រាជធានីភ្នំពេញ ៖ ថ្វីដ្បិតនៅតាមមូលដ្ឋានសេដ្ឋកិច្ចនៅមានសភាពតូចចង្អៀតខ្លះៗក្តី ប៉ុន្តែប្រទេសកម្ពុជាត្រូវបានពិភពលោកវាយតម្លៃរួមគ្នាថា ជាប្រទេសដែលសម្រេចបាននូវកំណើនសេដ្ឋកិច្ចខ្ពស់ ក្នុងរយៈពេលប៉ុន្មានឆ្នាំចុងក្រោយនៃរាជរដ្ឋាភិបាលកម្ពុជាអាណត្តិទី៤កន្លងមក ។ ជាពិសេសតាមរយៈការសម្រេចបាននូវគោលដៅអភិវឌ្ឍន៍សហសវត្សរ៍ និងការកាត់បន្ថយភាពក្រក្ររបស់ប្រជាជន ។
នេះជាប្រសាសន៍លើកឡើងរបស់លោក ហាស់ វា៉រី ទីប្រឹក្សាផ្ទាល់ និងជាតំណាងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសជួបសំណេះសំណាលជាមួយសមាជិក-សមាជិកាបក្សក្នុងមូលដ្ឋានមកពី១៧៥ភូមិ ក្នុងឃុំទាំង១៥របស់ស្រុកព្រៃឈរ ខេត្តកំពង់ចាម ចំនួន៦៧២នាក់ ។ ពិធីជួបជុំនេះក្នុងគោលបំណងស្វែងយល់ពីការអនុវត្តការងាររបស់សមាជិក សមាជិកាបក្ស និងពង្រឹងលើកកម្ពស់ស្មារតីបំពេញភារកិច្ចបម្រើប្រជាពលរដ្ឋ ជាពិសេសបំផុសដល់យុវជនឱ្យចូលរួមធ្វើសកម្មភាពដែលផ្តល់ផលប្រយោជន៍ដល់សង្គមជាតិ ។
លោកបានថ្លែងបន្តថា ឈរលើមូលដ្ឋានសេដ្ឋកិច្ច ដែលកម្ពុជាទទួលបាននូវភាពជោគជ័យក្នុងការប្រមូលបានចំណូលសម្រាប់ទ្រទ្រង់សេដ្ឋកិច្ចជាតិ មានជាអាទិ វិស័យកាត់ដេរ វិស័យសំណង់ អចលនទ្រព្យ និងវិស័យទេសចរណ៍ ។ល។ និយាយជារួមតែក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញសមិទ្ធផលជាច្រើនទៀតបានកើតឡើងជាបណ្តើរៗ ។ ជាក់ស្តែងដូចជា ផ្លូវ ស្ពាន ទឹកស្អាត អគ្គិសនី សាលារៀន វត្តអារាម និងធនធានមនុស្ស ដែលកត្តាទាំងនេះបាននាំប្រទេសជាតិរក្សាបាននូវកំណើនសេដ្ឋកិច្ចប្រកបដោយចិរភាព ។ លោកថ្លែងថា ជាចក្ខុវិស័យ រាជរដ្ឋាភិបាលកម្ពុជាក៏បានសម្លឹងឃើញនូវសក្តានុពលក្នុងការអភិវឌ្ឍន៍វិស័យកសិកម្ម ដែលជាផ្នែកមួយគ្របដណ្តប់លើសលប់សម្រាប់កម្លាំងពលកម្ម និងលក្ខណៈអំណោយផលនៃធម្មជាតិ ។ ផ្ទៃដីកសិកម្មដែលគ្របដណ្តប់នៅតាមជនបទទូទាំងប្រទេស ដែលផ្តល់លទ្ធភាពគ្រប់គ្រាន់សម្រាប់ប្រជាកសិករ ក្នុងការលើកកម្ពស់ជីវភាពរស់នៅកាន់តែប្រសើរឡើង និងឈានទៅកាត់បន្ថយភាពក្រីក្រ ។
