យោងតាមប្រភពព័ត៌មាន២ថា អាជ្ញាធរចិនបានរឹបអូសភាគហ៊ុនមានតម្លៃដល់ទៅ៩០ពាន់លានយន់ (១០,៥ពាន់លានអឺរ៉ូ) ពីបណ្ដាមនុស្សជំនិតរបស់អតីតប្រមុខសន្ដិសុខផ្ទៃក្នុងចិនលោក ZHOU YONGKANG ដែលជាប់ចោទពីរឿងអាស្រូវពុករលួយយ៉ាងធំមួយដែលចិនពុំធ្លាប់ជួបប្រទះចាប់តាំងពីជាង៦០ឆ្នាំមកហើយ ។
យោងតាមប្រភពព័ត៌មាន២ថា អាជ្ញាធរចិនបានរឹបអូសភាគហ៊ុនមានតម្លៃដល់ទៅ៩០ពាន់លានយន់ (១០,៥ពាន់លានអឺរ៉ូ) ពីបណ្ដាមនុស្សជំនិតរបស់អតីតប្រមុខសន្ដិសុខផ្ទៃក្នុងចិនលោក ZHOU YONGKANG ដែលជាប់ចោទពីរឿងអាស្រូវពុករលួយយ៉ាងធំមួយដែលចិនពុំធ្លាប់ជួបប្រទះចាប់តាំងពីជាង៦០ឆ្នាំមកហើយ ។
ប្រភពនោះឱ្យដឹងទៀតថា មនុស្សជាង៣០០នាក់ ដែលទាក់ទិននឹងលោក ZHOU YONGKANG ជាសម្ព័ន្ធមិត្ដខាងនយោបាយជាមនុស្សជំនិត និងបណ្ដានិយោជិតត្រូវឃុំឃាំង ឬត្រូវនាំមកសួរចម្លើយរយៈពេល៤ខែចុងក្រោយនេះ ។ ទំហំទឹកប្រាក់ដែលរឹបអូសនោះពិតជាច្រើនបំផុត ហើយការស៊ើបអង្កេតរឿងនេះមានទំហំធំពុំធ្លាប់មានពីមុនមកក្នុងប្រវត្ដិសាស្រ្ដចិនសម័យទំនើប ។ ម៉្យាងវិញទៀត វាអាចជាសញ្ញានៃឆន្ទៈរបស់ប្រធានាធិបតីចិន លោក ស៊ីជីងពីង ប្រយុទ្ធប្រឆាំងអំពើពុករលួយនៅក្នុងជួរអ្នកដឹកនាំជាន់ខ្ពស់របស់រដ្ឋ ។ ក៏ប៉ុន្ដែបែបនេះវាក៏អាចជាការវាយបកខាងនយោបាយមួយប្រឆាំងលោក ZHOU YONGKANG ដែលជាមនុស្សប្រឆាំងនឹងការចាប់ខ្លួនលោក បស៊ីឡែ ដែលជាប់ឃុំឃាំងចាប់ពីខែកញ្ញា ឆ្នាំ២០១៣ មក ដោយសារជាប់ចោទពីរឿងពុករលួយនិងរំលោភបំពានអំណាច ។
លោក ZHOU YONGKANG អតីតរដ្ឋមន្ដ្រីសន្ដិសុខ អាយុ៧១ឆ្នាំ បានចូលនិវត្ដន៍ កាលពីខែវិច្ឆិកា ឆ្នាំ២០១២ ក្រោយពីចូលជាសមាជិកគណៈកម្មាធិការអចិន្ដ្រៃយ៍នៃការិយាល័យ នយោបាយបក្សកុំមុយនីស្ដចិន ហើយលោកធ្លាប់ធ្វើជាប្រមុខបក្សកុំមុយនីស្ដចិន ខេត្ដស៊ីឈួន រវាងឆ្នាំ១៩៩៩ទៅ២០០២ ។ ដ្ឋាភិបាលចិនពុំបានផ្ដល់ព័ត៌មានជាផ្លូវការណាមួយទាក់ទិននឹងសំណុំរឿងលោក ZHOU YONGKANG ឡើយ ។ ការរឹបអូសទ្រព្យសម្បត្ដិរបស់បណ្ដាមនុស្សជិតដិតនឹងលោក ZHOU YONGKANG ទាក់ទិននឹងបណ្ដាគណនីធនាគារ និងបណ្ដាភាគហ៊ុនពួកគេក្នុងបណ្ដាសហគ្រាសនៅចិន និងនៅឯបរទេស ។ អាជ្ញាធរក៏រឹបអូសដែរនូវផ្ទះល្វែង និងភូមិគ្រឹះប្រមាណជា៣០០ មានតម្លៃប្រមាណជា១,៧ពាន់លានយន់ បណ្ដាផ្ទាំងគំនូរបុរាណ និងសម័យដែលមានតម្លៃលើទីផ្សារចំនួន១ពាន់លានយន់ ព្រមទាំងរថយន្ដទំនើបៗចំនួន៦០គ្រឿង ។ គេក៏រឹបអូសយកមាស ប្រាក់ ព្រមទាំងរូបិយប័ណ្ណចិន និងបរទេសទាំងឡាយផងដែរ ។ ប្រភពព័ត៌មានអះអាងថា ការរឹបអូសសរុបមានទឹកប្រាក់៩០ពាន់លានយន់ ។ ប៉ុន្ដែទំហំនៃការរឹបអូសដែលនឹងប្រកាសជាផ្លូវការអាចមានទាបជាងនេះ ៕
ចែករំលែកព័តមាននេះ