានបំផ្លាញធនធានធម្មជាតិច្រើនយ៉ាង ដូចជាព្រៃឈើ ថ្មភ្នំ រ៉ែ និងសត្វព្រៃ ហើយពួកគាត់ជាជនជាតិដើម ក៏មិនត្រូវការវារីអគ្គិសនីដែរ ។
ប្រភពព័ត៌មានរាយការណ៍ពីខេត្តកោះកុង បញ្ជាក់ថា ឆ្លើយតបនឹងការតវ៉ាខាងលើនេះ អាជ្ញាធរខេត្ត បានកោះហៅតំណាងប្រជាពលរដ្ឋចំនួន១៦នាក់ ចូលទៅកាន់សាលាខេត្ត ដើម្បីរកដំណោះស្រាយ ដែលមានលោក ផៃ ធូនផ្លាមកេសន អភិបាលរងខេត្ត បានជួបសំណេះសំណាល និងទទួលយកសំណូមពរពីពួកគាត់ ប៉ុន្តែពុំដឹងមានអត្ថន័យពិស្តារនៅឡើយទេ នៅរសៀលថ្ងៃដដែលនោះ ៕
ចែករំលែកព័តមាននេះ