ដើម្បីពន្លឿនការកាត់បន្ថយភាពក្រីក្ររបស់ប្រជាជននៅក្នុងអាណត្តិទី៥នេះ រាជរដ្ឋាភិបាលកម្ពុជា បានសម្រេចបង្កើតក្រុមការងារចុះបំពេញបេសកកម្មផ្ទាល់តាមមូលដ្ឋាន ដើម្បីត្រួតពិនិត្យនិងជួយជំរុញការអនុវត្តន៍កម្មវិធីនយោបាយ និងយុទ្ធសាស្ត្រដំណាក់កាលទី៣នេះឱ្យមានប្រសិទ្ធភាព និងលើកកម្ពស់ដល់ជីវភាពប្រជាពលរដ្ឋនៅតាមមូលដ្ឋាន ។ ហើយក្រុមការងារនេះមានតួនាទីលើកកម្ពស់កិច្ចសហការ ធ្វើការសម្របសម្រួលក្នុងការជួយដោះស្រាយរាល់បញ្ហានានាដើម្បីបម្រើផលប្រយោជន៍ជូនប្រជាពលរដ្ឋ ។ ជាមួយគ្នានេះ ក្រុមការងារត្រូវរៀបចំវេទិកាសាធារណៈនៅតាមឃុំ សំដៅស្តាប់បាននូវសំណូមពរ និងតម្រូវការចាំបាច់ចំពោះមុខ ព្រមទាំងយកចិត្តទុកដាក់ដោះស្រាយរាល់សំណូមពរ និងសំណើរទាំងនោះ ដោយផ្អែកលើច្បាប់និងលិខិតបទដ្ឋានគតិយុត្តិនានា ហើយក្នុងករណីមិនអាចដោះស្រាយបាន ក្រុមការងារត្រូវបូកសរុប និងធ្វើរបាយការណ៍ជូនមករាជរដ្ឋាភិបាល ។
លោក ហាស់ វា៉រី នៅបានសំណូមពរដល់ប្រធាន អនុប្រធានភូមិ ក្រុមប្រឹក្សាឃុំ-ស្រុក និងសមាជិកសមាជិកាបក្សទាំងអស់បង្កើនការសាមគ្គីភាពផ្ទៃក្នុង និងរួមគ្នាលើកកម្ពស់ស្មារតីបំពេញភារកិច្ចបម្រើផលប្រយោជន៍ប្រជាពលរដ្ឋប្រកបដោយភាពទទួលខុសត្រូវខ្ពស់ ពិសេសចលនាដល់យុវជនក្នុងមូលដ្ឋានដើម្បីឱ្យពួកគេបានចូលរួមយា៉ងសកម្ម ក្នុងការងារដែលផ្តល់ដល់ក្រុមគ្រួសារ និងសង្គមជាតិ ។ ក្នុងឱកាសនោះដែរ លោក ហាស់ វា៉រី និងក្រុមការងារក៏បាននាំយកនូវអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប្រគេនព្រះសង្ឃ៧អង្គ ក្នុង១អង្គទេយ្យទាន១កញ្ចប់ បច្ច័យ៥ម៉ឺនរៀល ប្រគេនវត្តត្រពាំងរាំង៤លានរៀល, វត្តក្រសាំងជ្រុំ៨លានរៀល និងចែកជូនដល់សមាជិក សមាជិកា នៃអង្គពិធីដែលបានចូលរួមទាំង៦៧២នាក់ ក្នុងនោះសមាជិកចំនួន៥២៨នាក់ ម្នាក់ៗទទួលបានភួយ១ ថវិកា១ម៉ឺនរៀល ក្រុមប្រឹក្សាឃុំ៦០នាក់ ម្នាក់ភួយ១ និងថវិកា២ម៉ឺនរៀល, ឧបត្ថម្ភសាលាស្រុកព្រៃឈរ១លាន២សែនរៀល, ក្រុមប្រឹក្សា១៤នាក់ ម្នាក់ៗភួយ១ប្រាក់២ម៉ឺនរៀល, ជូនទុរគតជនស្រុកព្រៃឈរចំនួន១២លានរៀល, ទុរគតជនឃុំរកាកោង១ និងរកាកោង២ចំនួន១៥លានរៀល ៕
ចែករំលែកព័តមាននេះ